اباي وبلىسىندا بولعان ورتكە بايلانىستى ونىڭ زاردابىن جويۋعا بۇكىل ەل تۇرعىندارى اتسالىسىپ، قولى ۇزىندار ءوز تاراپىنان گۋمانيتارلىق كومەك بەرە باستادى. سەمەي وڭىرىنە كەلىپ جاتقان گۋمانيتارلىق كومەكتى جيناۋ مەن ءبولۋدى ءۇي لەستىرۋمەن «Amanat» پارتياسى، ەرىكتىلەردىڭ ۇلتتىق جەلىسى، سونداي-اق «اق ەرتىس» قوعامدىق قورى اينالىسۋدا.

اباي وبلىسى اكىمىنىڭ ءباسپاسوز ورتالىعىنىڭ حابارلاۋىنشا: «ەلىمىزدىڭ جانە وبلىستىڭ بارلىق وڭىرلەرىنەن ازىق-تۇلىك پەن قاجەتتى زاتتار اكەلىنۋدە. ورمان ءورتى وقشاۋلانعاندىقتان، قازىرگى كەزدە ازىق-تۇلىك تولىق جەتكىلىكتى.

مىسالى، تەك اۋىز سۋ 30 مىڭ ليتردەن اسىپ ءتۇستى. سونداي-اق، 2 توننادان استام ەت جانە 44 توننا ۇن، ماكارون، كۇنباعىس مايى، كونسەرۆىلەر مەن شۇجىقتار، ءسۇت، شاي، كونديتەرلىك ونىمدەر سياقتى ازىق-تۇلىكتەر جەتكىزىلىپ وتىر».

وبلىستىق ءماسليحات توراعاسى قۋانىش سۇلەيمەنوۆ وسىعان قاتىستى: «تج كەزىندە اباي وبلىسىنا كومەك قولىن سوزعانداردىڭ بارلىعىنا راقمەت. ءبىزدىڭ وبلىسىمىزدىڭ ءاربىر اۋدانى، ەلىمىزدىڭ ءاربىر وبلىسى قول ۇشىن سوزىپ، بىزگە كومەك كورسەتتى. بۇگىن ءورتتىڭ بەتى قايتقان كەزدە بارشاڭىزعا ۇلكەن العىسىمىزدى بىلدىرەمىز جانە ازىق-تۇلىك پەن ءبىرىنشى كەزەكتە قاجەتتى زاتتاردى قابىلداۋ توقتاتىلاتىنىن جاريالايمىز»، - دەدى.

ودان ءارى ءماسليحات توراعاسى: «بۇل ماسەلەمەن «اق ەرتىس» قورى اينالىسادى. بارلىق ونىمدەر تىزىمدەمەمەن قابىلدانىپ، بەرىلەدى. جاقىن كۇندەرى بۇل ازىق-تۇلىكتەر ءورت سوندىرۋشىلەر مەن اسكەريلەرگە جەتكىزىلەتىن بولادى. ەگەر قانداي دا ءبىر ونىمدەر قالسا، ارنايى كوميسسيا بۇل ونىمدەردى بورودۋليحا اۋدانىنا، مۇمكىن بالالار ۇيىنە تاراتادى»، - دەپ اتاپ ءوتتى.

قوردىڭ قامقورشىلىق كەڭەسىنىڭ قۇرامى ايماققا تانىمال  بەدەلدى قوعام قايراتكەرلەرىنەن تۇرادى. ءدال قازىر كومەك كورسەتۋ ءۇشىن ارنايى شوتقا جەكە جانە زاڭدى تۇلعالاردان 500 ملن. تەڭگەدەن استام قاراجات كەلىپ ءتۇسىپ وتىر.

سۋرەت: قر تجم ءباسپاسوز قىزمەتى

Abai.kz