سەيسەنبى, 21 مامىر 2024
اقمىلتىق 1462 12 پىكىر 3 ءساۋىر, 2024 ساعات 17:31

سۋ باسقىنى بويىنشا ۇندەۋ: ەلگە قولايلى اكىمشىلىك قۇرىلىم قاجەت!

قۇرمەتتى اعايىن!

ەلدەگى سۋ باسقىنىنىڭ زاردابىن شەككەن حالقىمىزدىڭ جاعدايىنا جايباراقات شىداۋ مۇمكىن ەمەس. وسىعان وراي قازاقستاننىڭ ازاماتى رەتىندە مىنانى مالىمدەيمىن.

ەلدەگى سۋ باسقىنىنا بىرنەشە سەبەپ بار.

ونىڭ باستىلارى:

1. عالامدىق وزگەرىستەر مەن جەردىڭ ەكولوگيالىق توزۋ ماسەلەسى;

2. ەلدىڭ اكىمشىلىك-اۋماقتىق قۇرىلىمىنىڭ ەسكى يەرارحيا فورماتىندا قالۋى;

3. جەمقورلىق، ۇرى-قارلىق، قابىلەتسىزدىك...

وسىلاردىڭ ىشىندەگى 2-سەبەپ ءبىز ءۇشىن ماڭىزدى. ويتكەنى، باسقا سەبەپتەرگە بارىنشا تويتارىس بەرەتىن، كەلەڭسىزدىكتى جوياتىن - بىردەن ءبىر ەل باسقارۋدىڭ اكىمشىلىك جۇيەسى.

جىلدىڭ ءتورت مەزگىلىندەگى ءتورت دۇلەيگە دايىن بولماۋ مەن قىرسىزدىق، قاۋقارسىزدىق، قىرۋار قارجىنىڭ ءتيىمسىز جۇمسالۋىنا وسى سەبەپ قانا جاۋاپ بەرەدى.

ماسەلە – شليۋزدەردىڭ اشىلماي قالۋىندا ەمەس،  سالانى باسقاراتىن سكلياردا ەمەس!

كسرودان قالعان اكىمشىلىك-اۋماقتىق فورمات جاڭا جاعدايداعى مەملەكەتتى باسقارۋعا يكەمسىز.

بۇرىنعى توتاليتارلىق-اۆتوريتارلىق اكىمشىلىك-اۋماقتىق  جۇيە ءالى جاڭارعان جوق. اسىرەسە، مەملەكەتتى تىگىنەن جانە كولدەنەڭىنەن باسقارۋدىڭ اكىمشىلىك جۇيەسى سوۆەتتىك يەرارحيانىڭ فورماتىندا قالىپ وتىر.

ەلدىڭ قىرۋار الەۋەتى مەن رەسۋرسى سونىڭ كەسىرىنەن وڭدى-سولدى ءراسۋا بولىپ، تيىمسىزدىك ابىرويسىزدىققا ۇلاسۋدا.

قازىر جەرگىلىكتى الەۋەت پەن مەملەكەتتىك رەسۋرس ءارى-ءسارى، كىمنىڭ نەنى باسقارىپ، نە ىستەپ وتىرعانى تۇسىنىكسىز. ورتالىق پەن وڭىرلەردىڭ اراسىندا تىعىز شەشىمتال قاتىناس جوق. ۇشدەڭگەيلى ەسكى سوۆەتتىك قازاقستاندىق اكىمشىلىك يەرارحيا ءوزىن اقتاي الماي، حالقىمىز سونىڭ كەسىرىنەن جاپا شەگۋدە.

قىسقاسى، جەر اۋماعى وراسان، حالقى از قازاقستان ءۇشىن،

ەل باسقارۋدىڭ اكىمشىلىك تەتىگىن قوسدەڭگەيلى فورماتقا كوشىرۋ كەرەك، اتاپ ايتقاندا:  قالىپتاسقان توتاليتارلىق اكىمشىلىكتى ىعىستىراتىن، جەرگىلىكتى ءوزىن ءوزى باسقارۋ مەن جوعارعى-مەملەكەتتىك دەڭگەيدەگى قوسساتىلى اۋماقتىق-اكىمشىلىك فورماتى قاجەت.

ورتاڭعى وبلىستىق اكىمشىلىك جۇيەنى جاۋاپسىز، يكەمسىز، قاۋقارسىز،قىرسىز،  بويىنا بۇكىل سۋبەكتيۆ سەبەپتەر مەن كەسەلدەردى جيناعان زۆەنو رەتىندە مۇلدەم جويۋ كەرەك.

