نازارباەۆتىڭ قىزى مەن كۇيەۋ بالاسى گەرمانياداعى قۇنى 100 ميلليون ەۋرو تۇراتىن مۇلىكتىڭ يەلەرى بولىپ سانالادى. بۇل تۋرالى گەرمانيانىڭ «deutsche welle» مەديا ورتالىعى زەرتتەۋىندە جاريالادى.

قازاقستاننىڭ بۇرىنعى پرەزيدەنتى نۇرسۇلتان نازارباەۆتىڭ قىزى دينارا قۇلىباەۆا مەن ونىڭ كۇيەۋى تيمۋر قۇلىباەۆ گەرمانيادا جالپى قۇنى €100 ملن استام ەليتالىق جىلجىمايتىن مۇلىكتىڭ ءتورت وبەكتىسىنە يەلىك ەتەدى، دەپ حابارلايدى Deutsche Welle (DW).

قۇلىباەۆتاردىڭ اكتيۆتەرىنىڭ ىشىندە زەەلو سارايى بار ەكەن.

بۇل ساراي XIX عاسىردا ءومىر سۇرگەن ورىس ديپلوماتى ءارى قۇپيا كەڭەسشىسى ميحايل حرەپتوۆيچتىڭ جازعى دەمالىس ورنى بولعان. باسىلىمنىڭ مالىمەتىنشە، وتباسى تاعى دا ەكى تاريحي مۇرانى يەلەنىپ وتىر.

ولار: ايگىلى ساۋلەتشى گۋستاۆ شترونىڭ ۆيللاسى مەن بيۋلەرحيوە حان سارايى جانە تاعى ءبىر قوناق ءۇي. DW باعالاۋىنشا، تەك زەەلو سارايىن ساتىپ الۋ جانە جوندەۋ جۇمىستارىنا 60 ملن ەۋرو جۇمالعان. نەمىس كومپانيالارى رەەسترىندەگى قۇجاتتاردا كورسەتىلگەندەي زەەلو سارايى تيەسىلى Schloss Seelach Invest كومپانياسىنىڭ جارعىلىق كاپيتالى دا ءدال وسىنداي سوماعا كوبەيگەن.

باسىلىمنىڭ حابارلاۋىنشا ءالى كۇنگە دەيىن قۇلىباەۆتىڭ ءوزى نە نازارباەۆ وتباسىنان بىردە-ءبىر ادام سارايعا كەلمەگەن.

نەمىستىڭ كومپانيالار رەەسترىندە تىركەلگەن زەەلو سارايى تيەسىلى Schloss Seelach Invest كومپانياسىنىڭ قۇرىلتايشىسى - Verus Praedium International قازاقستاندىق كومپانياسى. بۇل كومپانياعا الماتىداعى «كيپروس» كومپانياسى يەلىك ەتەدى. اشىق رەەستردەگى تىزىمگە سايكەس، تيمۋر قۇلىباەۆ Schloss Seelach Invest GmbH كومپانياسىنىڭ بەنەفيتسيارى بولىپ سانالادى.

تيمۋر مەن دينارا قۇلىباەۆتار گەرمانيادا قازاقستاندىق Mercury Properties ارقىلى يەلىك ەتەتىن تاعى ءبىر Bühlerhöhe Castle Invest GmbH كومپانياسىنىڭ تۇپكى بەنەفيتسيارلارى بولىپ تابىلادى. بۇل كومپانياعا ەكى قوناقۇي تيەسىلى. ءبىرى جوعارىدا ايتىلعان تاريحي مۇرا بولىپ سانالاتىن بيۋلەرحيوە حان سارايى.

قۇلىباەۆتاردىڭ ەكى بىردەي قوناق ءۇيى ورنالاسقان قالانىڭ اكىمى گۋبەرت شنۋر «وتباسى قوناق ۇيلەردى جاڭالالاۋعا سوقىر تيىن دا شىعارعان جوق»، - دەيدى.

سونىمەن قاراڭىز:

1) زەەلو سارايى

بۇل ساراي بادەن-بادەن كۋرورتتىق قالاشىقتا ورنالاسقان. XIX عاسىردا بۇل ساراي كىمگە تيەسىلى بولعانىن جوعارىدا ايتتىق.

2) بادەن-بادەندەگى ۆيلا

ونى جيىرماسىنشى عاسىردىڭ باسىندا بەلگىلى ارحيتەكتور گۋستاۆ شترو سالىپتى.

3) بيۋلەرحيوە وتەل-ساراي

ايتپاقشى، جۋىردا «Energy Monitor» Telegram ارناسى قازاقستانداعى ەڭ اۋقاتتى 5 ادامنىڭ ءبىرى سانالاتىن، ەكس-پرەزيدەنت نازارباەۆتىڭ ورتانشى كۇيەۋ بالاسى تيمۋر قۇلىباەۆتىڭ قانداي كومپانيالاردا ۇلەسى بار ەكەنىن زەرتتەپ جازىپتى.

«كompra.kz ساراپتاماسى تيمۋر قۇلىباەۆ 5 نەگىزگى كومپانيا ارقىلى ءارتۇرلى كومپانيالارعا ۇلەسكەر بولىپ وتىرعانىن كورسەتكەن. ولار:

- كيپروس;

- Steppe Capital Pte ltd;

- Joint Resources;

- Joint Technologies;

- المەكس.

اتالعان Telegram ارناسى مۇناي تاقىرىبىنا بەيىمدەلگەندىكتەن، قۇلىباەۆتىڭ اتالعان سالاداعى ۇلەستەرىنە كوبىرەك كوڭىل بولىنگەن.

تيمىر قۇلىباەۆ كاسپي-مۇنايدىڭ 100% اكتسياسىنا يەلىك ەتەدى ەكەن. بۇل كومپانيا جىلىنا 900 مىڭ توننا مۇناي وندىرەدى. كومپانيا 2020 جىلى ءار وندىرىلگەن مۇنايدىڭ تونناسىنا 44 مىڭ تەڭگەدەن سالىق تولەپتى.

مىنە، سولاي. ايتا كەتەيىك، 17 قاڭتار كۇنى تيمۋر قۇلىباەۆ «اتامەكەن» ۇلتتىق كاسىپكەرلەر پالاتاسى باسشىلىعىنان كەتەتىنىن مالىمدەگەن ەدى.

Abai.kz