بۇگىنگى رەسەي وردا بوداۋىنداعى رەسەيگە ۇقسايدى. ول كەزدە ورىس كنيازدەرى باتىسقا قارسى تۇرۋ ءۇشىن وردا حاندارىنا تاعزىم ەتىپ، بيلىك جۇرگىزگەنى ءۇشىن پارمەن الدى. رەسەي فەدەراتسياسىنىڭ قوعامدىق پالاتاسىنىڭ مۇشەلەرىمەن كەزدەسۋىندە: «ءدال قازىر وسىنداي جاعداي بۇگىنگى رەسەيدە دە بولىپ جاتىر»، - دەدى رەسەي پرەزيدەنتى پۋتين.

پۋتين كارلى يۆاننىڭ كەزىندە دارىپتەلىپ، ال 2016 جىلى ورىس پراۆوسلاۆ شىركەۋى «قۇرلىقتاعى اسكەرلەردىڭ مەتسەناتى» رەتىندە «تاعايىندالعان» الەكساندر نەۆسكيدى مىسال رەتىندە كەلتىردى.

«ول ورداعا بارىپ، وردا حاندارىنا تاعزىم ەتتى. ەڭ الدىمەن، باتىستىڭ شاپقىنشىلىعىنا قاسقايا قارسى تۇرۋ ءۇشىن بيلىك ەتۋ قۇزىرىن الدى. نەلىكتەن؟ ويتكەنى وردا ءوزىن قانشا جەردەن وركوكىرەك، قاتىگەزدىكپەن ۇستاسا دا، ەڭ باستىسى – تىلىمىزگە، سالت-داستۇرىمىزگە، مادەنيەتىمىزگە اسەر ەتكەن جوق. ال، باتىس ءبىزدى جاۋلاپ السا بۇلاي ەتپەيتىن ەدى»، – دەدى پۋتين. ول نەۆسكيدى وسى تاڭداۋى ءۇشىن اۋليە رەتىندە قۇرمەتتەيتىندىگىن العا تارتتى.

«بۇگىن دە ءدال سول كەزدەگىدەي بولىپ جاتىر»، - دەپ، ويىن جالعاستىردى پرەزيدەنت. «ءبىز ءوزىمىزدىڭ مورالدىق قۇندىلىقتارىمىزدى، تاريحىمىزدى، مادەنيەتىمىزدى، ءتىلىمىزدى، سونىڭ ىشىندە دونباسس پەن نوۆوروسسياداعى باۋىرلاستارىمىزعا كومەكتەسۋ ارقىلى قورعايتىنىمىزدى ايتامىز. بۇل دەگەنىمىز – تۇپتەپ كەلگەندە بۇگىنگى ورىن الىپ جاتقان وقيعالاردىڭ كىلتى».

پۋتين رەسەيدىڭ جاقىن ارادا «ۇلتتىق بىرلىك» كۇنىن اتاپ وتەتىنىن ەسكە سالدى.  «2005 جىلى 1917 جىلعى كەڭەستىك رەۆوليۋتسيا كۇنىن الماستىرعان بۇل مەرەكە قازىر رەسمي تۇردە 1612 جىلى ماسكەۋدى پولياك باسقىنشىلارىنان ازات ەتۋ مەيرامى بولىپ تابىلادى. 17 عاسىرداعى وقيعالار «سالىستىرمالى تۇردە تىم ۇزاق ۋاقىت ەمەس»، - دەدى پۋتين: «400 جىل دەگەن نە؟ ۋاقىت وتە جىلدام وتەدى. ول ءۇشىن بەس-التى ۇرپاق اۋىسۋى قاجەت».

ءپۋتيننىڭ بار ايتاق بولعانىنىڭ ءتۇيىنى: «بۇگىنگى كۇنى دە سولاي بولادى» دەگەندى بىلدىرەدى. وسى ورايدا تۇركى مەملەكەتتەرى ۇيىمىنىڭ ەلدەرىنە قاتىستى رەسەي ديپلوماتياسىنىڭ باسقاشا قادام جاساۋى سوندا نەنى بىلدىرمەك دەگەن ورىندى ساۋال تۋىندايدى.

كەرىمسال جۇباتقانوۆ

Abai.kz