«JORYQ» رەسپۋبليكالىق ات سپورتى فەدەراتسياسىنىڭ باسشىسى باقىتجان تۇرلىبەكوۆتىڭ قازاقستانداعى شەت ەل مەملەكەتتەرىنىڭ توتەنشە جانە وكىلەتتى ەلشىلەرىمەن كەزدەسۋ بارىسىندا كوماندالاردىڭ «ۇلى دالا جورىعى» مارافون-بايگەسىنە قاتىسۋ ماسەلەسىن تالقىلاۋ ودان ءارى جالعاسۋدا.

اتاپ ايتقاندا، ب.تۇرلىبەكوۆ ساۋد ارابياسى كورولدىگىنىڭ توتەنشە جانە وكىلەتتى ەلشىسى فايسال ءال-قاحتاني-مەن، يران يسلام رەسپۋبليكاسىنىڭ توتەنشە جانە وكىلەتتى ەلشىسى الي اكبار دجوۋكارمەن، قىرعىزستاننىڭ توتەنشە جانە وكىلەتتى ەلشىسى داستان ديۋشەكەەۆپەن، ​​سونداي-اق وزبەكستاننىڭ توتەنشە جانە وكىلەتتى ەلشىسى سايديكرام نيازحودجاەۆپەن جەكە كەزدەسۋ وتكىزدى.

كەزدەسۋلەر بارىسىندا الەمدە تەڭدەسى جوق «ۇلى دالا جورىعى» جوباسى تۋرالى ءسوز قوزعالىپ، 2024 جىلى ۇلتتىق سپورت قاۋىمداستىعىنىڭ قولداۋىمەن العاش رەت حالىقارالىق دەڭگەيدە وتەتىن مارافون-بايگەنىڭ ۇيىمداستىرۋ ماسەلەلەرى كەڭىنەن اڭگىمە بولدى. سونىمەن قاتار، قر سىرتقى ىستەر مينيسترلىگى حالىقارالىق ديپلوماتيالىق وكىلدىكتەر مەن ۇيىمدارمەن بايلانىس ورناتۋدا ەرەكشە قولداۋ كورسەتۋدە.

ب.تۇرلىبەكوۆ ديپلوماتتاردى ءوز ەلدەرىندەگى ات سپورتى فەدەراتسيالارىمەن تىعىز قارىم-قاتىناس ورناتۋعا جانە «ۇلى دالا جورىعىنا» قاتىساتىن كوماندالاردى جاساقتاۋعا كومەكتەسۋگە شاقىردى.

بيىل قازاقتىڭ اداي جانە قوستاناي جىلقى تۇقىمدارى الەمگە ايگىلى اراب تۇلپارلارىمەن، يراننىڭ «ساعيدار» جىلقىسىمەن، «قىرعىز» تۇقىمىمەن، وزبەكتىڭ «قارابايىر» جىلقىسىمەن، تۇرىكمەننىڭ اقىلتەكەسىمەن، موڭعول جىلقىسىمەن جانە الەمگە ايگىلى تاعى باسقا جىلقى تۇقىمدارىمەن كۇشى مەن توزىمدىلىگىن سىناۋ مۇمكىندىگىنە يە بولماق.

ءوز كەزەگىندە ساۋد ارابياسى، يران، قىرعىزستان جانە وزبەكستان ەلشىلەرى «JORYQ» ات سپورتى فەدەراتسياسىنىڭ بارلىق باستامالارىن قولداۋعا دايىن ەكەندىكتەرىن ءبىلدىردى.

«ۇلى دالا جورىعى» – جىلقى بالاسىنىڭ ەڭ مىقتى تۇقىمى انىقتالاتىن دالالىق لابوراتورياسى.

Abai.kz