كەشە فۋتبولدان 2024 جىلعى ەۋروپا چەمپيوناتىنا ىرىكتەۋ ساتىسىنىڭ فينالدىق تۋرىندا قازاقستان كومانداسى سلوۆەنيامەن سىرت الاڭدا باق سىناستى.

وكىنىشكە وراي قازاقستان ەۋروپا چەمپيوناتىندا ويىن كورسەتۋ مۇمكىندىگىنەن ايرىلىپ قالدى. سلوۆەنيا كومانداسىنان 1:2 ەسەبىمەن جەڭىلدى. دەگەنمەن ءۇمىت وشپەيدى، ويتكەنى قيىن دا بولسا ۇلتتار ليگاسى ارقىلى ەۋروپا چەمپيوناتىنا شىعۋعا مۇمكىندىك بار. ول ءۇشىن قازاق اياق دوپشىلارى 2024 جىلدىڭ ناۋرىز ايىندا گرەكيامەن الاڭدا كەزدەسۋى كەرەك…

سلوۆەنيانىڭ ليۋبليان قالاسىندا وتكەن ماتچتى قازاقستاندىقتار اسىعا كۇتتى. العاشقى مينۋتتان سلوۆەنيالىق فۋتبولشىلاردىڭ باسىمدىعى بايقالسا دا، قازاقستاندىق قۇراما ولارعا لايىقتى قارسىلىق كورسەتە ءبىلدى. جارىستىڭ 40-مينۋتىندا يان ۆوروگوۆسكي سارى قاعاز الدى. 41-مينۋتتا يگور شاتسكيدىڭ قاقپاسىنا پەنالتي بەلگىلەندى، 20 جاستاعى بەنيامين شەشكو گول سالدى. سونىمەن ءبىرىنشى تايم ءبىتتى. ەكىنىشى تايمدا رامازان ورازوۆ قارسىلاس كوماندا قاقپاسىنا ءبىر گول سالىپ، ەكى جاق تەڭەستى. ويىننىڭ 86-شى مينۋتىندا سلوۆەنيالىق بەنيامين ۆەربيچ وزا شاۋىپ، كومانداسىنا جەڭىس الىپ بەردى.

وسىلايشا ويىن قازاقستاندىقتار ءۇشىن جەڭىلىسپەن اياقتالدى. قۇرلىقتىق دودانىڭ كەلەسى ساتىسىنا سلوۆەنيا قۇراماسى جولداما الدى.

ايتا كەتەيىك، بۇعان دەيىن قۇرلىقتىق دودا ىرىكتەۋ كەزىندە قازاقستاندىق فۋتبولشىلار دانيا مەن فينليانديا قۇرامالارىن ءبىر رەت، Cولتۇستىك يرلانديا مەن سان-مارينو قۇرامالارىن ەكى رەت جەڭگەن.

قازاقستاندىق فۋتبولشىلار ەۋروپا چەمپيوناتى ىرىكتەۋ ساتىسىندا بەسىنشى مارتە باق سىناپ وتىر. 2008, 2012 جىلداردا - 6, 2016, 2020 جىلداردا - 5 ورىن الدى.

قازىرگە دەيىن قۇرلىقتىق دودانىڭ فينالدىق ساتىسىنا فرانتسيا، پورتۋگاليا، بەلگيا، يسپانيا، شوتلانديا، تۇركيا، انگليا، اۋستريا، ۆەنگريا، سلوۆاكيا، البانيا، دانيا، نيدەرلاند، شۆەيتساريا، رۋمىنيا، سەربيا قۇرامالارى شىقتى. ال گەرمانيا ۇيىمداستىرۋشى ەل رەتىندە ىرىكتەۋسىز قاتىسادى.

Abai.kz