ەل فۋتبولىندا كەلىمسەك باپكەرلەر قاپتاعان. قوستانايلىق «توبىلدىڭ» تىزگىنى ۆياچەسلاۆ گروزنىيدا. «استانانى» ميروسلاۆ بەرانيك جاتتىقتىرادى. قاراعاندىداعى ۆيكتور كۋمىكوۆ تا قازاق ەمەس. كەشە «قايراتقا» يسپان حوسە سەرەستى الدىردىق.

مۇمكىن قازىرگى فۋتبولدىڭ، بۇگىنگى زاماننىڭ تالابى شىعار. شەتتەن كەلدى دەپ شەتپەكتەتەر ەش ويىمىز جوق. رەسەيدىڭ «زەنيتىن» لۋچانو سپاللەتتي «انجيدى» گۋس حيددينك باسقارادى. قازاقستان فۋتبولىنىڭ دامۋىنا شىن ۇلەس قوسىپ جاتسا، الگى حوسە سەرەستەرگە مىڭ العىس. ايتپەسە كەيبىر لەگيونەر باپكەرلەر اقشا تولەمەسەڭ اكەسىنىڭ كورىن دە قازبايتىنىن كورىپ ءجۇرمىز.

باياعىدا ءبىر دانىشپان «قارنىمنىڭ اشقانىنا ەمەس، قادىرىمنىڭ قاشقانىنا قينالامىن» دەگەن ەكەن. قازاق فۋتبولىندا قازاق باپكەرلەرىنىڭ ازدىعى نامىسقا تيەدى ارينە. ساۋساقپەن سانارلىقتاي. «قاراعاي باسىن شورتان شالدىرا» سويلەدى دەپ سوكپەڭىز جانكۇيەر اعايىن! ايقىن انگىمەنى اشىق ايتىپ وتىرمىز. قالاساق تا، قالاماساق تا شىندىق وسى.

قازاق باپكەرى بولعان ءۇشىن ەمەس، قايسار باپكەر بولعانى ءۇشىن سىيلايمىن ءوز باسىم تالعات بايسۋفينوۆتى. مارۋانۇلىندا بەس بەرەر، التى الار جوق. قاجىماس قايرات، ەرەن ەڭبەگىمەن قازاق فۋتبولىن، پاۆلودار فۋتبولىن العا سۇيرەپ جۇرگەن ازامات قانداي قۇرمەتكە بولسىن لايىق. وسى اپتادا «ەرتىس» كومانداسىنىڭ باس باپكەرىنەن سۇحبات الدىق.

ءادىل سىن بولسا قابىلدايمىن

ەل فۋتبولىندا كەلىمسەك باپكەرلەر قاپتاعان. قوستانايلىق «توبىلدىڭ» تىزگىنى ۆياچەسلاۆ گروزنىيدا. «استانانى» ميروسلاۆ بەرانيك جاتتىقتىرادى. قاراعاندىداعى ۆيكتور كۋمىكوۆ تا قازاق ەمەس. كەشە «قايراتقا» يسپان حوسە سەرەستى الدىردىق.

مۇمكىن قازىرگى فۋتبولدىڭ، بۇگىنگى زاماننىڭ تالابى شىعار. شەتتەن كەلدى دەپ شەتپەكتەتەر ەش ويىمىز جوق. رەسەيدىڭ «زەنيتىن» لۋچانو سپاللەتتي «انجيدى» گۋس حيددينك باسقارادى. قازاقستان فۋتبولىنىڭ دامۋىنا شىن ۇلەس قوسىپ جاتسا، الگى حوسە سەرەستەرگە مىڭ العىس. ايتپەسە كەيبىر لەگيونەر باپكەرلەر اقشا تولەمەسەڭ اكەسىنىڭ كورىن دە قازبايتىنىن كورىپ ءجۇرمىز.

باياعىدا ءبىر دانىشپان «قارنىمنىڭ اشقانىنا ەمەس، قادىرىمنىڭ قاشقانىنا قينالامىن» دەگەن ەكەن. قازاق فۋتبولىندا قازاق باپكەرلەرىنىڭ ازدىعى نامىسقا تيەدى ارينە. ساۋساقپەن سانارلىقتاي. «قاراعاي باسىن شورتان شالدىرا» سويلەدى دەپ سوكپەڭىز جانكۇيەر اعايىن! ايقىن انگىمەنى اشىق ايتىپ وتىرمىز. قالاساق تا، قالاماساق تا شىندىق وسى.

