بۇگىن رەسەيدىڭ سوچي قالاسىندا ححII قىسقى وليمپيادا ويىندارى باستالماق. اقپاننىڭ 7-ءسى مەن 23-ءى ارالىعىندا الەمنىڭ 88 ەلىنەن كەلگەن 2800 سپورتشى (پاراليمپيادا سپورتشىلارىن قوسقاندا 3500) قىسقى سپورتتىڭ 15 تۇرىنەن، 98 مەدال  جيىنتىعىن ساراپقا سالاتىن بولادى.

     العاشقى قىسقى وليمپيادا ويىندارى 1924 جىلى فرانسيانىڭ شاموني قالاسىندا ۇيىمداستىرىلعان بولسا، الەمنىڭ ءار تۇكپىرىندە وتكىزىلگەن قىسقى وليمپيادا ويىنداردىڭ سانى بۇگىنگى كۇنگە دەيىن 21-گە جەتكەن. ال رەسەيدە قىسقى ويمپيادا ويىندارى العاش رەت وتكەلى وتىر.

    سوچي مەن ەلدىڭ وزگە دە قالالارىندا قىسقى وليمپيادا ويىندارىنا تۋرا 1000 كۇن قالعاندا جارىسقا قانشا كۇن، ساعات، مينۋت، سەكۋند قالعاندىعىن كورسەتىپ تۇراتىن  حرونومەترلەر ىسكە قوسىلعان. بۇگىن سول ساعاتتار سوڭعى سەكۋندتاردى ساناۋدا.

   بيىلعى سوچي وليمپياداسىنا ەلىمىزدىڭ اتىنان بارعان دەلەگاتسيادا قۇرامىندا 102 ادام بار. قاتارىندا  50 سپورتشى، 31 جاتتىقتىرۋشى، 6 دارىگەر مەن ماسساجيست، كوماندا  شتابىنداعى 5 ادام، 5 ءتىلشى جانە تاعى 5 جەكە تۇلعا بار.  قازاقستان قۇراماسى وزدەرىنە ارتىلعان سەنىمدى اقتاپ، كوماندالىق توپتا ۇزدىكتەردىڭ قاتارىنان كورىنۋدى ماقسات ەتىپ وتىر.  

بۇگىن رەسەيدىڭ سوچي قالاسىندا ححII قىسقى وليمپيادا ويىندارى باستالماق. اقپاننىڭ 7-ءسى مەن 23-ءى ارالىعىندا الەمنىڭ 88 ەلىنەن كەلگەن 2800 سپورتشى (پاراليمپيادا سپورتشىلارىن قوسقاندا 3500) قىسقى سپورتتىڭ 15 تۇرىنەن، 98 مەدال  جيىنتىعىن ساراپقا سالاتىن بولادى.

     العاشقى قىسقى وليمپيادا ويىندارى 1924 جىلى فرانسيانىڭ شاموني قالاسىندا ۇيىمداستىرىلعان بولسا، الەمنىڭ ءار تۇكپىرىندە وتكىزىلگەن قىسقى وليمپيادا ويىنداردىڭ سانى بۇگىنگى كۇنگە دەيىن 21-گە جەتكەن. ال رەسەيدە قىسقى ويمپيادا ويىندارى العاش رەت وتكەلى وتىر.

    سوچي مەن ەلدىڭ وزگە دە قالالارىندا قىسقى وليمپيادا ويىندارىنا تۋرا 1000 كۇن قالعاندا جارىسقا قانشا كۇن، ساعات، مينۋت، سەكۋند قالعاندىعىن كورسەتىپ تۇراتىن  حرونومەترلەر ىسكە قوسىلعان. بۇگىن سول ساعاتتار سوڭعى سەكۋندتاردى ساناۋدا.

