2025 جىلعا دەيىن قازاقستان رەسپۋبليكاسىنىڭ اۋماعىندا شەتەلدىك جوعارى وقۋ ورىندارىنىڭ كەمىندە 5 فيليالى مەن وكىلدىگى اشىلادى. بۇل جايىندا ءماجىلىس دەپۋتاتتارىنىڭ ساۋالىنا قر عىلىم جانە جوعارى ءبىلىم ءمينيسترى ساياسات نۇربەكتىڭ جاۋابىندا ايتىلعان.

«م.قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىن اريزونا ۋنيۆەرسيتەتىنە سەنىمگەرلىك باسقارۋعا بەرۋ تۋرالى ماسەلە پىسىقتالدى. وقىتۋ قازاق، ورىس جانە اعىلشىن تىلدەرىندە: ءبىلىم بەرۋ، IT, ينجەنەريا، اگرو-تەحنيكالىق جانە تاعى باسقا باعىتتار بويىنشا جۇرگىزىلەتىن بولادى. وقۋ جانە عىلىمي زەرتحانالاردى قۇرۋ جانە جاراقتاندىرۋ ارقىلى جوعارى وقۋ ورىندارىنىڭ زەرتتەۋ ەكوجۇيەسىن قالىپتاستىرۋدى كوزدەيتىن «اكادەميالىق ارتىقشىلىق ورتالىقتارى» جوباسى ىسكە اسىرىلۋدا. بۇدان باسقا، 2025 جىلعا دەيىن قازاقستان رەسپۋبليكاسىنىڭ اۋماعىندا شەتەلدىك جوعارى وقۋ ورىندارىنىڭ كەمىندە 5 فيليالى مەن وكىلدىگىن اشۋ جوسپارلانۋدا»، - دەدى مينيستر جاۋابىندا.

ونىڭ اتاپ وتۋىنشە، بۇل جوعارى وقۋ ورىندارىنىڭ عىلىمي جانە اكادەميالىق دامۋىن كۇشەيتۋگە، وزىق عىلىمي تاجىريبەنى ەنگىزۋگە، باسقارۋ جۇيەسىن ترانسفورماتسيالاۋعا جانە ءبىلىم بەرۋ مازمۇنى مەن وقۋ پروتسەسىنە الەمدىك ءبىلىم بەرۋ ستاندارتتارىن ەنگىزۋگە مۇمكىندىك بەرەدى.

«جىلدان جىلعا قازاقستاندىق جوعارى وقۋ ورىندارىنىڭ حالىقارالىق ءبىلىم بەرۋ كەڭىستىگىندەگى پوزيتسيالارى نىعايىپ كەلەدى. QS-2022 رەيتينگىندە 14 قازاقستاندىق جوو، Times Higher Education رەيتينگىندە 3 جوو ورىن الدى. ءال-فارابي اتىنداعى قازۇۋ-دىڭ قازاقستاندىق جوعارى وقۋ ورنى كەزەكتى رەت الەمنىڭ توپ-200 ۇزدىك ۋنيۆەرسيتەتتەرىنىڭ قاتارىنا ەندى (175-ورىن). ل.ن. گۋميلەۆ اتىنداعى ەۇۋ (328 ورىن) جانە م.اۋەزوۆ اتىنداعى وڭتۇستىك قازاقستان ۋنيۆەرسيتەتى (482 ورىن) سياقتى تاعى 2 ۋنيۆەرسيتەت QS رەيتينگىنىڭ توپ-500 قاتارىنا ەندى»، - دەدى ساياسات نۇربەك.

Abai.kz