بۇگىن يزرايل مەن حاماس اراسىنداعى 4 كۇندىك ءبىتىمنىڭ سوڭعى كۇنى. ۋاقىتشا ءبىتىم جالعاستى بولا ما؟

يزرايل پرەمەرى بەنيامين نەتانياحۋ: «گازا سەكتورىنداعى ءبىتىمدى سوزىپ قالۋىمىز ىقتيمال»، – دەپ مالىمدەدى. بۇل راسىمەن سولاي ما، الدە ەكى تاراپتىڭ دا تامىرىن باسىپ كورۋ ءادىسى مە؟ بۇعان قاتىستى الەم ءھام قازاقستان نە دەيدى؟

بۇعان دەيىن قازاقستان بيلىگى گازا تۇرعىندارىنا گۋمانيتارلىق كومەك رەتىندە 1 ملن دوللار بەرەتىنىن جاريا ەتكەن جانە يزرايل-حاماس تەكەتىرەسىنە قاتىستى بىرنەشە مارتە رەسمي مالىمدەمە جاساپ، «ەكى حالىق – ەكى مەملەكەت» فورمۋلاسىن قولدايتىنىن ايتقان.

جاقىندا مينسكىدە وتكەن ۇقشۇ سامميتىندە وزىنە ءسوز تيگەن شاقتا قازاقستان پرەزيدەنتى قاسىم-جومارت توقاەۆ يزرايل-حاماس (قۇدىس) قاقتىعىسىنا قاتىستى تاعى رەسمي مالىمدەمە جاسادى.

 «تاياۋ شىعىستاعى كونفليكت ءوز قۇردىمىنا بارشانى تارتىپ، تەڭدەسى جوق اقپاراتتىق-يدەولوگيالىق قارسى تۇرۋدى تۋعىزىپ وتىر. گازا سەكتورىنداعى جاعداي الەمدىك قاۋىمداستىقتى قاققا جاردى. سوعىس ءورتى بارشا ەلدەر مەن قۇرلىقتاردى شارپىماس ءۇشىن توقتاۋىمىز كەرەك»، - دەي كەلە، بۇۇ باس بولىپ، قۇدىستىقتاردىڭ قۇقىعىن قورعاۋ ءۇشىن «ەكى حالىق ءۇشىن ەكى مەملەكەت» فورمۋلاسى تۇيىندەلۋگە تيىستىگىن العا تارتتى.

ودان ارى:

«قالىپتاسىپ وتىرعان شيەلەنىستى جاعدايعا بايلانىستى بۇۇ قاۋىپسىزدىك كەڭەسىنىڭ رەزوليۋتسيالارى مەن حالىقارالىق قۇقىق نورمالارى ساقتالۋعا ءتيىس»، - دەدى.

بۇگىن تاراپتار كەلىسىم بويىنشا بوساتىلۋى كەرەك تۇتقىنداردىڭ سوڭعى لەگىن جىبەرۋى كەرەك. كەلىسىم بويىنشا حاماس ءيزرايلدىڭ 50 تۇتقىنىن، يزرايل 150 قۇدىستىق تۇتقىندى بوساتۋى ءتيىس. وسىعان دەيىنگى 3 كۇندە حاماس 39 يزرايلدىك تۇتقىندى، يزرايل 117 قۇدىستىق تۇتقىندى بوساتتى. ەندى قالعانى 11 يزرايلدىك جانە 33 قۇدىستىق تۇتقىن كىسەننەن شىعۋى ءتيىس.

Abai.kz