   بيىلعى سوچي وليمپياداسىنا ەلىمىزدىڭ اتىنان بارعان دەلەگاتسيادا قۇرامىندا 102 ادام بار. قاتارىندا  50 سپورتشى، 31 جاتتىقتىرۋشى، 6 دارىگەر مەن ماسساجيست، كوماندا  شتابىنداعى 5 ادام، 5 ءتىلشى جانە تاعى 5 جەكە تۇلعا بار.  قازاقستان قۇراماسى وزدەرىنە ارتىلعان سەنىمدى اقتاپ، كوماندالىق توپتا ۇزدىكتەردىڭ قاتارىنان كورىنۋدى ماقسات ەتىپ وتىر.  

    ۇلتتىق وليمپيادا كوميتەتىنىڭ مالىمەتىنشە، قازاقستاننىڭ قۇراما كوماندالارى قىسقى وليمپيادا ويىندارىنا وسىمەن 6-شى رەت جەكە كوماندا رەتىندە قاتىسپاق. تاۋەلسىزدىك العاننان بەرى قازاقستان سپورتشىلارى قىسقى وليمپيادا ويىندارىندا 1 التىن، 3 كۇمىس جانە 2 قولا مەدال ەنشىلەگەن. ال وسىدان ءتورت جىل بۇرىن ۆانكۋۆەردە وتكەن  وليمپياداعا قازاقستاننان 8 سپورت تۇرىنەن 37 سپورتشى بارعان بولاتىن.

     قازاقستان قۇراماسى سوچيدە جالپى 98 مەدال توپتاماسىنىڭ 53-ءىن ساراپقا سالۋعا قاتىسادى. سوچي وليمپياداسىنىڭ اشىلۋ سالتاناتىندا ەلىمىزدىڭ كوك بايراعىن شاڭعى جارىسىندا ونەر كورسەتەتىن سپورتشىمىز ەردوس احماديەۆ الىپ شىعادى. 4-ءشى اقپاندا وليمپيادا قالاشىعىندا قازاقستان رەسپۋبليكاسىنىڭ تۋىن رەسمي تۇردە كوتەرۋ ءراسىمى ءوتتى. قازاقستاننىڭ سپورتتىق دەلەگاتسياسىنىڭ  باسشىسى  بولىپ – قر سپورت جانە دەنە شىنىقتىرۋ ىستەرى اگەنتتىگى توراعاسىنىڭ ورىنباسارى ەلسيار قاناعاتوۆ بەكىتىلدى.

   ەندى سپورت تۇرلەرى بويىنشا اگەنتتىك تاراپىنان  بەرىلگەن مالىمەتتەرگە قارايىق. شاڭعى جارىسىندا – ەردوس احماديەۆ، الەكسەي پولتورانين، نيكولاي چەبوتكو، مارك ستاروستين، ەۆگەني ۆەليچكو، سەرگەي چەرەپانوۆ، دەنيس ۆولوتكا، رومان روگوزين، اناستاسيا سلونوۆا جانە تاتيانا وسيپوۆا جۇلدەلى ورىندارعا تالاسادى.

   ال كونكي تەبۋ سپورتىنان – دەنيس كۋزين، دميتري بابەنكو، رومان كرەچ، الەكساندر جيگين، فەدور مەزەنتسەۆ جانە ەكاتەرينا ايدوۆا باقتارىن سىنايدى. مانەرلەپ سىرعاناۋدا – ابزال راقىمعاليەۆ پەن دەنيس تەن، شورت-ترەكتە – ايدار بەكجانوۆ، نۇربەرگەن جۇماعازيەۆ، ابزال اجعاليەۆ، دەنيس نيكيشا، اسلان داۋموۆ پەن يننا سيمونوۆا  ونەر كورسەتپەك.  ال فريستايل بويىنشا 9 سپورتشىعا سەنىم ارتامىز. سونىڭ ىشىندە موگۋل (شاڭعى فريستايلىنىڭ ءبىر ءتۇرى) بويىنشا – دميتري رەيحەرد، دميتري بارماشوۆ جانە پاۆەل كولماكوۆ، اكروباتيكادا – سەرگەي بەرەستوۆسكي پەن باعلان ىنكاربەك. ايەلدەر اراسىندا موگۋل بويىنشا يۋليا گالىشەۆا مەن داريا رىبالوۆا، اكروباتيكادا – جىبەك اراپباەۆا مەن جانبوتا الدابەرگەنوۆا  ەل نامىسىن قورعايتىن بولادى.

