جۇما, 20 مامىر 2022
ەل ءىشى... 4008 13 پىكىر 27 قاڭتار, 2022 ساعات 14:28

ءماسىموۆ ءىسى – «اسا قۇپيا» ءىس ەكەن...

ۇلتتىق قاۋىپسىزدىك كوميتەتىنىڭ بۇرىنعى باسشىسى كارىم ءماسىموۆ پەن ونىڭ ورىنباسارى ءانۋار سادىقۇلوۆ مەملەكەتكە «وپاسىزدىق جاساۋ» بابى بويىنشا كۇدىككە ءىلىنىپ، «بيلىكتى كۇشپەن باسىپ الۋ» بابى بويىنشا تەرگەۋ يزولياتورىنا قامالعان بولاتىن.

ۇلتتىق قاۋىپسىزدىك كوميتەتى: «ك.ك. ءماسىموۆ پەن ا. ت. سادىقۇلوۆقا قاتىستى كۇزەتتە ۇستاۋ تۇرىندەگى بۇلتارتپاۋ شاراسى قابىلداندى. د.ە. ەرعوجينگە قاتىستى بۇلتارتپاۋ شاراسىن تاڭداۋ ماسەلەسى قاراستىرىلۋدا»، - دەپ حابارلادى.

ولاردىڭ قىلمىس تۋرالى قۇجاتتارىنا «اسا قۇپيا» تاڭباسى باسىلعان. قر قىلمىستىق ءىس جۇرگىزۋ كودەكسىنىڭ 201-بابىنا سايكەس سوتقا دەيىنگى تەرگەپ-تەكسەرۋ دەرەكتەرى جاريا ەتىلمەيدى.

سونداي-اق، ۇلتتىق قاۋىپسىزدىك كوميتەتى ماسىموۆكە قاتىستى قىلمىستىق ءىس قر قىلمىستىق كودەكسىنىڭ ءۇش بابىندا كوزدەلگەن قىلمىس بەلگىلەرى بويىنشا تەرگەلىپ جاتقانىن حابارلادى. كۇدىكتىلەرگە مەملەكەتكە وپاسىزدىق جاساۋ جانە بيلىكتى كۇشپەن باسىپ الۋعا نەمەسە قازاقستاننىڭ كونستيتۋتسيالىق قۇرىلىسىن كۇشتەپ وزگەرتۋگە باعىتتالعان ارەكەتتەردەن باسقا، وزدەرىنە يا بولماسا باسقا ادامدارعا نەمەسە ۇيىمدارعا پايدا مەن ارتىقشىلىق الۋ ءۇشىن، بولماسا باسقا ادامدارعا نەمەسە ۇيىمدارعا زيان كەلتىرۋ ماقساتىندا «بيلىكتى نەمەسە لاۋازىمدىق وكىلەتتىكتەرىن اسىرا پايدالانۋ» دەگەن ايىپ تاعىلعان.

2022 جىلدىڭ 6 قاڭتارىندا ۇقك-ءنىڭ بۇرىنعى توراعاسى كارىم ءماسىموۆ پەن باسقا دا ادامدار ۇستالىپ، ۋاقىتشا ۇستاۋ يزولياتورىنا قامالدى. ولاردىڭ ۇستىنەن قر ۇقك قر قىلمىستىق كودەكسىنىڭ 175-بابى 1-بولىگى بويىنشا «مەملەكەتكە وپاسىزدىق جاساۋ» بابى بويىنشا سوتقا دەيىنگى تەرگەۋدى باستاعان بولاتىن.

اتالمىش قىلمىستاردى جاسادى دەگەن كۇدىكپەن ۇقك توراعاسىنىڭ بۇرىنعى ورىنباسارى – «ا» ارنايى ماقساتتاعى قىزمەتىنىڭ باستىعى ءانۋار سادىقۇلوۆ پەن ۇقك توراعاسىنىڭ ورىنباسارى داۋلەت ەرعوجين دە ۇستالدى. 10 قاڭتاردا مارات وسيپوۆ پەن داۋلەت ەرعوجين ۇقك توراعاسىنىڭ ورىنباسارلارى قىزمەتىنەن بوساتىلعان بولاتىن.

ايجان تەمىرحان

Abai.kz

13 پىكىر