وتكەن اپتا سوڭىندا كۇللى دۇنيەجۇزى حالقىنىڭ نازارى وزبەكستان قۇرامىنداعى قاراقالپاقستاندا بولدى. وزبەكستان پرەزيدەنتى شاۆكات ميرزيوەۆتىڭ بيلىگىن ۇزارتاتىن ءھام قاراقالپاقستاندى رەسپۋبليكا ستاتۋسىنان ايىراتىن كونستيتۋتسيالىق رەفورمالارعا قاراقالپاق حالقى قارسى شىقتى.

بەيبىت نارازىلىقتاردىڭ ارتى قاندى قاقتىعىسقا ۇلاستى. پرەزيدەنت ميرزيوەۆتىڭ ءوزى نوكىسكە جەدەل ۇشىپ بارىپ، قاراقالپاقستاننىڭ ستاتۋسى وزگەرمەيتىنىن ايتتى. ونان سوڭ وزبەكستاننىڭ قۇزىرلى بيلىگى نارازى حالىقتى كۇشپەن تاراتۋعا ارەكەت ەتتى. الەۋمەتتىك جەلىلەردە جارالانعان جانە قانسىراپ جاتقان ادامداردىڭ بەينەلەرى تارادى.

بۇگىن وزبەكستان نوكىستەگى نارازىلىقتار كەزىندە قانشا ادامنىڭ قازا تاپقانىن جاريالاپتى. 243 ادام جارالانىپ، 18 ادام قازا تاپقان دەيدى رەسمي اقپارات. ولاردىڭ 94-ءى ءالى اۋرۋحانالاردا جاتىر ەكەن. بۇل وزبەكستاننىڭ باس پروكۋرۋتۋراسى مەن ۇلتتىق گۆاردياسى تاراتقان اقپارات. سونىمەن قاتار، جاپپاي تارتىپسىزدىكتەرگەن قاتىستى دەگەن سەبەپپەن 516 ادام تۇتقىندالعان.

«1-2 شىلدەدە 516 ادام ۇستالىپ، تەرگەۋ جۇرگىزىلىپ جاتىر. قالعان ازاماتتارعا اكىمشىلىك شارا قولدانىلعان جانە ۇيلەرىنە جىبەرىلگەن»، - دەيدى وزبەكستان ۇلتتىق گۆاردياسىنىڭ ءباسپاسوز حاتشىسى داۆرون جۇمانيازوۆ.

قاراقالپاقستاندا جالپىحالىقتىق نارازىلىقتار 1 شىلدەدە باستالدى. رەسپۋبليتكادا ينتەرنەت تولىقتاي ءوشىرىلدى. وسىدان كەيىن پرەزيدەنت ميرزيوەۆ نوكىسكە ۇشىپ كەلىپ، وزبەكستان كونستيتۋتسياسىنا ەنگىزىلەتىن وزگەرىستەردى تالقىلاۋ مەرزىمىن ۇزاراتىنىن جانە ونداعى قاراقالپاقستاننىڭ ستاتۋسى ساقتالاتىنىن مالىمدەدى. ميرزيوەۆتىڭ وسى كەلىسىنەن سوڭ، قاراقالپاقستاندا 3 تامىزعا دەيىن توتەنشە جاعداي جاريالاندى.

Abai.kz