قازاقستان سپورتشىلارى قىتايدىڭ حانجوۋ قالاسىندا ءوتىپ جاتقان جازعى ازيا ويىندارىندا سەگىزىنشى التىندى جەڭىپ الدى.

سەگىزىنشى التىن - نۇرقانات اجىقانوۆ

بۇگىن كاراتە كۋميتەدەن نۇرقانات اجىقانوۆ 75 كەلىدە ازيا ويىندارىنىڭ چەمپيونى اتاندى. ول فينالدا يوردانيالىق حاسان ماسارۋەحتى 8:0 ەسەبىمەن ۋاقىتىنان بۇرىن جەڭدى.

جەتىنشى التىن - نۇرجان باتىربەكوۆ

قازاقستاندىق سپورتشى نۇرجان باتىربەكوۆ حانچجوۋدا ءوتىپ جاتقان ازيا ويىندارىنىڭ التىن مەدالىن جەڭىپ الدى.

69 كەلىگە دەيىنگى سالماقتا ونەر كورسەتكەن وتانداسىمىز فينالدا ءباا كەلگەن قارسىلاسى مۇحاممەد ءال-ءسۋۆايديدى 4:2 ەسەبىمەن جەڭدى. بۇل ازيا ويىندارىندا قازاقستان قۇراماسىنىڭ جەتىنشى التىن مەدالى.

التىنشى التىن - ەۆگەني فەدوروۆ

سونىمەن قاتار ۇلتتىق قۇراما سپورتشىلارى ۆەلوجارىستىڭ توپتىق سايىسىندا ەۆگەني فەدوروۆ التىن، الەكسەي لۋتسەنكو كۇمىس مەدال جەڭىپ الدى.

بەسىنشى التىن - الەكسەي لۋتسەنكو

لۋتسەنكو بۇعان دەيىن 39,7 شاقىرىمعا سوزىلعان جەكەلەي ەسەپ سايىسىندا وزىق شىعىپ، التىن مەدال جەڭىپ العان بولاتىن.

الەكسەي 39,7 كم قاشىقتىقتى 48:05.75 سەكۋندتە باعىندىردى. قىتايلىق سپورتشى 50:05.83 سەكۋند، گونكونگتان كەلگەن ۆەلوشاباندوزدىڭ كورسەتكىشى – 50:17.76 سەكۋند بولدى.

الەكسەي لۋتسەنكو 2014 جانە 2018 جىلدارى دا ازيادا چەمپيونى اتانعان.

ءتورتىنشى التىن - سەرگەي ەمەليانوۆ، تيمۋر حايداروۆ

ال ءتورتىنشى التىن مەدالدى قازاق ەلىنە ەسكەكشىلەر سەرگەي ەمەليانوۆ پەن تيمۋر حايداروۆ الىپ بەردى.

قازاقستاندىق ەسكەكشىلەر كانوەدا 500 مەتر قاشىقتىقتا سىنعا ءتۇسىپ، 1:49.010 كورسەتكىشپەن مارە سىزىعىن ءبىرىنشى بولىپ قيدى.

جاپونيالىق، يراندىق ەسكەكشىلەر ەكىنشى، ءۇشىنشى ورىندى الدى.

ءۇشىنشى التىن - اسەم ورىنباي، ەدۋارد ەششەنكو

قازاقستاندىق اسەم ورىنباي مەن ەدۋارد ەششەنكو ستەندتىك اتۋ ءتۋرنيرىنىڭ ارالاس جۇپتىق سايىسىندا التىن مەدالدى جەڭىپ الدى.

تۋريزم جانە سپورت مينيسترلىگى ءمالىم ەتكەندەي، «سكيت» جاتتىعۋىنىڭ فينالىندا قازاقستاندىقتار كۋۆەيتتەن كەلگەن قارسىلاستارىنان وزىق بولدى. قورىتىندى ەسەپ – 40:35. بۇل – ازياداداعى ەلىمىزدىڭ ۇلتتىق قۇراماسى ءۇشىن ءۇشىنشى التىن مەدال.

ەكىنشى التىن - زۋحرا يرنازاروۆا

ەكىنشى التىن مەدالدى 10 مەتر قاشىقتىقتان جىلجىمالى نىساناعا وق اتۋ سايىسىندا 18 جاستاعى زۋحرا يرنازاروۆا ۇتىپ الدى. وتانداسىمىز 560 ۇپاي جيناپ، سولتۇستىك كورەيادان كەلگەن ەكى مەرگەننەن وزىپ كەتتى.

ەڭ العاشقى التىندى دا قىزدارىمىز الىپ بەرگەن.

العاشقى التىن - اسەم ورىنباي، زويا كراۆچەنكو، ولگا پانارينا

ستەند اتۋدان سكيت باعدارلاماسى بويىنشا سىنعا تۇسكەن ايەلدەر قۇراماسى اسەم ورىنباي، زويا كراۆچەنكو، ولگا پانارينا چەمپيون اتاندى.

ايتا كەتەيىك، وتاندىق مەرگەندەر ءبىرىنشى ورىنعا يە بولىپ قانا قويماي، جالپى 350 بالل جيناپ، ازيادا رەكوردىن ورناتتى. ولار قىتاي (348 ۇپاي) جانە تايلاند (342 ۇپاي) كوماندالارىنان وزىپ كەتكەن ەدى.

Abai.kz