ء"بىز 11 ادامدى بوساتۋعا قول جەتكىزدىك. ولاردىڭ دەنساۋلىعىنا بايلانىستى بۇلتارتپاس جازاسى وزگەرتىلدى. ولاردىڭ جاعدايىن كورىپ وتىرسىزدار. جەتى ادامدى تەرگەۋ يزولياتورىنان بوساتتى، ءتورت ادامدى اۋرۋحانادان الىپ كەتەدى. 11 ادام "جاپپاي تارتىپسىزدىك" (272-باپ) بابى بويىنشا كۇدىكتى" دەدى "امانات" قوعامدىق كوميسسياسىنىڭ جەتەكشىسى، ادۆوكات ابزال قۇسپان.

ول كوميسسيا مۇشەلەرىنىڭ ۇستالعاندارمەن كەزدەسكەنىن دە ايتتى. سەيسەنبى كۇنى كەيبىر بەلسەندىلەر ۇستالعانداردى تەرگەۋ يزولياتورىنان بوساتۋ ساتىنەن تىكەلەي ەفيردە حابار تاراتتى. وندا ۇستالعانداردىڭ جاراقاتتانعانى ايقىن كورىنەدى.

بۇعان دەيىن قاڭتار وقيعاسىنا بايلانىستى ۇستالعانداردىڭ ازاپتالعانى، قارۋلى كۇشتەردىڭ وقيعا كەزىندە جارالاعانداردى دەنساۋلىعىنا قاراماستان اۋرۋحانادان الىپ كەتكەنى جونىندە حابار تاراعان. ارنايى جاساقتىڭ جارالانعانداردى اۋرۋحانادان ۇستاپ الىپ كەتكەنى تۋرالى ۆيدەو-ايعاقتى ازاتتىق تا جاريالاعان.

بۇعان دەيىن باس پروكۋراتۋرا قۇقىق قورعاۋ ورگاندارى تارابىنان ۇستاۋ جانە تەرگەۋ كەزىندە زاڭسىز ارەكەتتەر بولعانىن (ازاپتاۋ، بيلىك وكىلەتىن اسىرا پايدالانۋ جانە تاعى باسقا) مويىنداعان. رەسمي مالىمەت بويىنشا، ازاماتتاردان 109 شاعىم تۇسكەن. 11 شاعىم بويىنشا سوتقا دەيىنگى تەرگەپ-تەكسەرۋ امالدارى باستالعان.

رەسمي اقپاراتقا قاراعاندا قاڭتار وقيعاسى بويىنشا جالپى 2044 قىلمىستىق ءىس بار، 900-گە جۋىق كۇدىكتى ۇستالعان، 800-ىنەن استامى سوت سانكتسياسىمەن قامالعان.

قاڭتار وقيعاسى مەن وقيعادان كەيىنگى ازاپتاۋ مەن قىسىم كورسەتۋ فاكتىلەرىنە قۇقىق قورعاۋشىلار الاڭداعان.

ەۋروپارلامەنت جاقىندا قابىلداعان قارارىندا بەيبىت نارازىلىقتان كەيىن وربىگەن جاپپاي زومبىلىقتى ايىپتاپ، رەسمي نۇر-سۇلتاندى "تەرروريزم" ايىبىن وڭدى-سولدى تاقپاۋعا ۇندەگەن. 27 تارماقتان تۇراتىن قۇجاتتا قازاقستان بيلىگىن ازاماتتار مەن قوعامدىق ۇيىمداردى ساياسي سەبەپپەن قۋدامالاۋعا، ادامداردىڭ بەيبىت جينالۋىنا كەدەرگى كەلتىرمەۋگە، ءجون-جوسىقسىز ۇستاۋ مەن ازاپتاۋدى دوعارۋعا شاقىرعان.

Abai.kz