بۇگىن «نۇر وتان» پارتياسىنىڭ كەزەكتەن تىس سيەزىندە پرەزيدەنت قاسىم-جومارت توقاەۆ ۋكرايناداعى سوعىسقا قاتىستى پىكىر ءبىلدىرىپ، تاراپتاردى كەزىسسوز ۇستەلىنە وتىرۋعا شاقىردى. بۇل ءۇشىن ءتىپتى الاڭ ۇسىنىپ، اراعايىندىق جاساۋعا نيەتتى ەكەنىن بىلدىرگەن.

«ءبىزدىڭ ۇستانىم مەملەكەتىمىزدىڭ قاجەتتىلىگىن، ەگەمەندىگىن، اۋماقتىق تۇتاستىعىن قامتاماسىز ەتۋدىڭ سىني قاجەتتىلىگىنەن شىعۋى كەرەك. ءبىز ەۋررازيالىق قاۋىپسىزدىكتىڭ بولىنبەۋ پرينتسيپتەرىن ۇستانامىز. بولىنبەۋشىلىك ءپرينتسيپى - ءوزارا سەنىمگە نەگىزدەلگەن ءوزارا تۇسىنىستىكتى بولجايدى. وكىنىشكە وراي، بۇلاي بولمادى. مينسك كەلىسىمدەرى قاعاز جۇزىندە قالدى. بۇل ۋكراينا تەرريتورياسىندا سوعىس وتىن تۇتاتتى. گەوساياسي احۋال ايتارلىقتاي ۋشىقتى.

ءبىز ەكى تاراپتى دا بەيبىت كەلىسسوزدەر ۇستەلىندە ورتاق ءتىل تابىسۋعا شاقىرامىز. باسقا جولى جوق. جانجالدان گورى، بەيبىتشىلىك ارتىق. بەيبىتشىلىكسىز دامۋ دا بولمايدى. قازاقستان ءوز كەزەگىندە بەيبىتشىلىك ورناتۋ ءۇشىن قولدان كەلەتىن بارلىق قاجەتتىلىكتى جاساۋعا، كەرەك بولسا، اراعا تۇسۋگە ءازىر»، - دەپتى پرەزيدەنت توقاەۆ.

ايتا كەتەيىك، كەشە بەلارۋس تاراپىنىڭ ۇيىمداستىرۋىمەن العاش رەت ۋكراينا-رەسەي كەلىسسوزدەرىنىڭ العاشقى راۋندتارى وتكەن ەدى. تاراپتار ءبىر-ءبىرىنىڭ ۇسىنىستارىن ەستىپ، كيەۆ پەن ماسكەۋگە اۇقىلداسۋعا كەتكەن. ۇيىمداستىرۋشى تاراپىنىڭ ايتۋىنشا، كەلەسى كەلىسسوزدەر دە بەلارۋس تەرريتورياسىندا وتپەك.

Abai.kz