مەن مىنا حاباردى ەسىتىپ، قاتتى مازام كەتىپ وتىر. وسى جاقىندا عانا، بىرەر كۇننىڭ شاماسىندا، رەسەيدىڭ ومبى قالاسىندا بىرەۋلەر وسىنداعى اسكەري كوميسسارياتقا ءورت قويىپتى.

ءبىر قاراعاندا، مۇنى ورىستاردىڭ ىشىندەگى ۋكرايناداعى سوعىسقا قارسىلىق بىلدىرگەندەردىڭ ءىسى ەكەن دەپ قالدىق. ىشتەي قۋانعانىمىز راس. الايدا، «باقساق - باقا ەكەن» دەگەندەي بۇل «ەرەكشە ەرلىكتى» جاساعان ءوزىمىزدىڭ قازاقتار ەكەن. قازاق بولعاندا رەسەيدىڭ قازاعى ەمەس، ءوزىمىزدىڭ قازاقستاننان ارنايى بارعان قازاقتىڭ قوس جىگىتى.

رەسەي ءباسپاسوزىنىڭ جازۋىنا قاراعاندا، بۇل ەكى ازامات ۋكراين بلوگەرىنىڭ «مۇنى جاساساڭدار ەكەۋىڭە 800 مىڭ رۋبل بەرەمىن» دەگەن سوزىنە سەنسە كەرەك. بۇلاردىڭ اتى-جوندەرىن دە الاقايلاپ حابارلاپ وتىر. بىرەۋى - اڭساعان مولداحمەتوۆ تە، ەكىنشىسى - سەيىل دياس دەگەن جاپ-جاس جىگىتتەر كورىنەدى. نە دەگەن وپەراتيۆتىلىك دەسەڭىزشى. ءبىر قىزىعى كوميسساريات تا ونشا زارداپ شەكپەگەن. ورتەۋشىلەر دە جەدەل ۇستالعان. تەك تۇسىنىكسىزدىگى، ولار مۇنداي مول اقشانى الدى ما، المادى ما، بەلگىسىز. بەلگىلىسى - بۇل ەكەۋى دە بىردەن ۇستالىپ، ەندى ولار «لاڭكەستىك ارەكەت جاسادى» دەگەن ايىپپەن ارقايسىسى 15-20 جىلدى ارقالاپ كەتە بارادى ەكەن.

ەندى بۇلاردىڭ وسى ارەكەتى نەگە اكەلىپ سوقتىرادى دەيسىزدەر عوي. بىرىنشىدەن، ونسىز دا ءبىزدى جاۋ سانايتىن رەسەي پروپوگاندوندارىنىڭ قۇدايى بەرىپ قالادى. «قازاقتار ۋكراين ۇلتشىلدارىنا ەندى اشىقتان-اشىق كومەكتەسىپ، بىزگە قىر كورسەتىپ جاتىر»، دەپ داۋرىعىپ شىعا كەلەرى انىق. ەكىنشىدەن، ونداعى ۇرىنارعا قارا تابا الماي جۇرگەن شوۆينيستەردىڭ جەرگىلىكتى قازاقتارعا اشىقتان-اشىق جاۋلىق تانىتۋى ابدەن مۇمكىن. ۇلى دەرجاۆالىق شوۆينيزم سىرقاتىنا ۇشىراعان توبىردان ءبارىن دە كۇتۋگە بولادى. بۇلار ءۇشىن دوس دەگەن بولمايدى، اينالاداعىنىڭ ءبارى دە جاۋ. تۋىسقان دەرلىكتەي ۋكراين حالقىن اياماعان حالىقتان ءبارىن دە كۇتۋگە بولادى.

اباي بولايىق، اعايىن. ارانداتۋشىلىق ەشقاشان، ەشكىمگە دە ابىروي اپەرمەگەن. بۇزاقىلىقتى بىرەۋ جاسايدى دا، زاردابىن ەكىنشىلەرى تارتادى. حالقىڭنىڭ قامىن ويلساق، وسىنى ۇمتىتپالىق.

جايبەرگەن بولاتوۆ

Abai.kz