LRT-نىڭ قۇرىلىسىن توقتاتساق، شىعىن ودان دا كوپ بولادى. بۇل تۋرالى مەملەكەت باسشىسى قاسىم-جومارت توقاەۆتىڭ توراعالىعىمەن ەلوردانى دامىتۋ ماسەلەلەرى جونىندەگى كەڭەس ايتتى، دەپ حابارلايدى اقوردا.

«كەلەسى ماسەلە – قوعامدىق كولىك جۇيەسىن دامىتۋ. مەن قالا ىشىندە ادام كوپ جۇرەتىن باعىتتاردى انىقتاپ، اۆتوبۋستىڭ ءجيى قاتىناۋىن قامتاماسىز ەتۋ جونىندە ناقتى تاپسىرما بەردىم. بىراق تۇرعىندار ءالى كۇنگە دەيىن ايالدامادا جارتى ساعات بويى تۇرۋعا ءماجبۇر. ءتىپتى، كەيدە جولاۋشىلار اۆتوبۋسقا سىيماي جاتادى. قازىر استاناعا 400-دەن استام اۆتوبۋس جەتىسپەيدى. الداعى 5 جىلدا بۇل تاپشىلىق 2 ەسە ارتۋى مۇمكىن. 400 ايالدامادا اۆتوبۋس توقتايتىن ارنايى ورىن قاراستىرىلماعان. ال 300 ايالدامادا جابىق پاۆيلون جوق. بۇل ماسەلە، اسىرەسە، قىس كەزىندە وتە وزەكتى. LRT-عا قاتىستى جۇمىستى مەيلىنشە تەزدەتىپ اياقتاۋ كەرەك. مەن بۇرىن دا ايتتىم، LRT جوباسى نەگىزىنەن قاتە بولدى. بىراق قازىرگى تاڭدا باسقا امالىمىز جوق، بۇل جوبانى جۇزەگە اسىرۋىمىز كەرەك. LRT-نىڭ قۇرىلىسىن توقتاتساق، شىعىن ودان دا كوپ بولادى. ال، بالاما جوبالار جوق. جالپى، اكىمدىككە ۇكىمەتپەن بىرلەسىپ، استانانىڭ كولىك جۇيەسىن دامىتۋعا ارنالعان كەشەندى باعدارلاما ازىرلەۋدى تاپسىرامىن»، - دەدى قر پرەزيدەنتى.

ەسكە سالساق، ەلورداداعى LRT-نىڭ قۇرىلىسى 2019 جىلى ساۋىردە توقتاتىلعان ەدى. 2020 جىلدىڭ قاڭتارىندا LRT قۇرىلىسىنا قاتىستى ءىستى تەرگەۋ شارالارى اياقتالدى. سول جىلى قازاندا «استانا LRT» كومپانياسى بويىنشا ءىس سوت قاراۋىنا جولداندى.

سونداي-اق، بيىل 13 تامىزدا نۇر-سۇلتان قالاسىنىڭ پروكۋراتۋراسى ەلوردا اكىمىنىڭ بۇرىنعى ورىنباسارى قانات سۇلتانبەكوۆ پەن «استانا LRT» جشس باسقارما توراعاسى تالعات اردانعا قاتىستى قىلمىستىق ءىستى سوتقا جولدانعانى تۋرالى حابارلادى. بىراق، اتالعان ەكى كۇدىكتى قازىرگى ۋاقىتتا قىلمىستىق قۋدالاۋدان بوي تاسالاپ ءجۇر.

ايتا كەتسەك، مەملەكەت باسشىسى قاسىم-جومارت توقاەۆ بيىل 11 قاڭتاردا وتكەن ءماجىلىس وتىرىسىندا ەلورداداعى LRT قۇرىلىسى تۋرالى پىكىر بىلدىردى.

Abai.kz