تۇركىستاندا «Olympic Center» سپورت كەشەنىندە دزيۋدودان جاسوسپىرىمدەر اراسىندا قازاقستان رەسپۋبليكاسى چەمپيوناتى ءوز مارەسىنە جەتتى.

ەل بىرىنشىلىگىنە استانا، الماتى، شىمكەنت قالالارى مەن ەلىمىزدىڭ 17 وبلىسىنان بارلىعى 820 سپورتشى قاتىسىپ، ءوزارا مىقتىنى انىقتادى. جەكەلەي جارىستار ناتيجەسى بويىنشا تۇركىستان وبلىسىنىڭ كومانداسى 3 التىن، 1 كۇمىس جانە 1 قولا جۇلدەمەن جالپى مەدال كەستەسىندە كوش باستادى. ال جەتىسۋ وبلىسى 2 التىن، 2 كۇمىس جانە 4 قولا جۇلدەمەن ەكىنشى ورىنعا تۇراقتاسا، قىزىلوردا وبلىسى 2 التىن، 1 كۇمىس جانە 3 قولا جۇلدەمەن ۇزدىك ۇشتىكتى اياقتادى.

قازاقستان چەمپيوناتىنىڭ سوڭعى كۇنىندە ارالاس-كوماندالىق جارىستار ءوتتى. بارلىعى 19 كوماندا قاتىسقان باسەكەدە قىزىلوردا وبلىسىنىڭ قۇراماسى توپ جاردى. فينالدا قارسىلاسىنا جول بەرگەن الماتى وبلىسىنىڭ سپورتشىلارى ەكىنشى ورىنعا تۇراقتاسا، شىمكەنت قالاسى مەن اتىراۋ وبلىسىنىڭ قۇراما كوماندالارى ۇزدىك ۇشتىكتى تۇيىندەدى.

ايتا كەتەرلىگى، قازاقستان چەمپيوناتى 2007-2008 جىلدارى تۋعان جاسوسپىرىمدەر اراسىندا ءوتتى. اتالعان قازاقستان چەمپيوناتىنىڭ ناتيجەسىندە 2024 جىلعى سپورت ماۋسىمىندا ازيا جانە الەم چەمپيوناتى سىندى الەمدىك باسەكەلەردە ەل نامىسىن قورعايتىن دزيۋدودان قازاقستان جاسوسپىرىمدەر قۇراما كومانداسى جاساقتالادى.

(سۋرەتتەر قر اشىق دەرەككوزدەردەن الىندى)

Abai.kz