قازاق باپكەرى بولعان ءۇشىن ەمەس، قايسار باپكەر بولعانى ءۇشىن سىيلايمىن ءوز باسىم تالعات بايسۋفينوۆتى. مارۋانۇلىندا بەس بەرەر، التى الار جوق. قاجىماس قايرات، ەرەن ەڭبەگىمەن قازاق فۋتبولىن، پاۆلودار فۋتبولىن العا سۇيرەپ جۇرگەن ازامات قانداي قۇرمەتكە بولسىن لايىق. وسى اپتادا «ەرتىس» كومانداسىنىڭ باس باپكەرىنەن سۇحبات الدىق.

ءادىل سىن بولسا قابىلدايمىن

باس باپكەر بولعان سوڭ، كەيدە مەنى سىناپ جاتادى.  كوماندا بىردە جەڭەدى، بىردە جەڭىلەدى. بۇل-فۋتبول. مەن دانىشپان ەمەسپىن. ەت پەن سۇيەكتەن جارالعان اداممىن. ماتچ بارىسىندا ءوزىم تۋرالى جاعىمسىز سوزدەردى ەستىپ قالامىن. جەكە باسقا ءتيسىپ جاتادى. ايتا بەرسىن. نە ايتقىسى كەلسە، سونى ايتسىن. «يت ۇرەدى، كەرۋەن كوشەدى». مەن ءوز جۇمىسىمدى جالعاستىرا بەرەمىن. جانكۇيەرلەردى تۇسىنۋگە بولادى. ايتسىن، سىناسىن. بىراق ناقتى جۇمىسىمدى سىناسىن. سوندا ءادىل بولادى. ادامدىق مادەنيەت، جانكۇيەرلىك مادەنيەت دەگەن ۇعىمدار بار. بوسقا بايبالام سالىپ، ستاديوندا ايقايلاپ، بالاعاتتاۋ ەشقانداي مادەنيەتكە جاتپايدى. - دەپ باستادى انگىمەسىن تالعات مارۋانۇلى.

«اتىراۋ» مەن «استاناعا» قارسى وتكىزگەن ويىندار تۋرالى;

سوڭعى ماتچتاردا جاقسى وينادىق. اتىراۋدى سىرت الاڭدا جەڭدىك. استانانى ءوز ستاديونىمىزدا ۇتتىق. جىگىتتەر ءتۇسىندى. بىرىنشىدەن وزدەرىنە سەنە باستادى. ەكىنشىدەن ءبىر-بىرىنە سەنە باستادى. ۇجىمدىق ويىن قالىپتاستى. كوماندالىق رۋح بار. بىرەۋ بارلىعى ءۇشىن، بارلىعى بىرەۋ ءۇشىن قاعيداسى. تاكتيكالىق بىرنەشە وزگەرىستەر جاسادىق. فۋتبولشىلاردىڭ جەڭىسكە دەگەن قۇلشىنىستارى جاقسى. ەڭبەكتىڭ، جاتتىعۋدىڭ ناتيجەسى. «اتىراۋمەن» «استانامەن» بولعان ويىندار وڭاي بولمادى. ەكەۋى دە جاقسى كوماندالار. جاقسى ويىنشىلارى بار. ءبىزدىڭ جەڭىستەرىمىزدىڭ كەپىلى جاتتىعۋدا. توككەن تەر بوسقا كەتپەدى. كەلەسى ويىندارعا دا  دايىندىقپەن، جاۋاپكەرشىلىكپەن شىعامىز. كورەمىز. ينشاللا تۇگەلى دۇرىس بولادى.

