قازاقستان بوكس فەدەراتسياسىنىڭ باسشىسى كەڭەس راقىشوۆ حانچجوۋدا ءوتىپ جاتقان ازيا ويىندارىنداعى قازاقستان بوكسشىلارىنا قاتىستى تورەشىلىك ادىلەتسىزدىكتەر جايلى رەسمي پىكىر ءبىلدىردى.

ول كەشەلى-بەرى اقپاراتتىق حابارلا رەتىندە بىرنەشە جازبا جاريالادى. ءبىز اتالعان جازبالاردى Abai.kz وقىرماندارىنا ۇسىنىپ وتىرمىز.

(سۋرەتتەر الەۋمەتتىك جەلىدەن الىندى)

تورەشىلەردىڭ ازيا ويىندارى تاريحىنداعى ەڭ ادىلەتسىز شەشىمى!

كەڭەس راقىشەۆ:

- قۇرمەتتى جانكۇيەرلەر، الەم چەمپيونى، قازاقستان قۇراماسىنىڭ كاپيتانى اسلانبەك شىمبەرگەنوۆتىڭ جارتىلاي فينالدىق كەزدەسۋىندە تورەشىلەردىڭ اسا ادىلەتسىز شەشىمىنە قاتىستى ورەسكەل وقيعا ورىن الدى. شىمبەرگەنوۆ بۇكىل جەكپە-جەك بويى جاپونيالىق سەۆون وكازاۆانى سوققىنىڭ استىنا الدى. جۇدىرىقتارى قارسىلاسقا ءدال ءتيىپ جاتتى. بارلىق جاعىنان مىقتىراق ءارى باسىمىراق بولدى. بىراق ولار شىمبەرگەنوۆتىڭ قارسىلاسىنىڭ قولىن كوتەردى...

حالىقارالىق وليمپيادا كوميتەتى IBA-داعى تورەشىلىككە قاتىستى ءاردايىم شاعىم ءبىلدىرىپ كەلگەن ەدى، بىراق حانچجوۋداعى ازيا ويىندارىنىڭ جارتىلاي فينالىندا بولعان وقيعا تىم شەكتەن شىعىپ كەتتى.

وسىعان بايلانىستى قازاقستان بوكس فەدەراتسياسى ازيا ويىندارى بويىنشا حوك تورەشىسىنە ءوز تالاپتارىن رەسمي تۇردە بىلدىرەدى. بۇل رەتتە ءتۋرنيردىڭ ەڭ مىقتى بوكسشىلارى ءبىزدىڭ بىلعارى قولعاپ شەبەرلەرىمەن بىردەي جەرەبەگە ءتۇسۋى، جالپى جەرەبەنىڭ وتكىزىلۋ رەتى، تورەشىلەردىڭ جۇمىسىنا سۇراقتار تۋىنداتتى. ال جەرگىلىكتى بوكسشىلارعا «قىزىل كىلەم» توسەلدى...

حوك قامقورلىعىنداعى تۋرنيرلەردە تورەشىلەر شەشىمىنە نارازىلىقتار مەن شاعىمداردى بەرۋگە بولمايدى. قازاقستان - بوكس دەرجاۆاسى، بوكستىڭ كوشباسشىسى رەتىندە رينگتەگى مۇنداي ادىلەتسىزدىك فاكتىلەرىمەن كەلىسە المايدى.

مەن ءوز تاراپىمنان اسلانبەك شىمبەرگەنوۆكە جەكە قولداۋ بىلدىرەمىن! مۇنداي فاكتىلەر كاپيتانىمىزدى سىندىرمايدى، ەڭسەسىن تۇسىرمەيدى دەپ سەنەمىن، جانە ول بوكستان ەڭ ماڭىزدى حالىقارالىق تۋرنيرلەردە قازاقستان تۋىن بيىكتە جەلبىرەتەدى دەپ ويلايمىن!

قامشىبەك قوڭقاباەۆ وليمپياداعا بارادى!

قازاقستان قۇراماسىنىڭ ەڭ تاجىريبەلى ءارى ەڭ اۋىر بوكسشىسى ازيا ويىندارىنىڭ فينالىنا شىقتى. جارتىلاي فينالدا ول ءۇندىستاننىڭ وتە مىقتى بىلعارى قولعاپ شەبەرىن جەڭدى. ەندى ءبىزدىڭ چەمپيونىمىز ءوز شەبەرلىگىن فينالدا پاش ەتەدى.

مەن قامشىبەكتى وسى جەڭىسىمەن قۇتتىقتايمىن! ول دەڭگەيى وتە جوعارى بوكسشى. جانكۇيەرلەردى قۋانتتى!

ەندى بايىرعى قارسىلاسى باحودير جالولوۆقا قارسى وتەتىن فينالدا جەڭىس تىلەيمىن.

اسلانبەك شىمبەرگەنوۆ – قازاقتىڭ ناعىز باتىرى!

حالقىمىز ءوز بوكسشىلارىن قولدايدى! بۇل ءۇشىن سىزدەرگە كوپ راحمەت!

بارشا قازاقستاندىق جانكۇيەرلەرمەن بىرگە مەن اسلانبەك شىمبەرگەنوۆكە قولداۋ كورسەتەمىن. ەلگە ورالعان سوڭ اسلانبەككە ءوز اتىمنان اۆتوكولىك سىيلايمىن. اسلانبەك شىمبەرگەنوۆ – قازاقتىڭ ناعىز باتىرى!

كارينا يبراگيموۆا ازيا ويىندارىنىڭ فينالىندا!

ءبىزدىڭ سپورتشىمىز تاجىكستان وكىلىمەن وتكەن كەزدەسۋدە جوعارى دارەجەدە ونەر كورسەتتى جانە كوپ ۇزاماي حانچجوۋدا تورىندە قازاقستاننىڭ ءانۇرانىن شىرقاتۋ قۇقىعى ءۇشىن باق سىنايدى. قۇتتىقتايمىن، كارينا. باستى كەزدەسۋ الدا. ىسكە ءسات!

Abai.kz