رەسەي بيلىگى ۋكرايناداعى سوعىستا تاجىكستاننىڭ فايزاباد اۋدانىندا تۋىپ-وسكەن 25 جاستاعى جاۋىنگەردىڭ قازا بولعانىن مالىمدەدى.

تۋىستارىنىڭ ايتۋىنشا، مارقۇم اليجون سافاروۆ كوپ جىلدان بەرى ورىس ارمياسىندا قىزمەت ەتىپ جۇرگەن، بىراق ۋكرايناداعى سوعىسقا اتتانعانىن بىلمەگەن.

ورىس بيلىگى تاراتقان مالىمەتكە قاراعاندا، سافاروۆ 8 مامىردا قازا بولعان. ازىرگە ونىڭ ۋكراينانىڭ قاي جەرىندە قايتىس بولعانى، ونىڭ سۇيەگىن تاجىكستانعا جەتكىزەر-جەتكىزبەسى بەلگىسىز.

23 ساۋىردە بارناۋل قالاسىندا تاجىكستاندا تۋىپ-وسكەن ورىس ارمياسىنىڭ 24 جاستاعى جاۋىنگەرى ابۋباكر نوزيموۆتىڭ سۇيەگى جەرگە بەرىلگەن. جاكىندارىنىڭ ايتۋىنشا، ول ۋكرايناداعى سوعىسقا 15 اقپاندا اتتانىپ، 12 ساۋىردە حاركوۆ قالاسىن قورشاۋعا الۋ كەزىندە جەلكەسىنە وق ءتيىپ، قازا بولعان.

ۋكراينادا ءۇش ايعا جاقىن ۋاقىتتان بەرى جالعاسىپ جاتقان سوعىسقا تاجىكستاندا تۋىپ-وسكەن قانشا اسكەر قاتىسىپ جاتقانى بەلگىسىز. سودان بەرى ورىس ارمياسىندا قىزمەت ەتكەن ونداعان تاجىك تەكتى جاۋىنگەردىڭ قازا بولعانى راستالدى.

جاقىندا ۋكراين باسىلىمدارى سوعىسقا قاتىسىپ جاتقان رەسەيلىك اسكەريلەردىڭ ءتىزىمىن جاريالاعان. وندا ورتالىق ازيا ەلدەرىندە تۋىپ-وسكەن 6 مىڭعا جاقىن جاۋىنگەر بولسا، ولاردىڭ 100-ءى تاجىكستان تۋماسى ەكەنى بەلگىلى بولعان.

Abai.kz