سەرگەي سترۋكوۆ داۆيد لوريالاردىڭ «ەرتىستەن» كەتۋ سەبەبى

مەن چەمپيونات باستالار الدىندا بارلىق فۋتبولشىمەن جەكە-جەكە سويلەسكەنمىن. سوندا ايتتىم ءبىز رەزۋلتات جاساۋ ءۇشىن جينالدىق. ەشكىمدى زورلاپ ۇستامايمىز. ولار دا تۇسىنگەن، كەلىسكەن. ماۋسىم ارالىق ءۇزىلىس كەزىندە سەرگەي سترۋكوۆ «توبىلعا» كەتتى. ەكىنشى اينالىمىنىڭ باستالۋىنا 2 كۇن قالعاندا ماعان قوڭىراۋ شالدى. كەتەمىن دەدى. سويلەستىك. كەتتى.  نەگىزگى قۇرامادا شىعۋ ءۇشىن ءوزىڭدى كورسەتۋىڭ كەرەك. مەن بويىڭ ۇزىن، ءسوزىن جاقسى دەپ سوستاۆقا قويا المايمىن. سەرگەي سوڭعى ويىنداردا نەگىزگى قۇرامدا ويناماي ءجۇردى. مەن جاس بولسا دا ەڭبەكقور پاۆەل ءشاباليندى شىعاردىم. باكاەۆ-شابالين تاندەمى جاقسى ويناپ كەتتى. ماعان رەنجيتىن سەبەپ بولمادى. قاقپاشى داۆيد لوريامەن دە جاعداي وسىلاي. مەن ايتتىم ءوزىڭنىڭ جەكە شەشىمىڭ دەپ. مەن ەشكىمگە جالىنبايمىن. بىرىنشىدەن «ەرتىس»، ەكىنشىدەن پاۆلودار وبلىسى، ۇشىنشىدەن مەن باپكەر رەتىندە قانداي مىقتى فۋتبولشى بولسا دا جالىنىپ، ۇستامايمىز.

جاس شابۋىلشى گلەب مالتسەۆتىڭ بولاشاعى

گلەبتىڭ جاعدايى قازىر جاقسى. ول ومسكتە، ماسكەۋدە مەديتسينالىق تەكسەرۋدەن ءوتتى. ەندى يزرايلدە. دارىگەرلەر ەشقانداي اقاۋ تاپپادى دەنساۋلىعىنان. بىراق ونىڭ ءبىر جامانى  وسىلاي جاي وتىرعاندا قان اينالىمى دۇرىس ەمەس. ال جاتتىعۋ  جاساعاندا بارلىعى ءوز ورنىنا كەلەدى. بۇل ءبىر فەنومينالدى جاعداي. كىشكەنە تۇسىنىكسىزدەۋ. دارىگەرلەر قارايدى ءالى. وپەراتسيانى ءالى جاسامايدى. ەگەر وپەراتسيا قاجەت بولسا دارىگەرلەر ۋاقىتىندا ايتار ەدى. جاس بولسا دا گلەب تالانتتى فۋتبولشى. ءبىز ونىڭ بارلىق تەكسەرىلۋىنە جاعداي جاسادىق. كلۋب بارلىق قاراجاتتى تولەدى. ول پاۆلوداردىڭ تۋماسى. تىزىمدە بار. ەشكىم كوماندادان ونى شىعارىپ تاستامادى. ءبارى ويداعىداي بولسا مالتسەۆ بولاشاقتا تالاي قاقپاشىلاردىڭ مازاسىن الادى.

ۇلىقبەك باكاەۆكە باس باپكەردىڭ كوزقاراسى

باكاەۆ-پروفەسسيونال. مەن ونىمەن كوپ سويلەستىم. جانكۇيەرلەر وعان كوپ ايقايلايدى. باكاەۆ بارلىعىن تۇسىنەدى. كىم نە ايتسا دا ول ليدەر. مەن ۇلىقبەككە سەنەمىن. ەندى قاراڭىز 7 گول سوقتى. كوماندا ءبومبارديرى. 11 رەت  «گولەۆوي پاس» بەردى. قوستانايدا «توبىلمەن» ويىندا جالعىز ءوزى كوماندانى الىپ شىقتى. 1 تۋردا «شاحتەردى» جەڭگەندە ادەمى پاس بەردى. سترۋكوۆ گول سوقتى. «جەتىسۋمەن»  ويىندا يۋرين مەن اياعانوۆ باكاەۆتىڭ پاستارىمەن گول سالدى. اتىراۋداعى  ماتچتا كەرەمەت وينادى. وسى جولى «استانانى» جەڭگەندە  قورعاۋشىلارعا دا كومەكتەستى، گول دا كىرگىزدى. «ەرتىس» ءۇشىن بارلىعىن جاساۋعا دايىن فۋتبولشى. ءار ماتچقا جاۋاپكەرشىلىكپەن شىعادى. ول دا ادام عوي. ۋايىمدايدى. مەن ونى ارقاشان قولداپ وتىرامىن.

