بۇگىن پارلامەنت پالاتالارىنىڭ بىرلەسكەن وتىرىسىندا مەملەكەت باسشىسى قاسىم-جومارت توقاەۆ بيىل العاش رەت 45 اۋدان جانە وبلىستىق ماڭىزى بار قالالار اكىمدەرىن تىكەلەي سايلاۋ وتەتىنىن ايتتى. پرەزيدەنتتىڭ وسى سوزىنەن كەيىن ءبىزدىڭ شۋداعى اكىم سايلاۋى ەسكە ءتۇستى.

وزدەرىڭىز بىلەسىزدەر، سوڭعى جىلدارى اۋداندىق ماڭىزى بار قالالار، اۋىلدار، كەنتتەر مەن اۋىلدىق وكرۋگتەردە اكىمدى تۇرعىنداردىڭ ءوزى سايلاپ ءجۇر. سونداي سايلاۋ 2021 جىلى شۋ قالاسىندا ءوتتى. جامبىل وبلىسىنداعى اۋداندىق ماڭىزى بار تەمىرجولشىلار قالاسىندا 45 مىڭنان استام حالىق تۇرادى (بيىل حالىق سانى 50 مىڭدىق مەجەنى باعىندىرسا، وبلىستىق ماڭىزى بار قالاعا اينالادى).

ياعني، شاعىن قالادا مىڭداعان ەلەكتورات (30 مىڭداي) بار بولعاندىقتان، اكىم سايلاۋى تارتىستى ءوتتى. ءوزىن-ءوزى ۇسىنعان كانديدات ەرجان ەستيار بيلىك پارتياسىنىڭ اتىنان سايلاۋعا تۇسكەن قارسىلاسىنىڭ الدىن وراپ كەتتى. جۇرت تاڭدانىسىن جاسىرمادى. بۇل بۇعان دەيىن اكىمدەرىنىڭ كىم ەكەنىن بىلمەي كەلگەن شۋلىقتاردىڭ سايلاۋعا بەلسەنە قاتىسقانىنىڭ ارقاسىندا مۇمكىن بولدى. باستىسى، جەرگىلىكتى تۇرعىندار سايلاۋعا نەمقۇرايلى قاراماۋى كەرەك. ال، اكىمدەردىڭ سايلانۋى ءوزىنىڭ تيىمدىلىگىن كورسەتكەنىن شۋدىڭ مىسالىنان كورەمىز. ۇگىت-ناسيحات كەزىندە كانديداتتار تۇرعىندارمەن تىلدەستى. ولاردىڭ جانايقايىن ەستىدى. ارينە، كىشكەنتاي قالاداعى ۇلكەن ماسەلەلەردى بىردەن شەشۋ مۇمكىن ەمەس. سول سەبەپتى جەرگىلىكتى جەرلەر قارجىلىق رەسۋرستاردى قاجەت ەتەدى. ونى ەرجان سەرىكۇلىنىڭ ءوزى دە «قالا بيۋدجەتى شاعىن، ال شەشىمىن تابۋى ءتيىس ماسەلە كوپ» دەپ ايتقان بولاتىن.

پرەزيدەنت الداعى ۋاقىتتا ەلىمىزدەگى بارلىق اۋدان اكىمدەرى سايلاناتىنىن، ءسويتىپ بيلىكتىڭ بارلىق ينستيتۋتتارى جاڭارىپ، تىڭ قارقىنمەن جۇمىس ىستەي باستايتىنىن دا ايتتى. ويتكەنى، سايلانعان اكىم مەن تاعايىندالعان اكىمنىڭ اراسى جەر مەن كوكتەي بولاتىنىن ۋاقىتتىڭ ءوزى كورسەتتى. سايلانعان اكىم الدىمەن سايلاۋشىلاردىڭ الدىندا جاۋاپ بەرەدى. وركەنيەتتى ەلدەردە دە سولاي. مىسالى، 38 ملن حالقى بار پولشانىڭ كارى قۇرلىقتىڭ 27 ەلىنىڭ باسىن قوسقان ەۋروپالىق وداقتاعى التىنشى ەكونوميكاسى جانە الەم ەلدەرى اراسىندا جيىرماسىنشى ەكونوميكاسى بولۋىنا كوبىنە ءساتتى جۇرگىزىلگەن جەرگىلىكتى ءوزىن-ءوزى باسقارۋ رەفورمالارىنىڭ ارقاسىندا مۇمكىن بولعانىن ساراپشىلار دا ايتىپ ءجۇر. بۇگىن «ءبىز ازاماتتاردىڭ مەملەكەتتى باسقارۋ ىسىنە قاتىسۋ مۇمكىندىگىن كەڭەيتە بەرەمىز» دەپ ايتقان پرەزيدەنت تە وسى ويدى مەڭزەيدى.

جاسۇلان ماۋلەنۇلى

Abai.kz