23 ناۋرىز كۇنى كەشكى ساعات 21.00-دە ەلورداداعى «استانا-ارەنا» ستاديونىندا 2024 جىلعى ەۋروپا فۋتبول چەمپيوناتىنىڭ العاشقى ىرىكتەۋ ويىنى وتەدى. بەتاشار ماتچتا قازاقستان جانە سلوۆەنيا قۇرامالارى كەزدەسەدى.

قۇرلىق دوداسىنىڭ ىرىكتەۋ كەزەڭىنىڭ جەرەبەسى وتكەن جىلدىڭ قازان ايىندا-اق تارتىلعان بولاتىن. سونىڭ ناتيجەسىندە ەۋروپانىڭ 53 كومانداسى 10 توپقا بىلاي ءبولىندى:

1-توپ: يسپانيا، شوتلانديا، نورۆەگيا، گرۋزيا، كيپر.

2-توپ: گوللانديا، فرانتسيا، يرلانديا، گرەكيا، گيبرالتار.

3-توپ: يتاليا، انگليا، ۋكراينا، سولتۇستىك ماكەدونيا، مالتا.

4-توپ: حورۆاتيا، ۋەلس، ارمەنيا، تۇركيا، لاتۆيا.

5-توپ: پولشا، چەحيا، البانيا، فارەر ارالدارى، مولدوۆا.

6-توپ: بەلگيا، اۆستريا، شۆەتسيا، ازەربايجان، ەستونيا.

7-توپ: ۆەنگريا، سەربيا، چەرنوگوريا، بولگاريا، ليتۆا.

8-توپ: دانيا، فينليانديا، سلوۆەنيا، قازاقستان، سولتۇستىك يرلانديا، سان-مارينو.

9-توپ: شۆەيتساريا، يزرايل، رۋمىنيا، كوسوۆو، بەلارۋس، اندوررا.

10-توپ: پورتۋگاليا، بوسنيا، يسلانديا، ليۋكسەمبۋرگ، سلوۆاكيا، ليحتەنشتەين.

ەۋرو-2024-ءتىڭ فينالدىق كەزەڭى كەلەر جىلدىڭ جازىندا گەرمانيا جاسىل الاڭدارىندا وتەدى. سوندىقتان دا نەمىس قۇراماسى ىرىكتەۋ سىنىنا قاتىسپايدى. ال ۋەفا-عا مۇشە تاعى ءبىر ەل – رەسەيدىڭ قۇراما كومانداسىنا قازىرگى ساياسي احۋالعا بايلانىستى بىلتىردان بەرى فيفا مەن ۋەفا اياسىنداعى ەشقانداي جارىسقا قاتىسۋعا تىيىم سالىنعان.

ىرىكتەۋ ويىندارى وسى ناۋرىز ايىنىڭ اياعىندا، ماۋسىم ايىنىڭ ورتاسىندا، سوسىن قىركۇيەكتىڭ باسى مەن قازاننىڭ ورتاسىندا، سونان سوڭ قاراشا ايىنىڭ ورتا شەنىندە وتەدى. جارىس قورىتىندىسى بويىنشا ءار توپتىڭ ەكى ۇزدىك كومانداسى گەرمانياداعى شەشۋشى كەزەڭگە جولداما الادى. تاعى ءۇش جولدامانى ۇلتتار ليگاسىنداعى ۇزدىكتەر ساراپقا سالادى. ەستەرىڭىزگە سالا كەتەيىك، ولاردىڭ ىشىندە بىلتىر ءوز توبىندا جەڭىسكە جەتكەن قازاقستان دا بار.

26 ناۋرىز كۇنى ءبىزدىڭ فۋتبولشىلار استانادا دانيا قۇراماسىن قابىلدايدى. قازاقستان كومانداسىنىڭ جالپى بيىلعى ويىن كەستەسى مىناداي:

23.03. قازاقستان – سلوۆەنيا

26.03. قازاقستان – دانيا

16.06. سان-مارينو – قازاقستان

19.06. سولت.يرلانديا – قازاقستان

07.09. قازاقستان – فينليانديا

10.09. قازاقستان – سولت.يرلانديا

14.10. دانيا – قازاقستان

17.10. فينليانديا – قازاقستان

17.11. قازاقستان – سان-مارينو

20.11. سلوۆەنيا – قازاقستان

ساكەن سىبانباي

Abai.kz