سەنبى, 28 قاڭتار 2023
ادەبيەت 1372 8 پىكىر 7 قاراشا, 2022 ساعات 12:52

ولەڭنىڭ يەسى – اقىن، كيەسى – حالىق

قازاقى پوشىم

بىردە ولاي،
بىردە بىلاي.
بىردە مالاي،
بىردە قۇداي.

ححح

اسىل مۇرات – مەندەگى جاسىل قۇراق...
كول جاسادىم كوزىمنىڭ جاسىن قۇراپ.
ميىعىمنان كەتپەگەن مىسقىل كوشىپ،
يىعىمنان كەتپەگەن باسىم قۇلاپ...

ححح

ەرتە تۇردىم: بال جالعادىم،
ءوز ەنشىمدى ولجالادىم.
جەتى كۇنمەن جەتەكتەسىپ،.
ەتىگىممەن جول جاسادىم.

ححح

سىرتىم سىلاق، ءىشىم قۇراق،
ءوڭىم – ءوزىم، ءتۇسىم جىراق...
جورتا ءومىر كەشىپ كەلەم
جوقتان-باردان ءمۇسىن قۇراپ.

ححح

جىلاتساڭ دا ءوزىڭ ءبىل،
قۇلاتساڭ دا ءوزىڭ ءبىل،
جۇباتساڭ دا ءوزىڭ ءبىل:
مەن – قۇلىمىن سەزىمنىڭ!

ححح

تورعا تۇسكەن شەر كەۋدە
توت باسقانداي قاڭسيدى.
تاستاندىنى كورگەندە
تاس جۇرەك تە شانشيدى...

ححح

جازمىشىما قول سالما،
ەي، جالداپتىڭ قاسابى!
جاسامىستاۋ بولسام دا
ماحابباتىم جاس ءالى!

ححح

كەۋدە – كورىك،
كوز جاسىق،
كوڭىل الاڭ:
جەتكىنشەگىم جەتەسىز،
جەبىر امان.
تاققا مىنگەن قازاقتىڭ تاقىمى تار،
اتقا مىنگەن قازاقتىڭ كوبى نادان.

ححح

اقىن ادال تۋعانى ءۇشىن جازالى،
ەلدەن بۇرىن ەمەكسيدى اجالى.
ءجۇز جىل، مىڭ جىل قۋعىن-سۇرگىن كورسە دە
قۇلپىتاسقا جازىلادى عازالى!..

ححح

قارا باستىڭ قامى بىتپەي قارعاداي،
بايقاۋسىزدا باستان باقتىڭ اۋعانى-اي...
ەرىككەننىڭ ەرمەگىنە اينالعان
ەلىك پە ەدىڭ، جەلىك پە ەدىڭ، جالعان-اي؟

ححح

تارايدى تامىر بويلاپ شەر-شەمەنىم،
تابا الماي جانعا تىنىم تەڭسەلەمىن.
نە بولماق كوگىمدەگى سونسە كۇنىم؟
نە بولماق كەۋدەدەگى ولسە ولەڭىم؟..

ححح

اسىل مۇرات – مەندەگى جاسىل قۇراق...
كول جاسادىم كوزىمنىڭ جاسىن قۇراپ.
ميىعىمنان كەتپەگەن مىسقىل كوشىپ،
يىعىمنان كەتپەگەن باسىم قۇلاپ.

ححح

تۇسىنبەي وتەرسىڭ سەن مەنى:
اقىننىڭ شەڭبەرى
الەمنىڭ جەر، كوگى!
اقىننىڭ ورنەگى
"اركىمنىڭ" ەرمەگى.
شەر بۋعان كەۋدەنى
ەسىركەۋ ەم بە ەدى؟
مۇسىركەۋ ءجون بە ەدى؟
كوكتەگى كوڭىلدى
كوك سوققان جەرلەدى.
...تۇسىنبەي وتەرسىڭ سەن مەنى.

ححح

قايران، بابا!
قايران، دالا!
قايران، ەل..،
قانعا سىڭگەن قاسيەتتىڭ قاينارى ەڭ!..
ۇلى كۇندەر ەندى قايتىپ كەلەر مە،.
ۇلى جۇرتتا ۇلىسام دا ايعا مەن؟..

ححح

كەتكىم كەلەدى ءبىر جاققا...
قايدا بارامىن؟
جۇلدىزعا كوزىم تەلمىرىپ،
ايعا قارادىم.
قاھاندى قاشان ىشىمنەن سايلاپ الامىن؟
جاھاندى قاشان كۇشىممەن جاۋلاپ الامىن؟!
ماڭدايىمنان اققان تەر
تاڭدايىمدى ءجىبىتتى.
سەندەلىسپەن وتكەن كۇن
سەرىك ەتتى ءۇمىتتى.
مىناۋ ءفاني جالعاندا
ەت-جۇرەگى ەزىلىپ
كىمدەر مەنى ەسكە الدى؟
كىمدەر مەنى ۇمىتتى؟..