17 وبلىستىق اكىمشىلىكتىڭ ورنىنا ەجەلگى توركتەردىڭ جۇيەسىنە (اق،كوك،قىزىل،قارا،سارى) سالىپ، 5 ايماقتىق مينيسترلىك قۇرىپ، سول ايماقتارعا مەملەكەتتىك رەسۋرس پەن بيلىكتى ءادىل تۇردە تاراتۋ كەرەك تە، جەرگىلىكتى اكىمشىلىك جۇيەنى تۇگەلىمەن حالىققا تاپسىرۋ قاجەت: بارلىق اكىمدەر مەن ءماسليحاتتاردى حالىق شىنايى سايلاسىن، ءوز بيۋدجەتىن ءوزى جاساقتاپ، ءوزى جۇمساپ، ءوزى باقىلاسىن!

بۇل اكىمشىلىك فورمات ەڭ الدىمەن جەرگىلىكتى قولدا بار رەسۋرستى حالىقتىڭ ءوز ومىرىنە ءتيىمدى جۇمساۋىنا كەرەك. حالىق كازىرگىدەي جاۋتاڭداپ تەنتىرەپ قالماۋ ءۇشىن قاجەت!

جەرگىلىكتى جۇرتشىلىق ءوز قامىن ءوزى ويلاپ، ءوز ماسەلەسىن ءوزى شەشۋگە قاجەت رەسۋرستى ءتيىمدى پايدالانۋعا قولجەتەر بيلىكتىڭ كوزى حالىقتا بولۋى ءتيىس.

سونىمەن بىرگە وڭىرمەن تىعىز قاتىناستا بولاتىن ءارى ماسەلەنى مەملەكەتتىك دەڭگەيدە شەشەتىن جوعارعى مەملەكەتتىك اكىمشىلىك قۇرىلىمى دا سايكەسىنشە قۇزىرلى مەملەكەتتىك ورگان بولۋى  قاجەت.

ىرىلەنگەن ءارى تولىق قۇزىرى بار 200 اۋداننىڭ ەسەبىنەن قۇرىلعان 5 ايماقتاعى 5 مينيسترلىك تىكەلەي ۇكىمەت قۇرامىنا كىرىپ، جوعارى بيلىككە ەسەپ بەرۋگە جانە ۇكىمەتتىڭ ءوزى ايماقتاعى مەملەكەتتىك مىندەتتەردى اتقارۋعا وسى مينيسترلىكتەر ارقىلى تىكەلەي ارالاسۋعا ءماجبۇر ءارى جاۋاپتى بولار ەدى.

بۇل ايماقتىق مينيسترلەر پارلامەنتتىڭ بەكىتۋىمەن تاعايىندالعانى ابزال.

قوسساتىلى بۇل باسقارۋ فورماتى كوكتەمدە سۋ اپاتىنان، جازدا وت اپاتىنان، كۇزگى ءونىمنىڭ ءراسۋا بولىپ، قىستا قارلى بوراننىڭ قۇرساۋىنان قۇتقارۋ ءۇشىن عانا ەمەس، ەلدىڭ ءومىرىن  تىڭعىلىقتى باسقارۋعا ءتيىمدى مەملەكەتتىك اكىمشىلىك جۇيەگە اينالاتىنى ءسوزسىز.

حالىقتى اكىمشىلىك قۇرىلىمنىڭ بىلىعىنان قۇتقاراتىن ۋاقىت كەلدى، اعايىن. تاعى دا ايتام، ماسەلە اشىلماي قالعان شليۋز بەن سالانى باسقاراتىن سكلياردا ەمەس... اكىمشىلىك باسقارۋ جۇيەسىندە!

بيلىك پەن حالىقتىڭ نازارىن وسىعان اۋدارعىم كەلدى.

اپاتتان امان بولايىق!

قۇرمەتپەن: سەرىك ەرعالي،

90-جىلدارداعى ازاماتتىق «ازات» قوزعالىسىنىڭ نەگىزىن سالۋشىلاردىڭ ءبىرى، 1992 جىلى ازىرلەنگەن «كوسەگە قايتسە كوگەرەر؟» ساياسي تۇجىرىمدامانىڭ اۆتورى.

Abai.kz

12 پىكىر

ۇزدىك ماتەريالدار

قۇيىلسىن كوشىڭ

باس گازەت ورالماندارعا نەگە شۇيلىكتى؟

ءالىمجان ءاشىمۇلى 2242
ادەبيەت

«سولاي ەمەس پە؟»

عابباس قابىشۇلى 2597
قوعام

دوس كوپ پە، دۇشپان كوپ پە؟

ءابدىراشيت باكىرۇلى 2561
ەل ءىشى...

ۇلتتىق بىرەگەيلەنۋ: قانداستاردىڭ ءرولى قانداي؟

ءومارالى ادىلبەكۇلى 1687