سەيسەنبى, 28 مامىر 2024
46 - ءسوز 2813 0 پىكىر 18 قاڭتار, 2023 ساعات 12:43

ەلىمىزدە 2022 جىلى 110 مىڭ جاڭا كولىك ساتىلدى

كەلەسى اپتادا قازاقستان اۆتوبيزنەسى قاۋىمداستىعى 2022 جىلدىڭ قورتىندىسىن شىعارادى. بىلتىر قازاقستاندا قاي اۆتوموبيل ماركاسى ەڭ كوپ ساتىلدى دەگەن سۇراققا جاۋاپ بەرىلەدى. بىراق قازىر دە، جەلتوقسان ايىنىڭ كورسەتكىشتەرىن كۇتپەي، 2022 جىلدىڭ 11 ايىن سارالاپ ناقتى ايتۋعا بولادى: قازاقستان بويىنشا اۆتوكورول - Chevrolet Cobalt.

بەستسەللەرگە اينالعان اۆتوكولىكتى قوستاناي قالاسىنداعى "سارىارقااۆتوپروم" قۇراستىرادى. بىلتىر (11 اي ستاتيستيكاسى بويىنشا) 30 749 Chevrolet ماركاسى ساتىلعان. ونىڭ 90 پايىزى - Cobalt. بۇل ابسوليۋتتى رەكورد. شەۆرولەدەن كەيىن حيۋنداي، كيا، چەرري ماركالارى كەلەدى. 2022 جىلدان باستاپ - تويوتا قازاقتىڭ ءداستۇرلى كولىگى ستاتۋسىنان ايرىلدى. سوندىقتان قازاق جانە اۆتوكولىك دەگەندە كامريدى ەمەس، كوبالتتى كوبىرەك ايتا بەرۋىمىز كەرەك. سول ءادىل بولادى.

جالپى، 2022 جىلدىڭ 11 ايىندا ەلىمىزدە 110 مىڭعا جۋىق جاڭا اۆتوكولىك ساتىلدى. ونىڭ ىشىندە وتاندىق ماركالار (شەۆرولە، كيا، حيۋنداي، Jac) جانە قىتايدان تاسىلاتىن Cherry, Haval سىندى كولىكتەر ءوز پوزيتسياسىن كۇشەيتكەن. جاپوندار السىرەگەن (تويوتا، لەكسۋس، سۋبارۋ، حوندا، مازدا), ال نەمىستەر (مەرسەدەس، بمۆ، اۋدي) ءبىزدىڭ نارىقتان بىرتىندەپ الىستاي باستاعانىن كورىپ وتىرمىز.

ەۋرومينيماليزم بىزگە دە كەلدى. ءبىز دە كىشكەنتاي، بەنزيندى از جەيتىن كولىكتەردى كوپ الاتىن بولدىق. ۇلكەن دجيپتەرگە دەگەن جەلىك باسىلدى، ادامدار ونىڭ سالىعى مەن كۇتىمىنە اقشا جۇمساعانشا، سول اقشانى ينۆەستيتسيالاۋ دۇرىس ەكەنىن ءتۇسىندى. الماتىدا مەترومەن جۇرەتىن بانكيرلەر، بيزنەسمەندەر مەن ترەيدەرلەر پايدا بولدى. مىنەز-قۇلىق تا، پسيحولوگيا دا وزگەرۋدە. ماتەريالدى زاتتارعا قاراعاندا دزەن پراكتيكالارعا، رۋحاني باعىتتارعا دەگەن قىزىعۋشىلىق ارتتى.

مىنەز-قۇلىق ەكونوميكاسىندا ءدال وسى پسيحوكارتينا ەسكەرىلىپ، ۇسىنىس تا سوعان لايىقتالادى. مەنىڭ كولىگىم الەمدى قالاي وزگەرتە الادى، قورشاعان ورتاعا زيان تيگىزبەسە ەكەن دەگەن ورتاق يدەولوگيا كۇشەيمەك. دەمەك، 2025-2027 جىلدارداعى ستاتيستيكادا بىزدەگى ساتىلىم ليدەرىنە ەلەكتروموبيل شىعادى دەپ بولجاي الامىن. تەسلا بولمايتىن شىعار، مۇمكىن كوبالت سياقتى ارزان ءارى كىشكەنتاي ەلەكتروكولىك بولار. ءبىز سوعان كەلە جاتىرمىز.

ايبار ولجاەۆ

Abai.kz

0 پىكىر

ۇزدىك ماتەريالدار

قۇيىلسىن كوشىڭ

باس گازەت ورالماندارعا نەگە شۇيلىكتى؟

ءالىمجان ءاشىمۇلى 2374
ادەبيەت

«سولاي ەمەس پە؟»

عابباس قابىشۇلى 2714
قوعام

دوس كوپ پە، دۇشپان كوپ پە؟

ءابدىراشيت باكىرۇلى 3056
ەل ءىشى...

ۇلتتىق بىرەگەيلەنۋ: قانداستاردىڭ ءرولى قانداي؟

ءومارالى ادىلبەكۇلى 1784