جۇما, 21 ماۋسىم 2024
ساڭلاق 2113 0 پىكىر 12 ناۋرىز, 2024 ساعات 17:52

بوكس: 5 بوكسشىمىز پاريجگە جولداما ۇتتى

يتاليانىڭ بۋستو-ارسيتسيو قالاسىندا بوكستان پاريج وليمپياداسىنىڭ ليتسەنزياسى ۇلەستىرىلەتىن الەمدىك تۋرنير ءوز مارەسىنە جەتتى. بۇل جارىسقا قازاقستان قۇراماسىنىڭ ەرلەر جانە ايەلدەر اراسىنداعى 11 بوكسشىسى (6 ەر، 5 ايەل) قاتىسىپ، ۇلتتىق قۇراما قورجىنىنا پاريج وليمپياداسىنىڭ بەس جولداماسىن سالدى.

اتاپ ايتار بولساق، پاريجدەگى وليمپيا ويىندارىنا جولدامالاردى ەرلەر باسەكەسىندە توكيو وليمپياداسىنىڭ قولا جۇلدەگەرى، الەم چەمپيونى ساكەن بيبوسىنوۆ (51 كگ), الەم چەمپيونى سابىرحان ماحمۇد (57 كگ), الەم جانە ازيا چەمپيونى، ازيا ويىندارىنىڭ جۇلدەگەرى، ۇلتتىق قۇراما كاپيتانى اسلانبەك شىمبەرگەنوۆ (71 كگ), الەم چەمپيونى نۇربەك ورالباي (80 كگ) جانە 2018 جىلى ارگەنتينانىڭ بۋەنوس-ايرەس قالاسىندا ۇيىمداستىرىلعان جاسوسپىرىمدەر وليمپياداسىنىڭ جەڭىمپازى ايبەك ورالباي (92 كگ) جەڭىپ الدى.

وكىنىشكە قاراي ايەلدەر قۇراماسى ليتسەنزياعا قول جەتكىزە المادى.

«بوكستان يتالياداعى وليمپياداعا ىرىكتەۋ تۋرنيرىندە ءساتتى ونەر كورسەتىپ، پاريجدەگى ءدۇبىرلى دوداعا جولداما جەڭىپ العان بىلعارى قولعاپ شەبەرلەرىن قۇتتىقتايمىن. ەل جانكۇيەرلەرى قاشان دا بوكسشىلاردان ۇزدىك ناتيجە كۇتەدى. سىزدەر بۇل جولى جانكۇيەرلەردىڭ سەنىمىن اقتاپ، ۇلتتىق قۇراما قورجىنىن ماڭىزدى ليتسەنزيالارمەن تولىقتىردىڭىزدار. ەندى وليمپياداعا دايىندىقتى كۇشەيتىپ، پاريج تورىندە توپ جارۋلارىڭىزعا تىلەكتەسپىن»، دەدى ەرمەك مارجىقپاەۆ.

ايتا كەتەيىك، بارلىعى ەرلەر اراسىندا وليمپيادانىڭ 28, ايەلدەر اراسىندا 21 جولداماسى ۇلەستىرىلدى. ەسكە سالا كەتەيىك، بۇعان دەيىن بوكستان قازاقستان ەنشىسىندە ەكى جولداما بار ەدى. حانچجوۋداعى جازعى ازيا ويىندارىندا اسا اۋىر سالماقتاعى قامشىبەك قوڭقاباەۆ پەن كارينا يبراگيموۆا (57 كگ) پاريج وليمپياداسىنا بارۋعا مۇمكىندىك الىپ قويعان بولاتىن.

Abai.kz

0 پىكىر