دۇيسەنبى, 26 قىركۇيەك 2022
بۇ نە مازاق؟ 1790 2 پىكىر 27 شىلدە, 2022 ساعات 13:57

«قايرات» كلۋبى قازاق تىلىنە قارسى ما؟

«قايرات» فۋتبول كلۋبىنىڭ جۇرگىزۋشىسى ادىلەت بيساريەۆ ءوزىنىڭ ينستاگرام پاراقشاسىندا سپورت كلۋبىنىڭ قازاق ءتىلىن قىسپاققا العىسى كەلەتىنىن ايتتى. «قايرات» فك جۇرگىزۋشىنى 24 شىلدە كۇنى بەلگىسىز سەبەپپەن جۇمىستان شىعارىپ جىبەرگەن. ادىلەت بيساريەۆ مۇنى «قايرات» فك-نىڭ قازاق تىلىنە قارسى ەكەندىگىمەن تۇسىندىرەدى.

ونىڭ ايتۋىنشا، ءوزى جۇمىسقا كىرگەن 2019 جىلدان بەرى «قايرات» فك باسشىلىعىنىڭ قازاق تىلىنە دەگەن نەمقۇرايلىعىن بايقاعان. «قايراتتىڭ» جانكۇيەرلەرى قازاق تىلىندە ءان سۇراسا دا، ورتالىق ستاديوندا قازاق اندەرى قوسىلماعان. جۇرگىزۋشىگە ەشقاشان قازاق تىلىندە ستسەناري بەرىلمەگەن.

جۋرناليست باسشىلىقتان ءوزىنىڭ جۇمىستان شىعارىلۋ سەبەبىن سۇراعاندا، كلۋبتىڭ دەمەۋشىلەرىنىڭ ءبىرى «ودين حبەت» كونكۋرستى دۇرىس جۇرگىزبەگەنى ءۇشىن شاعىم تۇسىرگەنىن ەستىگەن.

ادىلەت بيساريەۆ «ودين حبەت» وكىلدەرىنە دە بارعان. الايدا ولار نە ءۇشىن شاعىم تۇسىرگەنىن ناقتى تۇسىندىرمەگەن.

«ولارمەن سويلەسكەندە مەن مىناداي ويعا كەلدىم: بۇل مەنىڭ ءوز ويىم. بۇل كىسىلەر قازاق تىلىنە قىسپاق كورسەتكىسى كەلەدى. قازاق تىلىنە قارسى ەكەنىنە كوزىم جەتتى. «تى ۆەدەش نا تويسكوم»، «ءاپ بارەكەلدى» دەيسىڭ دەيدى. «چتو تاكوە اديلەت اپ بارەكەلدي» دەيدى. ولار ماعان ءسوز سويلەۋگە مۇرشا بەرگەن جوق. بۇل مەنىڭ ءوز ويىم: بۇل – قازاق تىلىنە دەگەن قىسپاق، قارسىلىق. ەندى ويىن ورىسشا ءوتىپ جاتىر. سوندا ورىسشا تۇسىنبەيتىن قازاقتاردىڭ قامىن كىم ويلايدى؟ ءتىل ءۇشىن جانىم اشىپ تۇر. اللاعا شۇكىر، تابىسىم مول. ءوزىم ونەر ازاماتىمىن. «قايراتتا» ءتىل ماسەلەسى قيىن. «قايرات» كومانداسى ءوزىن حالىق كومانداسى دەپ تانىستىرعانىمەن، قازاق ءتىلىن مەنسىنبەيدى، بۇل مەنىڭ ءوز ويىم»، - دەدى ول.

ادىلەت بيساريەۆ مادەنيەت جانە سپورت ءمينيسترى داۋرەن اباەۆقا، قۇزىرلى ورگاندارعا «قايراتتى» ءتىل ماسەلەسى بويىنشا تەكسەرۋدەن وتكىزىپ، ەگەر ءوزى ايتقان ماسەلەلەر راستالسا، جاۋاپتى ادامداردى جازاعا تارتۋىن سۇرادى.

ايجان تەمىرحان

Abai.kz

2 پىكىر