قحر توراعاسى جانە قىتاي كومپارتياسىنىڭ باسشىسى سي تسزينپين رەسمي ساپارمەن ماسكەۋگە باردى. بۇل ونىڭ ۋكرايناداعى سوعىس باستالعالى بەرى ماسكەۋگە العاشقى ساپارى بولماق.

ساپار قارساڭىندا رەسەي پرەزيدەنتى ۆلاديمير پۋتين قىتايدىڭ ءىرى "جەنمين جيباو" باسىلىمىنا «رەسەي مەن قىتاي – بولاشاققا ۇمتىلعان ارىپتەستىك» دەپ اتالاتىن ماقالا جاريالادى. ورىس تىلىندەگى ماتەريال كرەمل سايتىنا دا ءىلىندى. وندا پۋتين ماسكەۋدە بولاتىن كەلىسسوزدەردەن «زور ءۇمىت كۇتەتىنىن» جازعان. «مەن ءۇشىن بۇل مەيرىمدى ەسكى دوسىممەن جۇزدەسۋدىڭ كەرەمەت مۇمكىندىگى بولماق»، - دەيدى پۋتين. ونىڭ پىكىرىنشە، «ناعىز دوس – تۋعان باۋىر سەكىلدى».

قىتاي باسشىسى رەسەيگە باراتىنى 17 ناۋرىزدا ءمالىم بولدى. ول ماسكەۋدە 22 ناۋرىزعا دەيىن بولادى. رەسەي پرەزيدەنتىنىڭ كومەكشىسى يۋري ۋشاكوۆتىڭ ايتۋىنشا، ماسكەۋدەگى كەلىسسوزدەردە ەكى ەل اراسىنداعى اسكەري-تەحنيكالىق ارىپتەستىك ماسەلەلەرى تالقىلانادى. كەلىسسوزدەرگە رەسەي جاعىنان قورعانىس ءمينيسترى سەرگەي شويگۋ مەن اسكەري-تەحنيكالىق ارىپتەستىك جونىندەگى فەدەرالدىق قىزمەت باسشىسى دميتري شۋگاەۆ قاتىسادى. «البەتتە، ۋكرايناداعى جانجال دا ءسوز بولادى»، - دەپ مالىمدەدى ۋشاكوۆ.

بۇنىڭ الدىندا باتىس ءباسپاسوزى قىتاي رەسەيگە قارۋ جەتكىزۋ مۇمكىندىگىن قاراستىرادى دەپ جازعان. اقش مەملەكەتتىك حاتشىسى ەنتوني بلينكەن اقپاندا رەسەيگە قارۋ بەرگەن جاعدايدا پەكين سونىڭ سالدارىن تارتادى دەپ ەسكەرتكەن. قىتاي رەسەيگە قارۋ بەرۋ جوسپارىن جوققا شىعارعان.

كەيىنگى كۇندەرى كرەمل جاعىنداعى تەلەگرام-ارنالار بۇل ساپارعا ەرەكشە ءمان بەرىپ، قىتاي كراينامەن سوعىستا جانە باتىسپەن تەكە-تىرەستە رەسەيگە قولداۋ كورسەتەدى دەپ توپشىلاعان.

الايدا پەكين مۇنداي قولداۋعا دالەل بولاتىنداي ەشقانداي مالىمدەمە جاساعان جوق.

جۇما كۇنى گااگاداعى حالىقارالىق قىلمىستىق سوت ءپۋتيندى ۇستاۋعا وردەر بەردى. قىتاي دا، رەسەي دە بۇل سوتتىڭ شەشىمىن مويىندامايدى.

Abai.kz