ححح

قىس قويناۋعا تىعىلدى،
جاز جايلاۋعا ۇزاردى.
اتقان تاڭىم ۇيالدى،
باتقان كۇنىم قىزاردى.
اي تاباعى دوڭگەلەپ ءاسپانتوردىڭ توسىندە،
قاز داۋىستى قايتقان قۇس قايتالادى مۋزامدى.

ححح

جاتا بەرسەڭ – جامباسىڭنان ءشىريسىڭ،
قۇردىمعا ەنىپ،
قۇمعا ءسىڭىپ قۇريسىڭ...
كوزمونشاعىڭ كوگەنىنەن جامىراپ،
كونە جۇرتتا كوشتەن قالعان ءبىر ءۇيسىڭ.
سەرگەك جۇرسەڭ، سەزىنەسىڭ كۇن ءيسىن،
ساياق جۇرسەڭ، ساعان باسىن كىم ءيسىن؟!
ەندى قاشان ەمەشەگىڭ ەزىلىپ،
ەندى قاشان جۇرەگىڭمەن ءجىبيسىڭ؟

ححح

اققۋ – مۇڭىم، قاز – ارمانىم،
ولەڭ، ولمە!
ءان، جاسا!
"عاسىرناما" جازا المادىم،
"عاشىقناما" بولماسا...

ححح

قۇلدىق ۇرعان ءجامي جان
اللا ءسوزى – كاليماڭ ءھام قاعيداعاڭ.
كالام جاقتىڭ اشىلادى قاقپاسى،
ادامزاتتىڭ ءانى بولسا ار، يمان!

ححح

ورىندالماس تىلەكتىڭ
ومىراۋىن بويا، تاڭ.
ۇيىقتاپ جاتقان جۇرەكتىڭ
قايسىبىرىن وياتام؟..

ححح

بايتەرەكتەي سايا بولمايدى،
بايلاۋلى اتتا جايا بولمايدى.

ححح

جايشىلىقتا ءبارى جاقىن،
قايشىلىقتا ءبارى جاۋ...
قازاق بولىپ بۇل قازاقتى
قاسىرەت قوي تانىماۋ؟..

ححح

تۇندىك جاۋىپ،
كورىپ پە ءتۇس قاشقاندى:
الماتىدا ءبىر كۇندە قىس باستالدى.
اسپان جايىپ سىپىرا،
ەلگەزەرمەن
ۇن ەلەگەن اناما ۇقساستاندى.

ححح

كوڭىل كىرى – قۇمالاق،
باقىر باستا كۇنا كوپ...
ەلدىڭ ءسوزى – ەبەلەك،
كوپتىڭ كوزى سۇعاناق.

ححح

كەشەگىنىڭ قازاعى:
سالت ءجۇرىستى، ساباۋ قامشى.
بۇگىنگىنىڭ قازاعى:
شالت ءجۇرىستى، جاداۋ-جالپىلى.

ححح

تىلدەن بۇرىن ءدىل سويلەسە،
ول – ادامنىڭ سۇڭقارى!
دىلدەن بۇرىن ءتىل سويلەسە،
ول – ادامنىڭ سۇمپايى.

ححح

وزگەرمەيتىن دالانىڭ دارا زاڭى:
ءتان سەمىرسە – باستالار جان ازابى.
ەكەۋىنىڭ ەسەبىن تابا الماساڭ،
ءوز-وزىنە وقي بەر جانازانى.

ححح

ەل مەن ەلدى ەر قوسار،
اسقىنعان دەرتتى ەم باسار.
اي مەن كۇندى كۇندەسە،
كوكتىڭ دە كوزىن شەل باسار.

ححح

قاناتىڭ قايدا، قۇسىم-اۋ، قاناتىڭ قايدا؟
كۇتپەيتىن جۇمىس،
بىتپەيتىن ءبىر ءىس قالا تۇرماي ما؟
...كەزەككە تۇرىپ.
كانەكي، كەشىگىپ جۇرسەك
پەندەنىڭ ءبارى تۇبىندە باراتىن جايعا...

ححح

پاقىرىم كوپ تە پارقىم از،
جاتىرىم كوپ تە جالپىم از.
التى الاشتىڭ بالاسى–
"اۋەلەپ ۇشقان التى قاز"...

ححح

جانىڭدا اقىن جۇرسە،
كوزىڭە پەرىشتە ەلەستەيدى...

ححح

ونبەسىندە بالقىماسا – ايعا سىن.
كوڭىلدىڭ دە كىر شالادى ايناسىن.
تاس ورنىنا ار مەن التىن تاپ كەلسە،
تارازىنىڭ تاڭدار ەدىڭ قاي باسىن؟

يسرايل ساپارباي

Abai.kz

8 پىكىر

ۇزدىك ماتەريالدار

انىق-قانىعى

جاقيانوۆ: ماعان اشىق جالا جابۋعا كىرىستى...

عالىمجان جاقيانوۆ 3142
ايقاي

ەلدە ۇلتتىق يدەولوگيا وتە ءالسىز...

بەيسەنعازى ۇلىقبەك 1914