سەنبى, 28 قاڭتار 2023
ادەبيەت 1188 1 پىكىر 17 قاراشا, 2022 ساعات 14:39

بۇگىنگى ساتيرا. ۇكىمەت الدايدى!

(«جانتاق الاڭىنان رەپورتاجدىڭ» زاماناۋي نۇسقاسى)

قۇرمەتتى حالايىق! ەلدە جوق، رەسپۋبليكالىق فۋتبول چەمپيوناتىنان تىكەلەي رەپورتاج جۇرگىزەمىن!  «حالىق» كومانداسى مەن «ۇكىمەت» كومانداسى  استاناداعى ستاديوندا كەرەمەت كەزدەسۋ وتكىزگەلى جاتىر!

انە، «امانات» پارياسىنىڭ توراعاسى، تورەشى تىمىرايىپ تۇرعان بولاتىن، ىشقىنىپ ىسقىرىپ قالىپ ەدى، فۋتبولشىلار دوپقا تالاسا كەتتى. «تالاسقانعا تاس تا جوق!» – دەگەن «ۇكىمەت» كومانداسىنىڭ  باس شابۋىلشىسى دوپتى قۋالاي جونەلىپ، قارسىلاستىڭ قاقپاسىنا قاقىراتا دوپ سوققان ەدى، بالاسىن ەمىزىپ وتىرعان كوپ بالالى انا ەتەگىمەن قاعىپ الىپ، دوپتى اۋەلەتە ءبىر تەپتى. دوپپەن بىرگە ءتوپليى دە اۋەلەي ۇشىپ، سوناداي جەرگە دىك ەتتى. ونى «ۇكىمەت» شابۋىلشىسى تەبە جونەلگەن، تورەشى  وعان جاسىل كارتوچكا كورسەتە جازدادى.  انە، انە، «حالىق» كومانداسىنىڭ باس شابۋىلشىسى دوپتى ولاي قۋالاپ، بىلاي قۋالاپ،  قارسىلاستىڭ قاقپاسىنا قاقىراتا دوپ سوقتى. پرەمەر-مينيستر پرەزيدەنتپەن تەلەفون ارقىلى سويلەسىپ، قاقپاداعى كرەسلودا وتىرعان، گووول!  ەسەپ 1 دە 0! بۇعان قاتتى اشۋلانعان «ۇكىمەتتىڭ» شابۋىلشىلارى جىلاپ جىبەرە جازدادى. ءبىر ەرەكشەلىك سول، ولار فۋتبولكامەن ەمەس، سىقيىپ قارا كوستيۋم-شالبار كيىپ كەلگەن بولاتىن. مويىندارىندا گالستۋگ، اياقتارىندا ەڭ قىمبات قارا تۋفلي! جاعىمپازدار قاقپاشى پرەمەر-ءمينيستردىڭ ءتۋفليىن قايتا-قايتا ءسۇرتىپ قويادى. تۇكىرىكتەپ.

ءبىر كەزدە، «ۇكىمەت» شابۋىلشىسىنىڭ ءبىرى شىرەنىپ دوپ قۋالاپ، كەكىرەيگەن شالا قازاق مينيسترگە پاس بەردى. ول الدەكىمگە ورىسشا سويلەپ تۇرعان، دوپ باسىنا ءتيىپ، جالپ ەتتى. ووو، «حالىق» كومانداسىنىڭ ەڭ سورلى، ەڭ كەدەي شابۋىلشىسى دوپتى قاعىپ الىپ، اۋەلەتە تەپتى. ونى ۆيتسە-مينيستر قولىمەن قاعىپ الىپ ەدى، تورەشى كەشىرە سالدى. «ءجاي، دوپتىڭ جەلى شىعىپ كەتكەن جوق پا؟ سونى تەكسەرىپ جاتقانىم عوي!» – دەپ قويادى ۇيالماي. ءبىر كەزدە، «ۇكىمەت» شابۋىلشىسى دوپتى قۋالاي جونەلدى. «حالىق» قورعاۋشىلارى الدىنان شىققان: «ءبارىڭنىڭ نەسيەلەرىڭدى كەشىرەمىز!» – دەپ الداي سالىپ ەدى، اڭقيىسىپ تۇرعاندا، ارالارىنان زۋ ەتىپ ءوتىپ، قاقپاعا جاقىندادى. قاقپاشى باتىر انا ساعىز شايناپ  تۇرعان.  «بالالارعا جاردەماقىنى كوبەيتەمىز!» – دەپ الداپ، ول ويلانىپ تۇرعاندا، گوووول! ەسەپ 1 دە 1!  «حالىق» قايتا شابۋىلدادى. قاقپاعا جاقىنداپ، گول سوعا بەرگەندە: «سايلاۋدا سول كىسىگە داۋىس بەرىڭدەر! قىمباتشىلىق بولمايدى، باعا كوتەرگەندەر سورلايدى، وبشىم، وڭبايدى!» – دەپ ايقايلاعان جارتىلاي قورعاۋشى دوپتى الداپ الىپ، اۋەلەتە تەپتى. دوپ ستاديوننان شىعىپ، سول جاعالاۋعا ۇشىپ كەتتى. باسقا دوپقا ۇكىمەت قارجى بولمەگەندىكتەن، ويىن تەڭ اياقتالدى. كەلەسى كەزدەسۋدە حالىق سەنبەيدى، سول كەزدە تولىق جەڭەدى، وتىرىك ايتسام، ءولىپ كەتەيىن!

مۇحتار شەرىم

Abai.kz

1 پىكىر

ۇزدىك ماتەريالدار

انىق-قانىعى

جاقيانوۆ: ماعان اشىق جالا جابۋعا كىرىستى...

عالىمجان جاقيانوۆ 3115
ايقاي

ەلدە ۇلتتىق يدەولوگيا وتە ءالسىز...

بەيسەنعازى ۇلىقبەك 1901