بەيسەنبى, 20 قاڭتار 2022
1352 0 پىكىر 2 جەلتوقسان, 2021 ساعات 16:41

رەسەي اقش ەلشىلىگى قىزمەتكەرلەرىن قۋىپ جاتىر

رەسەي بيلىگى 31 قاڭتارعا دەيىن اقش ەلشىلىگىندە ءۇش جىلدان ارتىق جۇمىس ىستەيتىن قىزمەتكەرلەرىن ماسكەۋدەن كەتۋدى بۇيىردى. بۇل جونىندە ءسىم رەسمي وكىلى ماريا زاحاروۆا حابارلادى.

ماسكەۋدىڭ بۇل شەشىمى رەسەيلىك ديپلوماتتاردىڭ اقش اۋماعىندا قالۋ مەرزىمىن شەكتەگەن ۆاشينگتونعا جاۋابى بولىپ تۇر.

زاحاروۆانىڭ سوزىنشە، بۇل رەسەيدىڭ تاڭداۋى ەمەس، – "مۇنداي ويىندى اقش-تىڭ ءوزى تاڭىپ وتىر".

وسىعان دەيىن ۆاشينگتون قۇراما شتاتتاردان كەلەسى جىلدىڭ 30 قاڭتارىنا دەيىن 27 رەسەيلىك ديپلوماتتىڭ كەتۋىن تالاپ ەتكەن.

ماسكەۋدەگى امەريكا ەلشىلىگى ازىرگە بۇل جاعدايعا قاتىستى پىكىر بىلدىرمەدى.

2020 جىلى اقش مەملەكەتتىك دەپارتامەنتى ۆاشينگتوندا، نيۋ-يوركتە جانە حيۋستوندا جۇمىس ىستەيتىن رەسەي ديپلوماتتارىنا ءۇش جىل مەرزىمنەن ارتقى قالۋعا بولمايتىن شەكتەۋ قويعان.

"ەگەر كەلەسى جىلدىڭ 1 شىلدەسىنە دەيىن ۆاشينگتون ءۇش جىلدىق شەكتەۋدەن باس تارتپاسا، رەسەيدەن تاعى دا امەريكالىق ديپلوماتتار شىعارىلادى", – دەپ ەسكەرتەدى رەسەي سىرتقى ىستەر مينيسترلىگى.

سوڭعى بىرنەشە جىلدان بەرى ۆاشينگتون مەن ماسكەۋ اراسى ناشارلاپ كەتتى. بۇل رەسەيدىڭ ۋكراينا جەرى قىرىم تۇبەگىن اننەكسيالاعاننان كەيىن باستالدى.

Abai.kz

0 پىكىر