ۋكراينانىڭ قاۋىپسىزدىك قىزمەتى (ۋقق) رەسەيلىك وليگارح اليشەر ۋسمانوۆقا تيەسىلى كومپانيانىڭ ەكى ملرد گريۆەن بولاتىن (54 ملن دوللار) 160 مىڭ توننا تەمىر كەنىن تاركىلەدى. بۇل جونىندە مەكەمەنىڭ ءباسپاسوز قىزمەتى حابارلادى.

ۋقق حابارلاعانداي، ۋكراينانىڭ تەڭىز پورتىنان بىرنەشە رەسەيلىك زاڭسىز قويمالار تاپقان. وندا ساقتالعان تەمىر كەنى ۋسمانوۆقا تيەسىلى بولعانى ايتىلادى.

مەكەمە مالىمەتىنشە، قويماداعى تەمىر كەنىن كەمە ارقىلى رەسەيدىڭ مەتاللۋرگيالىق جانە اسكەري-ءوندىرىس كەشەنىنە جونەلتپەكشى بولعان. "تاركىلەنگەن مۇلىككە تىيىم سالىندى. قازىر كوررۋپتسيالىق جولمەن كەلگەن اكتيۆتەردى باسقارۋ جونىندەگى ۇلتتىق اگەنتتىككە بەرۋ ماسەلەسى قارالىپ جاتىر", - دەلىنگەن مالىمدەمەدە.

69 جاستاعى ۋسمانوۆ رەسەيدىڭ ەڭ باي ادامدارىنىڭ ءبىرى. Forbes جۋرنالىنىڭ مالىمەتى بويىنشا، ونىڭ داۋلەتى 14,6 ملرد ەۋرو. رەسەي ۋكرايناعا باسىپ كىرگەننەن كەيىن، ول باتىس ەلدەرىنىڭ سانكتسياسىنا تاپ بولدى.

قىركۇيەك ايىندا نەمىس پوليتسياسى باۆارياداعى تەگەرنزەە كولى جاعاسىنداعى ۋسمانوۆقا تيەسىلى دەگەن مۇلىكتەرگە ءتىنتۋ جۇرگىزگەن. ارنايى وپەراتسياعا 250 ادام قاتىسقان.

Der Spiegel باسىلىمىنىڭ جازۋىنشا، ميللياردەر سالىق قىلمىسىن جاسادى دەگەن كۇدىككە ىلىنگەن. كەيبىر مالىمەتتەرگە قاراعاندا، ۋسمانوۆ 2014-2022 جىلدار ارالىعىندا 555 ملن ەۋرو سالىق تولەمەگەن دەگەن كۇدىككە ىلىنگەن.

قاراشا ايىندا نەمىس پوليتسياسى Dilbar ياحتاسىنا ىلىنگەن 30 باعالى كارتينانى تاركىلەگەن. بۇل كارتينالاردىڭ جالپى قۇنى 5 ملن ەۋروعا باعالانادى.

Abai.kz