قازاقستاندا تۋريستىك بيزنەسكە مەملەكەتتىك قولداۋ شارالارى كورسەتىلەدى. تۋريزم جانە سپورت مينيسترلىگىنىڭ دەرەگىنشە، 2023 جىلدىڭ باسىنان بەرى تۋريزم سالاسىن قولداۋدىڭ ءارتۇرلى شارالارىنا جالپى سوماسى 760 ميلليون تەڭگەنى قۇرايتىن وتىنىمدەر ماقۇلداندى. بۇل 2022 جىلعى پيلوتتىق كورسەتكىشتەن 7 ەسە كوپ. بىلتىر قولداۋ شارالارىنىڭ جالپى سوماسى 104,4 ميلليون تەڭگەنى قۇراعان بولاتىن.

مەملەكەت شەتەلدىك تۋريستەر ءۇشىن تۋروپەراتورلاردىڭ شىعىنىن سۋبسيديالاپ كەلەدى. تۋروپەراتورعا بەرىلەتىن سۋبسيديا كولەمى ءار شەتەلدىك تۋريستكە 15 مىڭ تەڭگەنى قۇرايدى. 2023 جىلى 3600 شەتەلدىك تۋريست ءۇشىن جالپى سوماسى 54 ميلليون تەڭگەنىڭ ءوتىنىمى ماقۇلداندى. بىلتىر 6,3 ملن تەڭگەنى (421 شەتەلدىك تۋريست) قۇراعان بولاتىن.  ءبىر جىلدا سۋبسيديا كولەمىنىڭ 8 ەسە وسكەنىن كورە الامىز.

تابىستى جۇزەگە اسىپ جاتقان مەملەكەتتىك قولداۋ شارالارىنىڭ ءبىرى – Kids go Free باعدارلاماسى. 2023 جىلى 13 تۋريستىك كومپانيا Kids go Free بويىنشا 920 تۋردى جۇزەگە اسىردى. ساتىلعان تۋرلاردىڭ قۇنى بالالار اۋە بيلەتتەرىنىڭ قۇنىن قوسپاعاندا 458 ملن تەڭگەنى قۇرادى. 2 مىڭعا جۋىق بالا ءۇشىن جالپى سوماسى 89,4 ملن تەڭگەنى قۇرايتىن 920 ءوتىنىم ماقۇلداندى. وسىنشاما بالا ەل ىشىندە تەگىن ۇشتى. 2022 جىلى بۇل باعدارالما اياسىندا 1,5 مىڭ بالا تەگىن ۇشىپ، مەملەكەت 76,2 ملن تەڭگە سۋبسيديالاعان بولاتىن.

Kids go Free اياسىندا قازاقستاندىقتار الاكول، الماتى جانە ماڭعىستاۋ باعىتىندا كوپ ساياحاتتاعان. باعدارلامانى كەڭەيتۋ ماقساتىندا تاريحي-مادەني ورىندارعا تانىمدىق تۋرلار، وڭىرلەردەگى قولونەر شەبەرلەرىمەن شەبەرلىك ساباقتار جانە جوعارى سىنىپ وقۋشىلارىنا توپتىق تۋرلار، سونداي-اق بالالار مەن جاسوسپىرىمدەر سپورتىن دامىتۋ ءۇشىن بالالار مەن ولاردىڭ باپكەرلەرىنە ساپارلار ۇيىمداستىرۋ ۇسىنىلادى.

مەملەكەت تاۋ-شاڭعى كۋرورتتارىنا ساتىپ الىنعان قۇرال-جابدىقتار مەن تەحنيكالار قۇنىنىڭ 25 پايىزىن وتەيدى.  بىلتىر ەشقانداي ءوتىنىم تۇسپەگەنىمەن، 2023 جىلى 2,8 ملن تەڭگە سوماسىندا ەكى ءوتىنىم ماقۇلداندى. بۇل دا تاۋ-شاڭعى ءتۋريزمىن دامىتۋعا وڭ ىقپال ەتپەك.

بيىل تۋريستىك اۆتوبۋستار الۋ شىعىندارىن وتەۋ سوماسى دا ايتارلىقتاي وسكەن. ەلىمىزدە كەمىندە سەگىز ادامدىق تۋريستەرگە ارنالعان كولىكتەر قۇنىنىڭ 25 پايىزى مەملەكەت ەسەبىنەن وتەلەدى. بىلتىر 10,6 ملن تەڭگە سوماسىندا ەكى ءوتىنىم عانا ماقۇلدانسا، بيىل التى ءوتىنىم (50 ملن تەڭگە) ماقۇلداندى. بۇل بىلتىرعى كورسەتكىشتەن بەس ەسە كوپ.

قازاقستاندا جول بويىنداعى قىزمەت كورسەتۋ نىساندارىنىڭ قۇرىلىسىنا كەتكەن شىعىننىڭ 10 پايىزى وتەلەدى. بىلتىر مۇنداي بىردە-ءبىر ءوتىنىم كەلىپ تۇسپەگەن. ال 2023 جىلى جەرگىلىكتى اتقارۋشى ورگاندار جالپى سوماسى 355 ملن تەڭگەنى قۇرايتىن 10 ءوتىنىمدى ماقۇلدادى.

جول بويىنداعى دارەتحانالاردى ۇستاپ تۇرۋعا بەرىلەتىن اي سايىنعى سۋبسيديا كولەمى 83 300 مىڭ تەڭگەنى قۇرايدى. بيىل سانيتارلىق بەكەتتەر سانى 4 ەسە ارتتى. 2023 جىلى 86 ءوتىنىم ماقۇلدانسا، 2022 جىلى 20 نىساندى قۇراعان بولاتىن.

سونداي-اق، تۋريستىك نىساندار قۇرىلىسى مەن قايتا قۇرۋ شىعىندارىنىڭ 10 پايىزى وتەلەدى. بىلتىر رەسپۋبليكالىق بيۋدجەتتەن ءبىر عانا ءوتىنىم ماقۇلدانسا، بيىل جالپى سوماسى 181,6 ملن تەڭگەنى قۇرايتىن 11 ءوتىنىم ماقۇلدانعان.

قازاقستاندا 2029 جىلعا قاراي ىشكى تۋريستەر سانىن 11 ملن ادامعا، ال شەتەلدىك تۋريستەر سانىن 4 ملن ادامعا جەتكىزۋ جوسپارلانعان. بۇل كورسەتكىشكە جەتۋ ءۇشىن تۋريزم يندۋسترياسىن دامىتۋعا باعىتتالعان مەملەكەتتىك قولداۋ شارالارى جالعاسىن تابا بەرەدى.

Abai.kz