كەشەدەن بەرى «ارۋاق، ارۋاق!» دەپ ۇرانداسىپ ءتورت التىن الدىق پا! شىركىن، بوكسشىلارىمىز قوسا ۇرانداسقاندا عوي, التى التىن الاتىن ەدىك. ءازىل عوي... دەگەنمەن كەلەشەكتە سپورتشىلارىمىزدىڭ ءتىلى مەن دىلىنە ارۋاق قايتا ورالادى دەپ سەنەمىن. لايىم سولاي بولسىن!

ەستەرىڭىزدە بولسا، سيدنەيدە بوكسشىلارىمىزدىڭ ىشىنەن ارۋاق شاقىرىپ التىن العان اقىرعى چەمپيونىمىز ەرماحان بولعان ەدى. بۇل جىلدار ۋاھابيتتەردىڭ ىقپالىنىڭ كۇشەيە باستاعان تۇسى ەدى. از ۋاقتا سپورتتىڭ كۇرەس پەن بوكس سالاسىن تۇگەلدەي دەرلىك اراپتاندىرىپ ۇلگەرگەن ۋاھابيتتەر ارۋاققا قارسى مايدان اشتى. ءسويتىپ از جىلدا پالۋاندارىمىز بەن بوكسشىلارىمىز تاز مۇرت، كۇيەك ساقال بەينەسىندەگى سارتقا اينالىپ، شىنىكوزدەنىپ شىعا كەلدى. بايقاعانىم، بۇل جولعى الەم چەمپيوناتىندا تاز مۇرت، قابا ساقالدار بولعان جوق، جىگىتتەرىمىزدىڭ جۇزىنەن قازاقىلىق ءھام جەڭىسكە دەگەن جىگەرلىلىكتىڭ لەبى ەسىپ تۇردى. سوعان قاراعاندا سپورت سالاسىندا دىنشىلدىكتى اۋىزدىقتايتىن جۇمىستار جۇرگىزىلە باستاعانداي ما، قالاي؟ قالاي بولعاندا دا، بۇل جولعى الەم چەمپيوناتىنان وسىنى اڭعارعانداي بولدىق. تەك پالۋاندارىمىز بۇل وڭ ۇردىستەن ءالى الىس سياقتى. كەلەشەكتە پالۋاندارىمىزدى اراپشىلدىقتان ارىلتۋ جۇمىستارى جۇرگىزىلەدى دەپ سەنەمىز.

ايتپاقشى، باس ءمۇفتيدىڭ وتكەندەگى مالىمدەمەسى مۋفتياتتىڭ ءالى دە سالافيلىك جولدا ەكەنىن انىق پاش ەتتى. نەشەۋا، ناۋرىزباي شەيحقا ءالى ارۋاق دەگىزەمىز، دەمەسە باس مۇفتيلىكتەن قوش ايتىستىرامىز. ناۋرىزباي مولدانىڭ قازاقتىڭ ارۋاعىنا قارسى شىعۋىن – ساۋديالىقتاردىڭ ىقپالىنىنداعى ءمۇفتياتتىڭ ۇستاننىمى دەپ بىلەمىز ءارى قاتاڭ ايىپتايمىز. بۇعان بيلىك نازار اۋدارۋى ءتيىس ءھام قاجەتتى شارالار قولدانسىن!

سونىمەن تاشكەنتتە وتكەن الەم چەمپيوناتىندا كۇرزى جۇدىرىق بوكسەرلەرىمىز ءتورت التىن، ءبىر كۇمىس ولجالادى. ءسوز جوق، تاريحي جەڭىس! وسى ورايدا باس باپكەر مىرزاعالي ايتجانوۆتىڭ از ۋاقتاعى ەرەن ەڭبەگىن ايتقانىمىز ءجون. بوكسشىلاردىڭ بارلىعىن اسىرەسە اسىلانبەك شىمبەرگەنوۆتى بولە-جارا قۇتتىقتايمىن. ۇزاق جىلدار باعى جانباي جۇرگەن تالانتتى بوكسشىمىز ەدى. بۇل جولى ارۋاق القادى. جەڭىس قۇتتى بولسىن، قازاعىم!

ەرلان تولەۋتاي

Abai.kz