«Forbes» 2023 جىلعى ەڭ باي قازاقستاندىقتاردىڭ ءتىزىمىن جاريالادى. باسىلىمنىڭ جازۋىنشا، بيىلعى جىلى قازاقستان ميللياردەرلەرىنىڭ بايلىعى ارتا تۇسكەن. بارلىعى – $23,9 ملرد-قا جەتىپ جىعىلعان. ال بىلتىر $ 25,3 ملرد بولعان.

2022 جىلى بايلار قاتارىندا 5-ءشى ورىندى الىپ تۇرعان Kaspi.kz اق اكتسيونەرى ميحايل لومتادزە بيىلعى تىزىمدە جوق، وتكەنى ونى امەريكالىق «Forbes» گرۋزيا كاسىپكەرلەرىنىڭ قاتارىنا قوسىپ جىبەرگەن.

وتكەن جىلى ازاماتتىعىن رەسەيدەن قازاقستانعا اۋىستىرعان تيمۋر تۋرلوۆ ءوزىنىڭ بايلىعىن  900 ملن دوللارعا ارتتىرعان، ياعني $2,2 ملرد-تان $3,1 ملردقا بايىعان. وسىلايشا 7-ءشى ورىننان 5-ءشى ورىنعا كوتەرىلگەن.

تيمۋر مەن دينارا قۇلىباەۆتار ارقايسىسى ءبىر جىل ىشىندە داۋلەتىن $ 400 ملن-عا ارتتىردى. ولار ەكىنشى جانە ءۇشىنشى ورىنعا جايعاسقان.

Kaspi توبىنىڭ قوجايىنى ۆياچەسلاۆ كيم بيىل $400 ملن-عا بايىعان. ول ادەتتەگىدەي ءتورتىنشى ورىندا تۇر.

كەڭەس راقىشەۆتىڭ داۋلەتى ءبىر جىل ىشىندە ورتايعان. ول قازاقستاندىق اكتيۆتەردەگى ءوز ۇلەسىن ازايتقان. ونىڭ بتا بانكى رەسەيلىك اكتيۆتەردىڭ ءبىر بولىگىن ساتتى. وسىلايشا ول 15-ءشى ورىنعا تۇراقتادى.

بيىلعى جىلى رەيتينگكە جاڭا ەسىم قوسىلدى. ول – Orbis Kazakhstan ديرەكتورلار كەڭەسىنىڭ توراعاسى فاررۋح ماحمۋدوۆ. كومپانيا قۇرامىنا Orbis Auto ديلەرلىك جەلىسى، قازاقستاننىڭ 12 قالاسىنداعى 33 اۆتوورتالىق كىرەدى. 11 اۆتوموبيل برەندىن ۇسىنادى.

بۇدان باسقا، توپقا "اقسايگازسەرۆيس" مۇناي سەرۆيسى اق، "اۆتودوم" جشس (اۆتوكولىكتىڭ وپەراتسيالىق ليزينگى سالاسىنداعى قىزمەتتەر), Orbis Agro ء(داندى داقىلدار ترەيدينگى جانە جىلىجاي شارۋاشىلىقتارى), Orbis Development (Almaty قوناق ءۇيىن باسقارادى) كىرەدى. ماحمۋدوۆ تىزىمدە 22-ءشى ورىندا تۇر.

ەكس-پرەزيدەنتتىڭ تۇڭعىش قىزى داريعا نازارباەۆانىڭ بايلىعى $590 ملن-عا باعالاندى. ول 14-ورىنعا تۇسكەن.  ول ءوزىنىڭ يەلىگىندەگى "DLS Group حولدينگتىك كومپانياسى" ارقىلى "ايماق-مەديا" جشس، "A-Service Management" جشس (استاناداعى "دۋمان" ءتورت جۇلدىزدى قوناق ءۇي)  ۇلەستەرىن الىپ وتىر.

سونداي-اق، رەيتينگتە 29-شى ورىنعا جايعاسقان ۇلى نۇرالى اليەۆپەن بىرگە "ەۋروپا پليۋس قازاقستان" جشس-نا يەلىك ەتەدى، ول ارقىلى "راديو سيتي تەلەراديوكومپانياسى" جشس (Radio City راديوستانتسياسى) جانە "تاۋەلسىز تەلەۆيزيالىق ارنا" جشس (نتك تەلەارناسى) ۇلەستەرى بار.

تىزىمدە 45-ءشى بولىپ تۇرعان نۇربول نازارباەۆتىڭ داۋلەتى – $155 ملن. ول "Prime Capital Invest" جشس قۇرىلتايشىسى. "PLS ينۆەستيتسيالىق-قۇرىلىس كومپانياسى" جشس، "PLS-TM" جشس ("الماتى اۋىر ماشينا جاساۋ زاۋىتى"اق ماجوريتارلىق اكتسيونەرى) تەڭ يەسى.

Abai.kz