پرەزيدەنت توقاەۆ سەناتتا ۇكىمەت جۇمىسىن سىنعا الدى. جاڭا جىلدىڭ باسىندا ۇكىمەتتە بىرقاتار كادرلىق اۋىس-تۇيىستەر ورىن الاتىنىن ايتتى.

«مەن جاقىندا وتكەن ۇكىمەت وتىرىسىندا ناقتى ايتتىم. ەلىمىز ءۇشىن وتە ماڭىزدى بىرقاتار ماسەلە بويىنشا ۇكىمەت لايىقتى بەلسەندىلىك كورسەتىپ وتىرعان جوق، شەشىمدەرىن باياۋ قابىلداپ جاتىر. ۇكىمەت وسى ولقىلىقتاردى تۇزەتۋ ءۇشىن ارەكەتتەرىن قولدانۋدا، تاياۋ ارادا ونىڭ جۇمىسىنىڭ تيىمدىلىگى ارتادى دەپ ويلايمىن. پرەمەر-ءمينيستردىڭ ۇسىنىسى بويىنشا جاڭا جىلدىڭ باسىندا ۇكىمەتتە بىرقاتار كادرلىق وزگەرىستەر جاساماقشىمىن. جالپى، ۇكىمەتتىڭ الدىندا تۇرعان ماقساتتار – وتە اۋقىمدى جانە وزەكتى»، - دەدى پرەزيدەنت.

ەسكە سالساق، 12 جەلتوقساندا وتكەن ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقاەۆ ۇكىمەتتىڭ مىندەتتەرىن ايتقان ەدى.

«ۇكىمەتتىڭ نەگىزگى مىندەتى – ەلىمىزدەگى ەكونوميكالىق ماسەلەلەردى شەشۋمەن اينالىسۋ. بۇل – ۇكىمەت مۇشەلەرىنىڭ، اكىمدەردىڭ، ۇلتتىق كومپانيا باسشىلارىنىڭ تىكەلەي جاۋاپكەرشىلىگى. سوندىقتان مەن پرەمەر-مينيستر ءاليحان اسحانۇلى سمايىلوۆتان شىنايى جاۋاپ العىم كەلەدى. جالپى، جاڭا جىلعا ۇكىمەتتىڭ وسى قۇرامىمەن اياق باسۋعا بولا ما؟ پرەزيدەنتتىڭ سايلاۋالدى باعدارلاماسىن جۇزەگە اسىرۋ ۇكىمەتتىڭ قولىنان كەلە مە؟ ۇكىمەت ىشتەن جانە سىرتتان بولاتىن بارلىق ەكونوميكالىق قاۋىپ-قاتەرلەرگە قارسى تۇرا الا ما؟ مەنىڭشە، بۇل ماسەلەلەر مەملەكەت باسشىسىنىڭ پرەمەر-مينيسترمەن جانە پارلامەنت دەپۋتاتتارىمەن وتكىزەتىن كونسۋلتاتسيالارى كەزىندە مۇقيات تالقىلانۋى كەرەك»، - دەدى پرەزيدەنت.

ءبىز اتالعان ماسەلەگە قاتىستى «Usbanov arnasy» تەلەگرام ارناسىندا: «قاي مينيستر قىزمەتتەن كەتۋى كەرەك» دەگەن ساۋالناما جۇرگىزگەندى ءجون سانادىق.

ساۋالناماعا قاتىسىپ، ءوز پىكىرلەرىڭىزدى بىلدىرىڭىزدەر. ساۋالناما قورىتىندىسى Abai.kz اقپاراتتىق پورتالىندا جاريالاناتىن بولادى.

Abai.kz