وقۋ-اعارتۋ مينيسترلىگى 15 ساۋىردەن باستاپ قازاقستاندىق مەكتەپتەردە وقۋشىلاردىڭ ءبىلىم جەتىستىكتەرىنىڭ مونيتورينگى باستالاتىندىعىن حابارلادى. وعان 2462 مەكتەپ بويىنشا 4-ءشى جانە 9-سىنىپتارىندا وقيتىن 150 مىڭعا جۋىق وقۋشى قاتىسادى.

وقۋشىلاردىڭ ءبىلىم ساپاسىن زەردەلەۋگە باعىتتالعان بۇل جۇيە ارقىلى وقۋ باعدارلامالارىنىڭ تيىمدىلىگىن باعالاۋعا، سونداي-اق، وقۋ پروتسەسىنىڭ وسال تۇستارىن انىقتاۋعا قول جەتكىزىلەدى.

"مونيتورينگ ساۋاتتىلىقتىڭ ءۇش باعىتى بويىنشا جۇرگىزىلەدى: وقۋ ساۋاتتىلىعى، ماتەماتيكا جانە جاراتىلىستانۋ. وقۋشىلار تەستىلەۋدى كومپيۋتەرمەن تاپسىرادى. حالىقارالىق زەرتتەۋلەرگە سايكەس، ءبىلىم بەرۋ جەتىستىكتەرىنىڭ ءارتۇرلى ماندىك فاكتورلارىن انىقتاۋ ءۇشىن ببجم شەڭبەرىندە ساۋالناما جۇرگىزىلەدى. ساۋالناما وقۋشىلارعا، پەداگوگتەرگە، مەكتەپ باسشىلارىنا جانە ءتورتىنشى سىنىپ وقۋشىلارىنىڭ اتا-انالارىنا ارنالعان", – دەدى "ا.بايتۇرسىنۇلى اتىنداعى "تالداۋ" ۇلتتىق زەرتتەۋلەر جانە ءبىلىمدى باعالاۋ ورتالىعى" اق توراعاسى ماعجان امانعازى.

ببجم 26 ساۋىرگە دەيىن جالعاسادى. بيىل تەست تاپسىرمالارى PISA, PIRLS, TIMSS حالىقارالىق باعالاۋ ۇلگىلەرىن ەسكەرە وتىرىپ جاڭارتىلدى.

Abai.kz