سەيسەنبى, 28 ماۋسىم 2022
46 - ءسوز 708 1 پىكىر 17 مامىر, 2022 ساعات 14:40

قوعام شىندىققا تۋرا قاراي المايدى

قر كونستيتۋتسياسىنىڭ 33 بابىنا 56 تولىقتىرۋلار مەن وزگەرىستەر ەنگىزۋ بويىنشا رەفەرەندۋم وتەيىن دەپ جاتىر. مەنى تاڭقالدىراتىن ءبىر جاعداي بار. وسىنشا 33 باپقا 56 وزگەرىس ەنگىزۋ بويىنشا جان-جاقتى ءتۇسىندىرۋ جۇمىستارى نەگە كەشەندى تۇردە جۇرگىزىلمەي جاتىر؟ بۇل رەسپۋبليكانىڭ تاعدىرىن شەشەتىن كونستيتۋتسياعا وزگەرىس قوي.
سوندا حالىق ەرتەڭ رەفەرەندۋمدا وسىنشاما وزگەرىستەرگە ءبىر بيۋللەتەنمەن ءبىر ءتۇرتىپ جاۋاپ بەرە سالا ما؟
وتە قيسىنسىز.

ەكىنشىدەن، قوعامنىڭ رەفەرەندۋممەن شارۋاسى جوق. رەفەرەندۋم وتەدى، دايىن بولايىق دەگەن بۇقارانى كورىپ تۇرعان جوقپىن. مۇنى قاپەرىنە ىلمەگەن قوعام كونستيتۋتسياداعى 33 باپتىڭ 56 جەرىنە تولىقتىرۋلار مەن وزگەرىس ەنەتىنىنە، اربىرىنە ءۇڭىلىپ قاراۋعا قۇلىق تانىتادى دەپ ويلايسىز با؟ كەزىندە نازارباەۆتىڭ ءاربىر جولداۋىن كونستيتۋتسيادان جوعارى قويىپ، حالىققا ءتۇسىندىرۋ ءۇشىن بارىن سالاتىن شابارماندار ءدال وسى جولى نەگە پاسسيۆ؟ استارى بەلگىلى.

ۇشىنشىدەن، رەفەرەندۋم وتەتىن ۋاقىت ءبىر قادام جەردە تۇر. كوزىڭدى اشىپ جۇمعانشا كەلە سالادى. نەگە سونشا تاقاپ قويعان؟ كىم قايدا قاراپ ۇلگەرە الادى؟ مۇنى ويلاعان ادامدار بار ما؟ نەگە ەلدىڭ تالقىسىنا تۇسپەيدى؟ ءدال مىناۋ كەسەلى اۋىر قوعامعا ءبىراز ۋاقىت بەرىپ، كەشەندى ءتۇسىندىرۋ جۇمىستارىن جۇرگىزۋگە قانداي كەدەرگى بولىپ تۇر؟ شىنىمدى ايتسام، تاڭ قالىپ وتىرمىن.
مىناۋ تىرلىكتەردەن دۇرىس ناتيجە بولمايدى. الدىن-الا ايتا سالايىن.
جالپى، بىزگە قانداي دۇرىس باسشى كەلسە دە نازارباەۆ سياقتى ناعىز ديكتاتور بولادى. وعان ەڭ الدىمەن قوعامنىڭ ءوزى ۇلەس قوسادى، جول بەرەدى.
شىنىن ايتايىن، مىناۋ قوعام تۇتاس جويىلىپ كەتسە دە، شىندىققا ەشقاشان تۋرا قاراي المايدى. ارام سايلاۋ وتكىزەتىن قىلمىسكەر مۇعالىمدەردى اقتاۋ ءۇشىن بارىنە بارىپ تۇرعان قوعامنان ەشتەڭە كۇتپەي-اق قويساق بولادى.

بەكبولات قارجان

Abai.kz

1 پىكىر