   شانا سپورتىنان – ەليزاۆەتا اكسەنوۆا، تاۋ شاڭعىسىنان – يگور زاكۋرداەۆ، دميتري كوشكين، مارتين حۋبەر جانە ەكاتەرينا چەرەپانوۆا، تۇعىردان شاڭعىمەن سەكىرۋدەن – الەكسەي پچەلينتسەۆ، سنوۋبوردتان – ۆالەريا تسوي جەڭىس تۋىن جەلبىرەتۋگە كۇش سالادى.

  جانە دە بياتلوننان 10 سپورتشى باق سىنايدى. ەرلەر باسەكەسىندە – دياس كەنەشەۆ، يان ساۆيتسكي، سەرگەي ناۋميك، انتون پانتوۆ، الەكساندر تريفونوۆ، ايەلدەر باسەكەسىندە – ەلەنا حرۋستالەۆا، مارينا لەبەدەۆا، داريا ۋسانوۆا، الينا رايكوۆا ي گالينا ۆيشنەۆسكايا جەڭىستى قولدان بەرمەۋگە بەكىنىپ وتىر.                                                             

     جالپى، وليمپيادا ويىندارىندا توپ جارعان سپورتشىلارىمىز سىي-سىياپاتتان كەندە قالمايتىن ءتارىزدى.  قر سپورت جانە دەنە شىنىقتىرۋ اگەنتتىگى توراعاسىنىڭ ورىنباسارى  ەلسيار قاناعاتوۆتىڭ  ايتۋىنا قاراعاندا وليمپيادادا جەڭىمپاز بولىپ تانىلعان سپورتشى 250 مىڭ اقش دوللارىنا يە بولادى. ەكىنشى ورىن ءۇشىن – 150 مىڭ، ءۇشىنشى ورىنعا – 75 مىڭ اقش دوللار بەرىلەدى. سونىمەن قاتار التىنشى ورىنعا دەيىنگى كورسەتكىشكە قول جەتكىزگەن سپورتشىلار مەن باپكەرلەرى دە سىياقىدان قۇر قالمايتىنى بەلگىلى بولدى.

    جارىس بولعان سوڭ جارقىن جەڭىستەر مەن جەڭىلىستەر بولاتىنى بەلگىلى. كىمدەردىڭ وزا شاۋىپ، جۇلدە الاتىنىن سايىس بارىسىندا كورەرمىز. دەگەنمەن الدىن-الا جورامال جاساۋشىلار دا جوق ەمەس. ماسەلەن، حالىقارالىق «Infostrada» ساراپتاما ورتالىعىنىڭ جورامالى بويىنشا قازاقستان سوچيدە ءبىر التىن، ءبىر قولا مەدال جەڭىپ الىپ، جالپى ەسەپتە 21-ورىن الۋى ىقتيمال. Infostrada «التىندى شاڭعىشى الەكسەي پولتورانين جەكەلەي جارىستا يەلەنەدى، قولا جۇلدەنى الەكسەي پولتورانين مەن نيكولاي چەباتكو كوماندالىق جارىستا الۋى مۇمكىن» دەپ بولجايدى.

  رەسەيلىك «سپورت ەكسپرەسس» گازەتىنىڭ ساراپشىلارى قازاقستان ەكى التىن، ءبىر قولا الادى دەپ توپشىلايدى. باسىلىم «قازاقستاندىق شاڭعىشى الەكسەي پولتورانين 15 شاقىرىمعا كلاسسيكالىق جۇگىرۋ مەن 50 شاقىرىمدىق جاپپاي ستارتتا التىن الادى» دەگەن بولجام جاساپ وتىر. ال 1000 مەترگە كونكيمەن جۇگىرۋدەن الەم چەمپيونى دەنيس كۋزينگە ورىس جۋرناليستەرى «قولا مەدال» بەرىپتى. ال مانەرلەپ سىرعاناۋدان ءبىز ءۇمىت ارتىپ وتىرعان دەنيس تەن «سپورت ەكسپرەسستىڭ» ەشبىر بولجامىنا ەنبەگەن.

