بۇگىن كەشكە تاڭعا دەيىن الماتىدا وتكىنشى جاڭبىر جاۋىپ، 17 ساۋىرگە دەيىن جالعاسادى. بۇل تۋرالى قالا اكىمدىگىنىڭ ءباسپاسوز قىزمەتى حابارلايدى.

ەلدەگى بولىپ جاتقان توتەنشە جاعدايلارعا قاتىستى، كوممۋنالدىق ينفراقۇرىلىمدى دامىتۋ باسقارماسىنىڭ حابارلاۋىنشا، قالانىڭ كوممۋنالدىق قىزمەتتەرى قالانىڭ سۋ بۇرۋ جۇيەلەرىن الدىن الا تەكسەرىپ، سۋ الاتىن تورلاردى، ارىق جۇيەلەرى مەن قۇدىقتاردى تازارتۋ جۇمىستارىن جۇرگىزەدى.

جاڭبىر سۋىنىڭ كەدەرگىسىز ءوتۋىن قامتاماسىز ەتۋ ءۇشىن موتوپومپالارمەن، ىلمەكتەرمەن جانە باسقا دا قۇرالدارمەن جابدىقتالعان 52 جەدەل ءموبيلدى توپ ۇيىمداستىرىلعان. 2,3 مىڭ قۇم سالىنعان قاپ دايىندالدى.

«اۋا رايىنىڭ ناشارلاۋىنا بايلانىستى اعاشتاردىڭ قۇلاۋ قاۋپى جانە ەلەكتر سىمدارىنىڭ ۇزىلۋىنە بايلانىستى جۇرگىزۋشىلەرگە كولىكتەردى جول جيەگىنە قويۋعا كەڭەس بەرىلمەيدى. سۋ تاسقىنىنىڭ الدىن الۋ ءۇشىن ازاماتتاردان ارىقتارعا، كانالدارعا قوقىس تاستاماۋىن سۇرايمىز. سۋ تاسقىنى نەمەسە ۋاقىتشا سۋ جينالىپ قالعان جاعدايدا اۋدان اكىمدىكتەرىنە حابارلاۋعا نەمەسە What’s app نومىرىنە +7 (706) 689 88 98 حابارلاما جازۋعا بولادى»، – دەپ جازىلعان حابارلامادا.

Abai.kz