اباي وبلىسىندا جالپى اۋماعى 30 مىڭ گەكتاردى قۇرايتىن التى ۋچاسكەدە ورمان ءورتى ءسوندىرىلىپ جاتىر.

«اباي وبلىسىنىڭ التى ۋچاسكەسىندەگى ءورت ءسوندىرۋ جۇمىستارى جالعاسىپ جاتىر. ءورتتى ءسوندىرۋ ءۇشىن مەملەكەتتىك ورتكە قارسى قىزمەت ورگاندارىنىڭ كۇشتەرى مەن قۇرالدارى ورمان شارۋاشىلىعىنا كومەك كورسەتەدى. قازىر توتەنشە جاعدايلار مينيسترلىگىنەن، ورمان شارۋاشىلىعى كوميتەتىنەن، جەرگىلىكتى اتقارۋشى ورگاندار مەن قورعانىس مينيسترلىگىنەن 600-دەن استام ادام، 168 تەحنيكا جۇمىلدىرىلعان. ورمان شارۋاشىلىعى كوميتەتىنىڭ مالىمەتى بويىنشا، ءورتتىڭ اۋماعى شامامەن 30 000 گەكتاردى قۇرايدى»، – دەلىنگەن حابارلامادا.

سونىمەن قاتار، 6 تىكۇشاقپەن ءورت اۋماعىن اەروۆيزۋالدى بارلاۋ جۇرگىزىپ، ءورت وشاقتارىنا اۋەدەن سۋ توگىپ جاتىر. 6 تىكۇشاقپەن 55 رەت 154 توننا سۋ توگىلگەن.

حابارلامادا: «قر توتەنشە جاعدايلار ءمينيسترى يۋري يلين اباي وبلىسىنداعى ورتكە جانە ءورتتى سوندىرۋگە تارتىلعان كۇشتەر مەن قۇرالداردى ۇيلەستىرۋ قاجەتتىگىنە بايلانىستى سولتۇستىك قازاقستان وبلىسىنا جۇمىس ساپارىن ءۇزدى. مينيستر توتەنشە جاعدايلار مينيسترلىگىنىڭ داعدارىس كەزىندەگى باسقارۋ ورتالىعىنداعى شتابتى ءوزى باسقارادى»، – دەلىنگەن.

ەستەرىڭىز سالايىق، توتەنشە جاعدايلار ءمينيسترى يۋري يلين قازاقستاندا ءورتتىڭ جيىلەپ كەتۋىنە بايلانىستى وتستاۆكاعا كەتۋگە دايىن ەكەنىن 2022 جىلدىڭ قىركۇيەك ايىندا مالىمدەگەن ەدى.

*سۋرەت الەۋمەتتىك جەلىدەن الىندى.

Abai.kz