بيىل «قازمۇنايگاز» ىشكى بيرجالاردا ءوز اكتسيالارىن ساتادى. «تىكەلەي جازىلۋ» ادىسىمەن وسى اكتسيالاردى «Tabys» ءموبيلدى قوسىمشاسى نەمەسە «قازپوشتانىڭ» بولىمشەلەرى ارقىلى ساتىپ الۋعا مۇمكىندىك بەرىلمەك. پرەزيدەنت وسىنداي تاپسىرما بەرگەندەگى باستى يدەيا - حالىق تا مۇنايدىڭ قىزىعىن كورۋى كەرەك.

وسى اكتسيالار بىزگە ناقتى پايدا بەرە مە؟

بۇل سۇراققا جاۋاپ بەرۋ ءۇشىن 2-3 جىلعا ارتقا شەگىنۋ كەرەك. ءبىز «قازمۇنايگازدىڭ» تۋرا «قازاتومپرومنىڭ» جولىمەن كەلە جاتقانىن كورىپ وتىرمىز. ەندەشە ءوزىمىزدىڭ وتاندىق AIX بيرجاسىندا 2018 جىلدان باستاپ قازاتومپرومنىڭ اكتسياسىن ساتىپ العاندار تابىسقا كەنەلدى مە، وسىنى تەكسەرەيىك.

«قازاتومپروم» 2018 جىلى 14 قاراشادا IPO-عا شىعىپ، 15 پايىز اكتسياسىن ساتتى. سول كۇنى AIX بيرجاسىندا ونىڭ ءبىر اكتسياسى 4530 تەڭگەگە ساتىلعان بولاتىن. ەندى بۇگىنگى جاعداي بويىنشا ءدال وسى بيرجادا «قازاتومپروم» اكتسياسى 12 135 تەڭگە تۇرادى. ياعني اكتسيالار 2,6 ەسەگە قىمباتتاعان.
ال ەندى ءسىزدىڭ تابىسىڭىزدى ەسەپتەپ كورەيىك. ءسىز 2018 جىلى 4530 تەڭگەگە 1 اكتسيا ساتىپ الدىڭىز دەيىك. 2019 جىلدىڭ قورتىندىسى بويىنشا سىزگە ءدال سول اكتسياعا 381,72 تەڭگە ديۆيدەند تولەندى. 2020 جىل بويىنشا 578,67 تەڭگە، ال 2021 جىلدىڭ قورتىندىسىنان 876,74 تەڭگە ديۆيدەند الدىڭىز. سوندا ءۇش جىلدىڭ ديۆيدەندىن قوسساق 1837,13 تەڭگە شىعادى. ەگەر ءدال قازىر ءسىز سول ءبىر اكتسياڭىزدى 12 135 تەڭگەگە ساتساڭىز، ديۆيدەندتەردى قوسقاندا تازا 9 442,13 تەڭگە پايدا تاپتىڭىز.

مىڭ اكتسيانى 4 530 000 تەڭگەگە ساتىپ الساڭىز، ۇستىنەن 9 442 130 تەڭگە تازا پايدا كورەر ەدىڭىز. ەگەر سول 4 530 000 تەڭگەنى ورتاشا 14 پايىزبەن بانك دەپوزيتىندە 2 جىل ۇستاساڭىز، ءتىپتى اي سايىنعى كاپيتاليزاتسياسىن قوسقاندا ءسىز 1 455 209 تەڭگە تازا پايدا تاباسىز. سوندا «قازاتومپروم» اكتسياسىنان تۇسكەن كىرىس بانك دەپوزيتى پايداسىنان 6 ەسە (!) ارتىق بولىپ تۇر.
قارجىلىق ساۋاتى مىقتى ازاماتتاردىڭ اكتسيالار نارىعىندا ينۆەستيتسيا جاسايتىنى دا سوندىقتان.

ايبار ولجاەۆ

Abai.kz