بۇگىن بيلىكتەگى باسىمدىققا يە، بۇرىنعى «نۇر وتان»، قازىرگى «امانات» پارتياسى استانادا سيەز وتكىزدى. سيەزدىڭ باستى مىندەتى – سايلاۋالدى باعدارلامانى جاريالاپ، پرەزيدەنتتىككە ۇمىتكەر ۇسىنۋ بولعان. ۇسىندى.

ال كەشە پرەزيدەنت توقاەۆ ءماشھۇر ءجۇسىپتىڭ ەلىنە، كەرەكۋگە ساپارلاپ بارعان. سول جاقتاعى جۇرتپەن كەزدەسۋ كەزىندە سايلاۋعا كىمنىڭ اتىنان تۇسەتىنى تۋرالى ايتقان.

«الداعى سايلاۋعا قانداي ۇيىمنان قاتىساتىنىما قوعام قىزىعۋشىلىق ءبىلدىرىپ وتىرعانىن بىلەمىن. اشىعىن ايتايىن، ماعان ءارتۇرلى رەسپۋبليكالىق بىرلەستىكتەر مەن پارتيالاردان ولاردىڭ اتىنان ۇمىتكەر بولۋ تۋرالى ۇسىنىستار ءتۇسىپ جاتىر...

مەن بەلگىلى ءبىر ۇيىمنان ەمەس, ەلىمىزدە جۇرگىزىلىپ جاتقان رەفورمالاردىڭ الەۋمەتتىك نەگىزىن قالىپتاستىراتىن قوعامدىق-ساياسي كۇشتەردىڭ ۇلكەن كواليتسياسىنىڭ اتىنان سايلاۋعا قاتىسقانىم دۇرىس بولادى دەپ ويلايمىن. سونداي-اق بۇل مەملەكەت باسشىسىنىڭ ءتۇرلى پارتيالاردان، بىرلەستىكتەردەن تەڭ اراقاشىقتىق ساقتاۋ قاعيداتىن نىعايتۋعا مۇمكىندىك بەرەدى.

سايلاۋ ناۋقانىن زاڭداردى قاتاڭ ساقتاي وتىرا وتكىزۋدى قامتاماسىز ەتۋ ماڭىزدى. مەن مەملەكەت باسشىسى رەتىندە پرەزيدەنت سايلاۋىنىڭ ءادىل ءارى اشىق وتەتىنىنە كەپىلدىك بەرەمىن»، - دەپ سويلەگەن.

وسىدان كەيىن «امانات كىمدى ۇسىنادى؟» دەگەن ساۋال ەل ىشىندە قىزۋ تالقى بولدى. ويتكەنى، پرەزيدەنت توقاەۆ «اماناتتىڭ باستى ۇمىتكەرى» سانالىپ كەلگەن. ال بيلىك پارتياسىنىڭ وكىلدەرى، سەنات توراعاسى ماۋلەن اشىمباەۆ تا, ءماجىلىس توراعاسى ەرلان قوشانوۆ تا سايلاۋعا ۇمىتكەر بولۋدان باس تارتقان.

بۇگىن سيەز وتكىزگەن «امانات» سوندا دا: «پرەزيدەنت توقاەۆتان وزگە لايىقتىنى كورە المادىق»، - دەپ مالىمدەدى. ۇمىتكەر رەتىندە توقاەۆتى اتادى.

«مەملەكەت الدىنا تۇرعان ۇلى ماقساتتارعا قول جەتكىزۋ ءۇشىن بىزگە لايىقتى كوشباسشى كەرەك. سوندىقتان پرەزيدەنتتىك ۇمىتكەر رەتىندە قاسىم-جومارت كەمەلۇلى توقاەۆتى ۇسىنامىن. سيەز دەلەگاتتارى ءبىراۋىزدان قولدايدى سەنەمىن. الداعى 20 قاراشا ەلىمىزدىڭ ساياسي ومىرىندە تاريحي وقيعا بولارى انىق. ءدال سول كۇنى قازاقستان حالقى ءوز تاڭداۋىن جاسايدى. بۇل سايلاۋ ادىلەتتى قازاقستاننىڭ باعىت باعدارىن ايقىندايدى»، - دەدى قوشانوۆ.

ەل كۇتكەندەي ينتريگا بولمادى. ءتامام.

