توتەنشە جاعداي ءبىرىنشى ۆيتسە-ءمينيسترى يبراگيم كۇلشىمباەۆ 2023 جىلى 8 مامىردا ىلە-الاتاۋ تابيعي پاركىندەگى تاۋ باۋرايىندا ءورتتى ءسوندىرۋ جونىندەگى جەدەل توپ قۇرامىندا قىزمەتتىك بورىشىن وتەپ ءجۇرىپ قازا تاپقان سەرجانت ارسلان قۇرمانبەكوۆتىڭ اناسى قۇرمانبەكوۆا باقىتگۇل جولداسبەكقىزىنا III دارەجەلى «ايبىن» وردەنىن تاپسىردى.

پرەزيدەنتتىڭ 15 مامىرداعى جارلىعىمەن قىزمەتتىك بورىشىن ورىنداۋ كەزىندە كورسەتكەن ەرلىگى مەن جانقيارلىعى ءۇشىن الماتى قالاسى تجد ءورت ءسوندىرۋ جانە اۆاريالىق-قۇتقارۋ جۇمىستارى قىزمەتىنىڭ №7 ءوسب اعا ءورت ءسوندىرۋشى-قۇتقارۋشىسى ارسلان قۇرمانبەكوۆ قازا تاپقاننان كەيىن ءىىى دارەجەلى «ايبىن» مەملەكەتتىك ناگراداسىمەن ماراپاتتالدى.

ازاماتتىق قورعاۋ سەرجانتى قۇرمانبەكوۆ ارسلان جولداسبەكۇلى 1994 جىلى 23 تامىزدا الماتى وبلىسى تالعار قالاسىندا دۇنيەگە كەلگەن.

ەڭبەك جولىن 2015 جىلدىڭ جەلتوقسان ايىنان باستاپ الماتى تجد «سپياسر» مم № 9 مامانداندىرىلعان ءورت ءسوندىرۋ ءبولىمىنىڭ ءورت ءسوندىرۋشى-قۇتقارۋشىسى بولىپ باستادى.

الماتى تجد «سپياسر» مم № 1 ءورت ءسوندىرۋ بولىمىندە ءورت ءسوندىرۋشى، اعا ءورت ءسوندىرۋشى-قۇتقارۋشى بولىپ جۇمىس ىستەگەن.

الماتى تجد ءورت ءسوندىرۋ جانە اۆاريالىق-قۇتقارۋ جۇمىستارى قىزمەتىنىڭ № 7 ءورت ءسوندىرۋ ءبولىمىنىڭ اعا ءورت ءسوندىرۋشى-قۇتقارۋشىسى لاۋازىمىنا 2019 جىلى تاعايىندالعان ەدى.

ي.كۇلشىمباەۆ مينيسترلىك اتىنان مارقۇمنىڭ تۋىستارى مەن جاقىندارىنا كوڭىل ايتىپ، باتىل ءارى ەرجۇرەك باتىردى تاربيەلەگەنى ءۇشىن العىسىن ءبىلدىردى.

Abai.kz