دۇيسەنبى, 26 قىركۇيەك 2022
ارىلۋ 2130 3 پىكىر 6 شىلدە, 2022 ساعات 14:42

تسەلينوگراد دەگەن اتاۋلاردان قاشان ارىلامىز؟

وسىدان ءبىراز جىلدار بۇرىن، كەزىندەگى تسەلينوگراد اتاۋىن اقمولا وبلىسى دەپ  وزگەرتكەندە، تسەلينوگراد اۋدانىنىڭ اتى سول كۇيىندە وزگەرىسسىز قالدى. نەگە جانە نە ءۇشىن وسىلاي قالدىرعانىن تۇسىنبەدىك.

الدە، سولتۇستىكتەگى كورشىمىزدەن نەمەسە ءوز ىشىمىزدەگى ورىس ءتىلدى قاۋىم وكىلدەرىنەن سەسكەندىكپە؟! ءبىر ءىستى باستاعان سوڭ، اياعىنا دەيىن نەگە تولىق اتقارا المايمىز وسى؟!

تسەلينوگراد اتاۋى بۇرىنعى ن. حرۋششەۆتىڭ سولاقاي، ۇستەم ساياساتىن ەلەستەتپەيمە. سونىڭ اقىماقتىعىنان سولتۇستىك وبلىستارىمىزدان ايىرىلىپ قالا جازدادىق ەمەس پە؟! ەگەر، جۇمابەك تاشەنوۆ بولماعاندا... ءتىپتى،  وسى اۋداندى وسى كىسىنىڭ اتى-جونىمەن دە اتاعاندا ارتىق بولماس ەدى!

سول سياقتى، تالايدان ءسوز بولىپ كەلە جاتقان ۇيعىر اۋدانىنىڭ اتىن دا، سول وڭىردەگى شارتاراپقا اتى كەتكەن شارىننىڭ نەمەسە وسى وڭىردەگى قازاقتاردىڭ اۋىزىنداعى قارادالا اتاۋىمەن دە اتاعاندا بولار ەدى عوي.

ءبىزدىڭ ارينە، بۇل  ۇلتتىڭ وكىلدەرىنە ەش جاماندىعىمىز جوق. بۇلاردىڭ اراسىندا دا ازاماتتىق قاسيەتى مول ازاماتشالار مەن ازاماتتار كوپتەپ كەزدەسەدى. دەگەنمەن، الداعى ۋاقىتتاعى ۇلتىمىزدىڭ جانە ەلىمىزدىڭ بولاشاعىن ويلاعانىمىز ءجون ەمەس پە؟..

ەلىمىزدەگى وزگە ۇلت وكىلدەرى سەكىلدى، بۇلاردا ۇلت وكىلدەرى عانا. تۇتاس ۇلت ەمەس، بىزدەردەگىسى وكىلدەرى عانا بولعان سوڭ، وسىلاي ىستەگەن ءجون بولار ما ەدى؟.. دەموگرافيالىق ءدۇمپۋى جوعارى بولعان سوڭ، الداعى ەلىمىزدىڭ جاعدايىن ويلايسىڭ.   ۇلتتىق تىلىندە وقي بەرسىن، ولاردا شاتاعىمىز جوق. قايتا، ءتىلىن جوعالتپاعانى  دۇرىس! سىيلاستىقپەن، دوستىقپەن تۇرمىس كەشكەنگە نە جەتسىن.

سونىمەن قاتار، تاعى ءبىر ايتارىمىز، بۋراباي اۋدانىنىڭ ورتالىعى ششۋچينسك قالاسىنىڭ اتىن دا، بۋراباي قالاسى دەپ وزگەرتكەندە تولىققاندى بولار ەدى. وسى اۋداننىڭ اۋماعىندا ءبىر كەزدەرى قازاقتىڭ ۇلى حانى ابىلايدىڭ بيلىك جۇرگىزۋ  ورداسى تۇردى ەمەس پە. سوندىقتان، وزگە تىلدەگىدەن گورى، قازاقشا اتاۋى بولعاندا، وڭدى بولار ەدى دەپ ويلايمىز.

بەيسەنعازى ۇلىقبەك،

قازاقستان جۋرناليستەر وداعىنىڭ مۇشەسى

Abai.kz

3 پىكىر