الماتىداعى ەكولوگيا باسقارماسىنىڭ بىرقاتار لاۋازىمدى تۇلعالارى جەمقورلىق ءۇشىن سوتتالدى، دەپ حابارلايدى انتيكور.

«الماتى قالاسى مەدەۋ اۋدانىنىڭ № 2 سوتىنىڭ ۇكىمىمەن پارا العانى ءۇشىن الماتى قالاسى ەكولوگيا جانە قورشاعان ورتا باسقارما باسشىسى ورىنباسارىنىڭ مىندەتىن ۋاقىتقا اتقارۋشى م. جەكسەمباەۆقا 96 ملن تەڭگە سوماسىندا ايىپپۇل تۇرىندە جازا تاعايىندالدى (پارانىڭ 30 ەسەلەنگەن مولشەرى). پارا بەرگەنى ءۇشىن «ەكوسەرۆيس-س» جشس باسشىسى ع. بەركىنباەۆ پەن «كومپانيا سترويتەكس» جشس باسشىسى ا. ماپاەۆقا سايكەسىنشە 73 ملن استام جانە 64 ملن تەڭگە سوماسىندا ايىپپۇل سالۋعا ۇكىم شىعارىلدى. پاراقورلىققا دەلدال بولعانى ءۇشىن «Eco Almaty» جشس مەنەدجەرى ب. راحىم 32 ملن تەڭگە مولشەرىندە ايىپپۇلعا سوتتالدى. سوتتالعاندار ءۇشىن ايىپپۇلدىڭ جالپى ەسەبى 265 ملن تەڭگەدەن استام سومانى قۇرادى»، - دەلىنگەن اگەنتتىك حابارلاماسىندا.

اتالعان ادامدار مەملەكەتتىك قىزمەتتە جانە كۆازيمەملەكەتتىك سەكتور سۋبەكتىلەرىندە قىزمەت اتقارۋ قۇقىعىنان ءومىر بويى ايىرىلدى.

سونداي-اق ەكولوگيا جانە قورشاعان ورتا باسقارماسىنىڭ لاۋازىمدى تۇلعاسى م. جەكسەمباەۆ «رەننەسانس پليۋس» جشس وكىلى ع. بەركىنباەۆتان قاتتى-تۇرمىستىق قالدىقتاردى جيناۋ جانە سۇرىپتاۋ ءۇشىن الماتى قالاسىنىڭ تۇرعىن ءۇي كەشەندەرىنىڭ اۋماعىندا جەر ۋچاسكەلەرىن بەرگەنى ءۇشىن 5 ملن تەڭگە شاماسىندا اقشالاي قاراجات الدى. م. جەكسەمباەۆ «كومپانيا سترويتەكس» جشس ديرەكتورى ا. ماپاەۆتان الماتى قالاسى ەكولوگيا جانە قورشاعان ورتا باسقارماسىنىڭ اكىمشىلىك عيماراتىنىڭ جسق ازىرلەۋگە بۇرىن جاسالعان مەملەكەتتىك ساتىپ الۋ تۋرالى شارت بويىنشا جالپى قامقورلىعى ءۇشىن دەلدال ب. راحىم ارقىلى 3 ملن تەڭگەدەن استام اقشالاي پارا الدى.

قر قك 41-بابىنا سايكەس ايىپپۇل بەلگىلەنگەن مەرزىمدە تولەنبەگەن جاعدايدا جازا شاراسى باس بوستاندىعىنان ايىرۋعا اۋىستىرىلادى.

Abai.kz