رەسەيدى بۇل جولى ويباعا باستىرعان ەلىمىزدىڭ سانكتسياعا بايلانىستى اسكەري قيمىلدارعا پايدالانىلۋعا كادەگە جاراپ كەتەتىن 106 تاۋار ءتۇرىن رەسەيگە ساتۋعا تىيىم سالعانى بولدى دەپ جازادى باق.

قازاقستان رەسپۋبليكاسى ساۋدا جانە ينتەگراتسيا ءمينيسترىنىڭ ورىنباسارى قايرات تورەباەۆ بۇل تۋراسىندا: «ءبىز سوعىسقا قاتىستى شەكتەۋ قويىلعان تاۋارلاردان باسقاسىنىڭ ءبارىن ەكسپورتتايمىز، ال، ونداي 106 تاۋار اتاۋىنا تولىقتاي تىيىم سالدىق»، - دەپ مالىمدەدى.

تىيىم سالىنعان تاۋارلار قاتارىنا ەلەكتر چيپتەرى مەن ءتۇرلى ەلەكتروندى قۇرالدار جاتادى. تورەباەۆ بۇل تىيىم تەك ەكسپورتقا عانا قاتىستى، يمپورتقا بارىنە رۇقسات بەرىلگەن دەپ اتاپ كورسەتتى.

«OCCRP» (جەمقورلىق پەن ۇيىمداسقان قىلمىستى زەرتتەۋ ورتالىعى) مەن «Der Spiegel» بيىلعى مامىر ايىندا: «ۋكرايناداعى سوعىسقا بايلانىستى سانكتسيا سالىنعاننان كەيىن، رەسەي چيپتەر مەن درونداردى قازاق كومپانيالارىنان ساتىپ الۋدا» دەپ، ءوز جۇرگىزگەن زەرتتەۋلەرىن جاريا ەتكەن ەدى.

ەندى باتىستىڭ كارىنە ىلىكپەس ءۇشىن قازاق جاعى قوسار پايدالانىمداعى تاۋارلاردىڭ ءتىزىمىن جاساپ، رەسەيگە جاردەمدەسۋدەسىڭدەر دەۋشىلەردىڭ اۋزىنا قۇم قۇيدى.

بۇل رەسەيگە جاقپاي، ورىس باق-تارى: «قازاقتار تاعى ارتىمىزدان قانجار سالدى»، - دەپ ويبايعا باسۋدا.

تاقىرىپقا تۇزدىق:

بۇگىن قر ساۋدا جانە ينتەگراتسيا ءمينيسترى قايتا مالىمدەمە جاساپ، ءوز ورىنباسارىنىڭ اقپاراتىن تەرىستەپ سويلەدى.

قازاقستاننىڭ ساۋدا جانە ينتەگراتسيا مينيسترلىگى قازاقستان رەسەيگە سوعىستا قولدانۋعا بولاتىن 106 تاۋار ءتۇرىن ەكسپورتتاۋعا شەكتەۋ قويعانى جونىندە بۇعان دەيىن بىرقاتار باق تاراتقان اقپارات جاڭساق ەكەنىن حابارلادى.

مينيسترلىك قازاقستان مەن رەسەيدىڭ ساۋدا قاتىناسىن رەتتەۋ ەۋرازيا ەكونوميكا وداعى تۋرالى شارت ەرەجەسىنە سايكەس جۇرگىزىلەتىنىن ايتتى.

«رەسەيگە قارسى سانكتسيالارعا قاتىستى ول ەلگە كەز كەلگەن تاۋاردى ەكسپورتتاۋعا تىيىم سالىنباعان. بۇل رەتتە ەكسپورتتىق باقىلاۋعا جاتاتىن «قوس ماقساتتاعى» تاۋارلار ساۋداسى قازاقستاننىڭ حالىقارالىق مىندەتتەمەلەرىنە سايكەس جۇزەگە اسىرىلادى. قازاقستان زاڭىنا سايكەس، مۇنداي تاۋارلارعا قاتىستى ەكسپورت، يمپورت جانە ترانزيت كەزىندە ءتيىستى ليتسەنزيا الۋ قاجەت»، - دەپ جازعان مينيسترلىك.

Abai.kz