    Sportsmyriad.com پورتالىنىڭ بولجامىن ايتساق، قازاقستان كەم دەگەندە ەكى مەدال الادى. ياعني، الامان بايگەدە قازاقستاندىق شاڭعىشى الەكسەي پولتورانين التىن مەدال ولجالاسا، كونكيشىمىز دەنيس كۋزين قورجىنعا كۇمىس جۇلدە سالاتىن كورىنەدى. بۇل، ارينە، بولجام.

   الايدا، وسى ايتىلعان جايت جۇزەگە اسار بولسا، قازاقستان  88 ەلدىڭ ىشىنەن ۇزدىك جيىرمالىقتى تۇيىندەۋگە مۇمكىندىك الادى. دەگەنمەن، ءبىز، مانەرلەپ سىرعاناۋدىڭ شەبەرى دەنيس تەنگە ۇكىلى ءۇمىتىمىزدى تاعىپ وتىرمىز.  ول الدىن-الا بولجام جاساۋدا شەتەلدىك مامانداردىڭ نازارىنان تىس قالعانىمەن، سوچيگە تەك جۇلدە ءۇشىن باراتىنى ءسوزسىز. ءتىپتى سول جۇلدەنىڭ التىن بولۋى دا عاجاپ ەمەس. سونداي-اق، فريستايلشىلارىمىزعا دا جۇلدەگە ىلىگۋگە تولىق مۇمكىندىك بار. دەمەك، قىسقى وليمپيادانى ۇزدىك ون بەس ەلدىڭ قاتارىندا اياقتاۋعا دا شامامىز تولىق جەتەدى.

   قوش، ەندى وليمپيادا جايىندا بىرەر ءسوز قوزعاساق. جالپى، رەسەي وليمپيادا الاۋىن اشىق عارىش كەڭىستىگىنە شىعارعان العاشقى ەل رەتىندە ەستە قالدى. ەلدىڭ  ەكى عارىشكەرى بىلتىر قاراشانىڭ 9-ىندا حالىقارالىق عارىش ستانساسىنان عارىش كەڭىستىگىنە شىققاندا وليمپيادا الاۋىن بىرگە الىپ شىقتى. ول ساتتە الاۋ تۇتانعان جوق، سەبەبى عارىش كەڭىستىگىندە اۋا جوق بولعاندىقتان، وت جانبايدى. قاۋىپسىزدىك ماقساتىندا عارىش ستانساسىنىڭ ىشىندە دە الاۋ جاعىلعان جوق. بۇعان دەيىن تۇتاندىرىلىپ ەستافەتالىق تارتىپپەن14 مىڭ ادامنىڭ قولىنان ءوتىپ، رەسەيدىڭ 83 ايماعى مەن اۆتونومدى رەسپۋبليكاسىن ارالاپ كەلگەن وليمپيادا الاۋى سوچيگە بۇگىن جەتكىزىلمەك.

   سوچيدەگى ەڭ باستى ماسەلە – قاۋىپسىزدىك. سەبەبى  سوچيگە جاقىن جاتقان كاۆكاز جاعى ەڭ مازاسىز ايماق بولىپ سانالادى. ونىڭ ۇستىنە «يمارات كاۆكاز» قارۋلى توبىنىڭ باسشىسى دوكۋ ۋماروۆ ويىنداردىڭ شىرقىن بۇزۋعا ارەكەت ەتەتىندىكتەرىن ايتىپ سالعان. بۇعان دەيىن 2013 جىلدىڭ 29-جەلتوقسانىندا رەسەيدىڭ ۆولگوگراد قالاسىنىڭ ۆوكزالىندا جارىلىس بولىپ، 17 ادام قازا بولدى، 45 ادام جارالاندى. ەرتەڭىندە تروللەيبۋس جارىلىپ، 14 ادام قازا تاۋىپ، 15 ادام زارداپ شەكتى.  سوندىقتان سوچي وليمپياداسىندا  قاۋىپسىزدىككە باسا ءمان بەرىلىپ، رەسەي قاۋىپسىزدىك قىزمەتىنىڭ قاراماعىنداعى 100 مىڭ سارباز ويىندار وتكىزىلەتىن الاڭدارداعى  قاۋىپسىزدىكتى قامتاماسىز ەتۋگە جۇمىلدىرىلعان. 

