2022 جىلعىڭ 9 ايىندا قازاقستاندا 2075 ادام جوعالعان. حابارسىز كەتكەن ادامداردى ىزدەۋ بارىسى تۋرالى قر ءىىم كريمينالدىق پوليتسيا دەپارتامەنتى اسا ماڭىزدى ىستەر جونىندەگى اعا جەدەل ۋاكىلى نۇرلان تەمىرباەۆ مالىمەت بەردى.

«قازىرگى ۋاقىتتا جوعالعان ادامداردى ىزدەستىرۋدە زاماناۋي تەحنيكالىق قۇرالدار ءتيىمدى پايدالانىلۋدا. دەگەنمەن تەحنيكالىق قۇرالداردى پايدالانۋ تۋرالى اقپارات قۇپيا ياعني جاريالاۋعا جاتپايدى. قازاقستان رەسپۋبليكاسى باس پروكۋراتۋراسى قۇقىقتىق ساتيستيكا جانە ارنايى ەسەپكە الۋ كوميتەتىنىڭ مالىمەتى بويىنشا بيىل 9 ايدا 2075 ادام حابار-وشارسىز كەتكەن. ونىڭ ىشىندە 1189 ادامنىڭ قايدا جۇرگەنى انىقتالدى، ال قالعان 801 ادامدى ىزدەۋ جالعاسىپ جاتىر»، - دەدى نۇرلان تەمىرباەۆ قر ءىىم-دە وتكەن ءباسپاسوز ءماسليحاتىندا.

ونىڭ ايتۋىنشا، بيىل ەلىمىزدە 9 ايدىڭ ىشىندە 186 كامەلەت جاسىنا تولماعان بالا جانە جاسوسپىرىمگە ىزدەۋ جاريالاندى.

«بۇگىندە 176 حابار-وشارسىز جوعالعان كامەلەتكە تولماعانداردىڭ مەكەنى انىقتالدى. 6 جاسوسپىرىمگە ىزدەستىرۋ ءالى ءجۇرىپ جاتىر. ونىڭ ىشىندە شىمكەنت قالاسى – 2, الماتى قالاسى - 1, الماتى وبلىسى – 1, جەتىسۋ وبلىسى – 1, تۇركىستان وبلىسى - 1 ءجاسوسپىرىم»، - دەيدى ول.

Abai.kz