ۇمىتكەر دەمەكشى، تاڭداۋى توقاەۆقا تۇسكەن جالعىز «امانات» ەمەس. وسىعان دەيىن پرەزيدەنت توقاەۆتى پرەزيدەنتتىككە ۇسىنىپ قويعاندار جەتەرلىك. سولاردىڭ ءبىر سىپىراسى:

5 قازان: قر ازاماتتىق اليانسى پرەزيدەنت توقاەۆتى پرەزيدەنتتىككە ۇسىندى. اليانس بۇل ۇسىنىستى ءبىراۋىزدان قولدادى.

5 قازان: ەكس-دەپۋتات ءھام ەكس-اكىم باقتىقوجا ىزمۇحامبەتوۆ باسقاراتىن  قر «ارداگەرلەر ۇيىمى» دا سيەز وتكىزىپ: «بىزگە قازىرگى ۋاقىتتا الەمدىك ساياساتتىڭ شارتتارىن جاقسى تۇسىنەتىن، قاجەت بولعان جاعدايدا باتىل شەشىم قابىلداي الاتىن ساياسي تۇلعا قاجەت. قاسىم-جومارت توقاەۆ - مىقتى ساياساتكەر»، - دەدى. 101 دەلەگات ءبولىنىپ-جارىلىپ جاتپادى.

5 قازان: «ۇلتتىق ۆولونتەرلىك جەلى» جاستارى دا جيىن وتكىزدى. «پرەزيدەنت توقاەۆ ۆولونتەرلەردى قولداپ كەلەدى. ءبىز دە توقاەۆتى قولدايمىز. ۇمىتكەرلىككە ۇسىنامىز»، - دەدى.

5 قازان: «قازاقستان ءماسليحاتتارىنىڭ دەپۋتاتتارى» بىرلەستىگىنىڭ وتىرىسى ءوتتى. ولار دا پرەزيدەنتتىككە لايىقتى بىردەن-ءبىر ادام – قاسىم-جومارت توقاەۆ دەپ تاڭدادى.

ال نازارباەۆتىڭ كولەڭكەسىندە ءوسىپ-جەتىلگەن ەرمۇحامەت ەرتىسباەۆ باسقاراتىن بۇرىنعى كوممۋنيستەر، قازىرگى «قازاقستان حالىق پارتياسى» ەلدەن بۇرىن پرەزيدەنت توقاەۆتى قولدايتىندارىن جاريالاپ قويعان.

«قازاقستان حالىق پارتياسى مەملەكەت باسشىسىنىڭ بۇگىنگى جولداۋىندا جاريالانعان ساياسي وزگەرىستەرگە تولىق قولداۋ بىلدىرەدى. كەزەكتەن تىس پرەزيدەنت سايلاۋىندا، ءبىز بۇرىن مالىمدەگەندەي، قازىرگى مەملەكەت باسشىسى قاسىم-جومارت توقاەۆتىڭ كانديداتۋراسىن قولدايمىز»، - دەلىنگەن پارتيانىڭ مالىمدەمەسىندە.

الايدا قىلىزدار پارتياسى باستاپقى سوزىنەن اينىپ قالعان كورىنەدى. بۇگىن سيەز وتكىزەدى. باستى مىندەت – پارتيا اتىنان پرەزيدەنتتىككە ۇمىتكەر ۇسىنۋ بولماق.

ال ازىرگە بەلگىلى بولعانى ەكى ۇمىتكەر. ءبىرى - «اۋىلدىق» جيگۋلي دايراباەۆ بولسا، ەكىنشىسى - «جسدپ-لىق» نۇرلان اۋەسباەۆ.

سيەز وتكىزىپ، ۇمىتكەر تاڭدايتىنداردىڭ تاعى ءبىرى – ماجىلىستەگى «اق جول» پارتياسى. پارتيا وسىعان دەيىن مىندەتتى تۇردە ۇمىتكەر ۇسىناتىنىن ايتقان.

ال وپپوزيتسيالىق كواليتسيا ازىرگە ۇمىتكەر ۇسىنعان جوق.

قوعامدىق ۇيىمداردىڭ ءبىرىنىڭ ءىزىن الا ەكىنشىلەرى پرەزيدەنتتىككە توقاەۆتى ۇسىنىپ جاتقانىنا قاراپ، بارلىعى: «توقاەۆتان جوق وزگە»، - دەپ جاتقانداي اسەر الاسىڭ...

Abai.kz