   جالپى، رەسەي وليمپيادانى وتكىزۋ قۇقىنا يە بولعان كۇننەن باستاپ دايىندىق جۇمىستارىنا قوماقتى قارجى سالدى. بۇگىندە سوچي وليمپياداسىنا جۇمسالعان سوما 51 ميلليارد اقش دوللارىنا جەتكەن. ونىڭ باسىم بولىگى ايماقتىڭ ينفروقۇرىلىمى مەن سپورت نىساندارىنا جۇمسالعانىن ايتا كەتەيىك. ويتكەنى، سوچيدە قىسقى سپورت تۇرلەرىنە ارنالعان نىسانداردىڭ بولماۋىنا بايلانىستى بارلىق كەشەندى جاڭادان سالۋعا تۋرا كەلدى. الداعى ويىنداردا سپورتشىلار سايىستىڭ 15 تۇرىنەن باق سىنايتىنى بەلگىلى. جارىستار وليمپياداعا ارنالىپ سالىنعان 11 سپورت كەشەنىندە وتەدى. ونىڭ 6-ۋى تەڭىز جاعالاۋىنان ورىن تەپسە، 5 سپورت نىسانى تاۋدا ورنالاسقان.

   سوچيدەگى ويىنداردى وتكىزۋدە Coca-Cola,   Atos S.A.، Dow General Electric,  McDonald’s,   Omega,   Chemical,   Panasonic,   Procter & Gamble,  Samsung,  VISA  دۇنيەجۇزىلىك وليپيادالىق سەرىكتەستەر مەن اەروفلوت، Bosco, مەگافون،  روسسيسكيە جەلەزنىە دوروگي،  روسنەفت، روستەلەكوم، سبەربانك  روسسي،  Volkswagen Group Rus سياقتى ۇلتتىق سەرىكتەستەرى دەمەۋشىلىك ەتەدى.

   «سوچي-2014» وليمپياداسى رەسمي سايتىنىڭ مالىمەتىنشە، سپورتشىلارعا  تاپسىرىلاتىن 1300 مەدال دايىندالعان. وليمپيادا ويىندارىنىڭ ەڭ كەرەمەت ءارى ەستە قالارلىق ساتتەرىنىڭ ءبىرى ول اشىلۋ سالتاناتى ەكەنى بەلگىلى. ياعني، بۇگىن جالاۋىن جەلبىرەتەتىن دودانىڭ اشىلۋ سالتاناتىنا 3000 ءارتىس قاتىسىپ، ولار ءبىر مەزەتتە ءۇش ءساحنادا تۇرلى قويىلىمدارىن كورسەتپەك.

  ءدۇيىم جۇرت كوز تىككەن اتالمىش دودادا جارىسقا تۇسەتىن سپورتشىلار سوڭعى جاتتىعۋلارىن وتكىزىپ، دايىندىقتارىن پىسىقتاپ، دايىن تۇر. كىمنىڭ بابى، كىمنىڭ باعى شابارى ۋاقىت ەنشىسىندە. قازاق ەلىنىڭ سپورتشىلارىنا ساتتىلىك سەرىك بولىپ، جەڭىس تۋىن جەلبىرەتىپ جانكۇيەرىن قۋانىشقا بولەسە ەكەن دەپ تىلەيمىز.

ەرلان باپانوۆ, «پرەزيدەنت جانە حالىق» گازەتى