جۇما, 1 ناۋرىز 2024
اقيقاتقا قيانات 1710 22 پىكىر 14 قاراشا, 2023 ساعات 17:09

اشارشىلىقتىڭ گولودوموردان نەسى كەم؟

كوللاج الەۋمەتتىك جەلىدەن الىندى

ۋكراينانىڭ اقش-تاعى ەلشىسى وكسانا ماركاروۆا ءوزىنىڭ Facebook الەۋمەتتىك جەلىسىندەگى پاراقشاسىندا امەريكانىڭ ۆايومينگ شتاتى 1932-1933 جىلدارداعى گولودوموردى ۋكراين حالقىنا جاسالعان گەنوتسيد دەپ مويىنداعانىن جازدى. ول ۆايومينگ شتاتىنىڭ قاراشا ايىن ۋكرايناداعى گولودومور-گەنوتسيدتى ەسكە الۋ ايى دەپ جاريالاعانىن ايتتى.

ماركاروۆا دۇنيەجۇزىندەگى ۋكرايندىقتاردىڭ ءدۇستۇرلى تۇردە قاراشانىڭ ءتورتىنشى سەنبىسى سايىن گولودوموردا قازا تاپقانداردى ەسكە الىپ، شىراق جاعاتىنىن اتاپ ءوتتى.

«بۇل ۋاقىت بيىل قاراشانىڭ 25-ىنە كەلەدى. مەن الەمدەگى بارشا ۋكرايندىقتى قاراشانىڭ 25-ءى كۇنى ساعات 16:30-دا ۆاشيڭتونداعى  گولودومور قۇرباندارى مەموريالىنىڭ جانىندا وتەتىن گولودومور قۇرباندارىن ەسكە الۋ راسىمىنە قاتىسۋعا شاقىرامىن»، - دەپ جازدى ۋكراينا ەلشىسى.

ەسكە سالا كەتەيىك، كەڭەستىڭ قاڭدى قول ۇكىمەتى سولاقاي ساياسات ۇستانىپ، وتكەن عاسىردىڭ ەكىنشى، ءۇشىنشى ون جىلدىعىندا قازاقستان مەن ۋكراينا جەرىندە جاپپاي اشتىق  ورناتقان ەدى.

2016 جىلى ۋكراينانىڭ جوعارعى راداسى دەموكراتيالىق مەملەكەتتەرگە 1932-1933 جىلدارداعى گولودوموردى ۋكراين حالقىنىڭ گەنوتسيدى دەپ تانۋ تۋرالى وتىنىشپەن جۇگىندى. ۋكراينانىڭ «رەيتينگ» سوتسيولوگيالىق توبىنىڭ 2022 جىلدىڭ قاراشاسىندا جۇرگىزگەن زەرتتەۋىنە سايكەس، ۋكرايندىقتاردىڭ 93 پايىزى 1932–1933 جىلدارداعى گولودوموردى ۋكراين حالقىنىڭ گەنوتسيدى دەپ سانايدى. گولودومور كەزىندە شامامەن 3,5 ميلليون مەن 5 ميلليون اراسىندا ادام قىرىلىپ قالدى دەپ ەسەپتەلەدى.

كوزىنە قان تولعان پۋتين باسشىلىق ەتەتىن رەسەي ۋكرايناعا باسقىنشىلىق جاساعانعا دەيىن دە اۆستراليا، گرۋزيا، ەكۆادور، ەستونيا، كانادا، كولۋمبيا، لاتۆيا، ليتۆا، مەكسيكا، پاراگۆاي، پەرۋ، پولشا، اقش، ۆەنگريا، پورتۋگاليا، سونىمەن قاتار ۆاتيكان سەكىلدى مەملەكەتتەر گولودوموردى ۋكرايندىقتارعا جاسالعان گەنوتسيد دەپ تانىعان. ال 2022–2023 جىلدارى گولودوموردى گەنوتسيد دەپ تانۋ پروتسەسى ۇدەي ءتۇستى. اتاپ ايتقاندا،  چەحيا، بەلگيا، مولدوۆا، يرلانديا، گەرمانيا، يسلانديا، فرانتسيا، سلوۆەنيا، ۇلىبريتانيا، ليۋكسەمبۋرگ، حورۆاتيا، يتاليا، ۋەلس ەلدەرى سونداي-اق ەۋروپارلامەنت پەن پاسە گولودوموردى ۋكرايندىقتارعا جاسالعان گەنوتسيد دەپ باعالادى.

ءدال سول جىلدارى قازاقستاندا دا جاپپاي اشتىق قولدان ۇيىمداستىرىلدى. سول كەزدە قىرىلىپ قالعان قازاقتىڭ سانى ءالى دە تۇگەندەلىپ جاتىر. ماسەلەن، قازاقستاننىڭ حالىق جازۋشىسى سماعۇل ەلۋباي  1992 جىلعى اشارشىلىقتى زەرتتەۋ جونىندەگى كوميسسيا 1931-1932 جىلعى اشارشىلىقتا 2,3 ملن ادام قىرىلدى دەپ مالىمدەگەنىن جانە وعان الدىنداعى ەكى اشارشىلىقتا قىرىلعاندار سانىن قوسقاندا 5 ملن 200 مىڭ ادام بولاتىنىن ايتتى.

ال ءبىز كەڭەس ۇكىمەتىنىڭ جاپپاي اشتىقتى قازاق حالقىنا قارسى قولدان ۇيىمداستىرعانىن جانە مۇنىڭ گەنوتسيد ەكەنىن الەمگە قاشان مويىنداتامىز؟

Abai.kz

22 پىكىر

ۇزدىك ماتەريالدار