23 ناۋرىزدا ريددەر جەو-دا كەزەكتى اپاتتى جاعداي ورىن الدى. جارىلىس ناتيجەسىندە شامامەن 80 شارشى مەتر اۋماقتى قورشاپ تۇرعان كونسترۋكتسيالار قيرادى

«2023 جىلعى 23 ناۋرىزدا ساعات 07.50-دە ريددەر جەو № 6 قازاندىق ايماعىنداعى جانارماي بەرۋ گالەرەياسىندا كومىر شاڭى پايدا بولدى. جارىلىس تولقىنى شامامەن 80 م. شارشى مەتر قورشاۋ قۇرىلىمدارىن قيراتتى. قازاندىقتارعا كومىر بەرۋ ساعات 13-00-دە قالپىنا كەلتىرىلدى.

بۇل جەرگە اتومدىق جانە ەنەرگەتيكالىق قاداعالاۋ مەن باقىلاۋ كوميتەتىنىڭ باسشىلىعى دەرەۋ جولعا شىقتى. بۇيرىققا سايكەس كوميسسيا تەحنولوگيالىق بۇزۋشىلىققا تەرگەپ-تەكسەرۋ جۇرگىزەدى. كوميسسيا قۇرامىنا كوميتەت وكىلدەرى، ريددەر جەو جانە تەحنيكالىق ساراپشى كىردى. تەرگەپ-تەكسەرۋ ناتيجەلەرى 10 جۇمىس كۇنى ىشىندە دايىن بولادى»،-دەپ جازدى ەنەرگەتيكا مينيسترلىگى.

مينيسترلىكتىڭ مالىمدەۋىنشە، قازىرگى ۋاقىتتا جەو-دا 6 قازاندىقتىڭ 2-ءى جۇمىس ىستەيدى. قالعان 4 قازاندىققا جوندەۋ جۇمىستارى جۇرگىزىلىپ جاتىر. جىلۋ جەلىسىنىڭ تەمپەراتۋراسى 70/46 گرادۋس گرافيكتە 45/35 گرادۋستى قۇرايدى.

22 مىڭنان استام وتباسى جىلىنىپ وتىرعان ريددەر جىلۋ ەلەكتر ورتالىعى جىلىتۋ ماۋسىمى باستالعان قازاننان بەرى اپات جاعدايىندا جۇمىس ىستەپ كەلەدى. بىرنەشە رەت ءورت شىقتى.

وسىعان بايلانىستى بىلتىر جىل سوڭىندا قالادا جەرگىلىكتى دەڭگەيدە توتەنشە جاعداي ەنگىزىلىپ، ءۇش ايدان سوڭ الىپ تاستالعان. قاڭتاردىڭ اياعىندا ورتالىققا جاڭا ينۆەستور كەلدى، بىراق باياعى جارتاس سول جارتاس كۇيىندە قالدى.

شىعىس قازاقستان وبلىسىنىڭ اكىمى دانيال احمەتوۆتىڭ ايتۋىنشا، ستانتسيا جۇمىسى ونىڭ بۇرىنعى يەسىنىڭ «سالعىرتتىعىنان» ناشارلاعان.

2022 جىلدىڭ قاراشاسىندا ريددەردە اپات بولعاننان كەيىن، شقو پروكۋرورلارى تەكسەرۋ جۇرگىزگەن. ناتيجەسىندە 240-تان استام استام زاڭبۇزۋشىلىق انىقتالىپ، ورتالىقتا 548 ميلليون تەڭگە ماقساتسىز جۇمسالعانى بەلگىلى بولعان. قازىر جەو-عا 11 ملن تەڭگەدەن استام ايىپپۇل سالىندى.

شىعىس قازاقستان وبلىسىنىڭ پروكۋراتۋراسىنىڭ حابارلاۋىنشا، 63,3 ملن تەڭگە سوماسىنا 21,7 مىڭ تۇتىنۋشىعا زالال وتەلگەن. بۇعان قوسا، 1 ساۋىردەن باستاپ، 2024 جىلدىڭ 31 ناۋرىزىنا دەيىن حالىققا جىلۋ مەن جارىق ءتاريفى 18%-عا تومەندەتىلەتىن بولدى.

Abai.kz