جاقىندا يندۋستريا جانە يندۋستريالىق-يننوۆاتسيالىق دامۋ ءمينيسترى قايىربەك وسكەنباەۆ جوعارى لاۋازىمدى شەنەۋنىكتەردى اۋەجاي مەن ۆوكزالدارداعى تەكسەرىستەن بوساتاتىن بۇيرىققا قول قويعان بولاتىن. باق بەتىندەگى تالقىلاۋلاردان كەيىن مينيسترلىك وسى وزگەرىسكە بايلانىستى تۇسىنىكتەمە بەردى.

ەلىمىزدىڭ اۋەجاي، ۆوكزال، مەترولارىندا جولاۋشىلاردىڭ قاۋىپسىزدىگى ءۇشىن جۇكتەردى جانە جۇرگىنشىنى ءجىتى تەكسەرۋدەن وتكىزەتىنى بەلگىلى. بىراق كەيبىر لاۋازىمدى تۇلعالار مۇنداي تەكسەرىستەن وتپەيدى.

ولاردىڭ قۇرامىندا:

قر پرەزيدەنتى;  قر پرەمەر-ءمينيسترى; قر پارلامەنتى سەناتىنىڭ توراعاسى; قر پارلامەنتى ءماجىلىسىنىڭ توراعاسى; قر مەملەكەتتىك حاتشىسى; قر پرەزيدەنتى اكىمشىلىگىنىڭ باسشىسى; كونستيتۋتسيالىق كەڭەستىڭ توراعاسى; قر جوعارعى سوتىنىڭ توراعاسى; قر جوعارى سوت كەڭەسىنىڭ توراعاسى; قر ۇلتتىق بانكىنىڭ توراعاسى; قر پرەمەر-ءمينيسترىنىڭ ورىنباسارى;پرەزيدەنتتىڭ كومەكشىسى-قر قاۋىپسىزدىك كەڭەسىنىڭ حاتشىسى; قر باس پروكۋرورى; قر ۇلتتىق قاۋىپسىزدىك كوميتەتىنىڭ توراعاسى; قازاقستان رەسپۋبليكاسى پرەزيدەنتىنىڭ ءىس باسقارۋشىسى; مەملەكەتتىك كۇزەت قىزمەتىنىڭ باستىعى; مينيسترلەر، شەت مەملەكەتتەردىڭ قازاقستان رەسپۋبليكاسىندا اككرەديتتەلگەن ديپلوماتيالىق وكىلدىكتەرىنىڭ باسشىلارى مەن ديپلوماتيالىق پەرسونالىنىڭ مۇشەلەرى، سونداي-اق ولارمەن بىرگە تۇراتىن وتباسى مۇشەلەرى; قازاقستاندا اككرەديتتەلگەن شەت مەملەكەتتەردىڭ كونسۋلدىق مەكەمەلەرىنىڭ كونسۋلدىق لاۋازىمدى ادامدارى، سونداي-اق ولارمەن بىرگە تۇراتىن وتباسى مۇشەلەرى بار.

يندۋستريا جانە يندۋستريالىق-يننوۆاتسيالىق دامۋ مينيسترلىگىنىڭ حابارلاۋىنشا، بۇل ءتىزىم سوناۋ 2014 جىلى 18 شىلدەدە قر ۇكىمەتىنىڭ № 817 قاۋلىسىمەن بەكىتىلىپ قويىلعان. تەك 2021 جىلى زاڭنامادا وزگەرىس بولىپ، وسى ءتىزىمدى بەكىتۋ وكىلەتتىگى كولىك سالاسىنداعى وكىلەتتى ورگان قر يدم-نە بەرىلگەن. سول سەبەپتى 2022 جىلى 18 ساۋىردە يد ءمينيسترى № 213 بۇيرىققا قول قويىپ، بۇرىننان بار ءتىزىمدى قايتا بەكىتكەن. ول تىزىمدە تەكسەرىس جۇرگىزىلمەيتىن شەنەۋنىكتەر تۋرالى عانا ەمەس، سونىمەن قاتار كولىك ينفراقۇرىلىمى وبەكتىلەرىنە اكەلۋگە تىيىم سالىنعان زاتتار تۋرالى دا اقپارات بار.

بۇيرىققا ساي شەنەۋنىكتەر تەكسەرىستەن وتپەيتىن 20 تەمىرجول ۆوكزالى، 21 اۆتوۆوكزال، 20 اۋەجاي، 5 اەرودروم، سونداي-اق الماتى مەتروسى مەن اقتاۋ تەڭىز پورتى كورسەتىلگەن.

مينيسترلىك حابارلاماسىندا كولىك ينفراقۇرىلىمى وبەكتىلەرىنە كەلەتىن شەنەۋنىكتەردىڭ زاتتارىنا تەكسەرىس جۇرگىزىلمەگەنىمەن ولار كەدەندىك باقىلاۋدان وتەدى.

«بۇل بۇيرىق ۆوكزالدارعا، مەترو ستانتسيالارى مەن تەڭىز پورتىنا، اۋەجايلارعا، اۋەايلاقتارعا (جولاۋشىلار تەرمينالدارى جوق) كىرۋ كەزىندەگى تەكسەرۋگە عانا قاتىستى، بىراق بۇيرىق قازاقستان رەسپۋبليكاسىنىڭ كەدەن جانە شەكارا قىزمەتى ورگاندارىنىڭ تەكسەرۋ جۇرگىزۋىنە قولدانىلمايدى»، دەلىنگەن حابارلامادا.

Abai.kz