الماتى وبلىسى پوليتسيا دەپارتامەنتىنىڭ بۇرىنعى باسشىسى سەرىك كۇدەباەۆ 10 جىلعا سوتتالدى. ول جازاسىن قىلمىستىق اتقارۋ جۇيەسىنىڭ ورتاشا قاۋىپسىز مەكەمەسىندە وتەيتىن بولادى.

سوت ۇكىمىنە ساي، كۇدەباەۆ قۇقىق قورعاۋ ورگاندارى مەن مەملەكەتتىك مەكەمەلەردە 10 جىل جۇمىس ىستەۋ قۇقىعىنان ايىرىلدى. بۇعان قوسا، سوت ونى گەنەرال مايور شەنىنەن ايىرۋ ءۇشىن پرەزيدەنت قاسىم-جومارت توقاەۆقا قايىرىلدى.

وعان بيلىك پەن لاۋازىمدىق وكىلەتتىگىن اسىرا پايدالانۋ جانە ازاپتاۋ باپتارى بويىنشا ايىپ تاعىلدى.

سوتتا سوڭعى ءسوزىن ايتقان كۇدەباەۆ تاعىلعان ايىپپەن كەلىسپەدى.

«مەن كىنالى ەمەسپىن. تاعىلعان ايىپپەن كەلىسپەيمىن. حالقىما وق اتپادىم. سوت الدىنداعى پروتسەستەردە جاساعان ارەكەتتەرىمنىڭ بارلىعى زاڭدى ەكەنىن ايتقانمىن. ەشقانداي ازاپتاۋ بولعان جوق. جابىرلەنۋشىلەردىڭ وزدەرى ونى جوققا شىعاردى»،- دەدى سەرىك كۇدەباەۆ.

ايتا كەتەيىك، 27 ساۋىردە سەرىك كۇدەباەۆ ستامبۋلدا جۇرگەن جەرىنەن ۇستالدى.

3 ساۋىردە قاڭتار وقيعاسىنا كۇدىكتى دەپ تانىلعان كۇدەباەۆتىڭ ەلدەن قاشىپ كەتۋىنە بايلانىستى حالىقارالىق ىزدەۋ جاريالانعان بولاتىن.

كۇدەباەۆ 23 ناۋرىز كۇنى بىشكەك قالاسىنداعى ماناس حالىقارالىق اۋەجايىنان تۇركيانىڭ ىستامبۇل قالاسىنا ۇشىپ كەتكەن.

ۇقك توراعاسىنىڭ ورىنباسارى – شەكارا قىزمەتىنىڭ ديرەكتورى ەرلان الداجۇمانوۆ سەرىك كۇدەباەۆتىڭ مەملەكەتتىك شەكارانى رەسمي وتكىزۋ پۋنكتتەرى ارقىلى ەمەس، تاۋلار اراسىمەن قاشۋى مۇمكىن دەگەن جورامال ايتقان جانە بۇل ىسكە قىرعىز رەسپۋبليكاسىنىڭ مەملەكەتتىك ورگاندارى دا كىرىسكەنىن ايتتى.

كۇدەباەۆتىڭ سوتى بيىلعى جىلدىڭ قاڭتارىندا باستالدى. پروكۋرور ونى 9 جىلعا باس بوستاندىعىنان ايىرۋدى سۇرادى.

10 ناۋرىزدا سەرىك كۇدەباەۆ اۋرۋحاناعا تۇسكەنى، سوت وتىرىسى كەيىنگە شەگەرىلگەنى حابارلاندى. سودان كەيىن سوت پروتسەسى بىرنەشە رەت كەيىنگە قالدى. ول كەزەكتى سوت وتىرىسىنا كەلمەگەندىكتەن، سۋديا سەرىك كۇدەباەۆتى سوتقا ءماجبۇرلى تۇردە جەتكىزۋ جونىندە قاۋلى شىعاردى.

Abai.kz