الىبەك اياعانوۆ پەن تيمۋر بايجانوۆتار ەرتەڭىمىز

بولاشاعىنان زور ءۇمىت كۇتەمىن. ەكەۋى دە ءالى جاس. ولارعا كوپ جاتتىعۋ كەرەك. جالقاۋلانباي جۇمىس ىستەسە ماقساتتارىنا جەتەدى. تاربيەلەرى وتە جاقسى. ايتقانىمدى تىڭدايدى. اتا-انالارىنا ۇلكەن راحمەت.جاتتىعۋدى  قالدىرمايدى. جاس بولعان سوڭ راسىن ايتقاندا اندا-ساندا ديسكوتەكا، قىزدارعا بارادى. بارسىن. ءوزىم دە جاس بولعانمىن. قارسى ەمەسپىن. ەڭ نەگىزگىسى جاتتىعۋدى ۇمىتپاسىن. ماتچتارعا كەرى اسەر ەتپەسىن. ولاردىڭ ءبىرىنشى ماقساتى فۋتبول ويناۋ. كومانداعا كومەكتەسۋ.

جاڭادان كەلگەن فۋتبولشىلار جايلى

سترۋكوۆ كەتكەن سوڭ تەز ارادا ونىڭ ورنىنا جاقسى شابۋىلشى تابۋ كەرەك بولدى. قارادىق، ىزدەستىردىك. ۆلاديسلاۆ ميرچەۆ بولگارلىق فۋتبولشىعا توقتادىق. تالانتتى شابۋىلشى. جاسى 25-تە. «قايراتتا» «جەتىسۋدا» سىناقتا بولدى. بوسنيالىق مالەتيچتە مىقتى فۋتبولشى. ۋنيۆەرسال. ەكى قاپتالدا دا ويناي الادى.وتە ماڭىزدى.ويتكەنى بىزدە يۋرين، ەسوومبا، شابالين عانا كەز-كەلگەن جەردە ويناي بەرەدى. بۇل فۋتبولشىلاردىڭ كەلۋىمەن «ەرتىس» تەك كۇشەيدى.

«ەرتىستىڭ» ماقساتى چەمپيوندىق

مەن بىرىنشىلىك باستالار الدىندا وبلىس باسشىسىمەن كەزدەستىم. ول كەزدە باحىتجان ساگىنتاەۆ بولدى. كوماندانى بىرگە جاساقتادىق. بىرگە اقىلداستىق. وسى جولى ەرلان مۇحتارۇلىمەن جولىقتىم. ايماق باسشىسى بارلىعىن سۇرادى. قانداي پروبلەما بار، نە ىستەۋ، قانداي قولداۋ كەرەكتىگىن. بارلىق جاعداي جاسالىنعان. ءبىزدىڭ جاعدايىمىز وبلىس اكىمىنىڭ ەرەكشە قاداعالاۋىندا. «ەرتىستىڭ» ماقساتى تەك چەمپيون بولۋ. ودان باسقا ماقسات بولۋى مۇمكىن ەمەس. شامامىز كەلگەنشە العا ۇمتىلامىز. ۇزدىك ۇشتىككە كىرسەك تە جامان ەمەس. پاۆلودارعا ەۋروپانىڭ كوماندالارىن اكەلۋ- مىندەتىمىز. قالامىزدا گرۋزيانىڭ، پولشانىڭ كلۋبتارى بولدى. سونى جالعاستىرۋ كەرەك. ەل بىرىنشىلىگىندە  جۇلدەگە ىلىكسەك ، وسىنداي مۇمكىندىك بولادى.

باس باپكەرلىك جۇمىسى تۋرالى

سەنسەڭىز دە سەنبەسەڭىز دە  ايتايىن 3 جىلدا جانۇياممەن بىرگە ەشقايدا دەم المادىم. ۋاقىت جوق. ستاديون-ءۇي-ستاديون. بولدى. جۇمىستان باسقا نارسەنى ويلاۋعا شاما بولمايدى. مەنىڭ جۇمىسىم، مەنى اسىراپ وتىر. كوماندا جەڭسە قۋاناسىڭ. جەڭىلسە ۋايىمدايسىڭ. كۇندىز كۇلكىدەن، تۇندە ۇيقىدان ايرىلدىق. كەيبىر جانكۇيەرلەر ايتادى بايسۋفينوۆ «جىلى ورىندا» وتىر دەپ. جىلى بولسا كەلىپ وتىرسىن قاسىما. بۇل ورىن «ەلەكتريچەسكي ستول». وڭاي ەمەس الدەبىرەۋلەر ويلاعانداي. مەن ءوز جۇمىسىمدى جاقسى كورەمىن. توزەمىن، شىدايمىن. «ەرتىس» جاقسى ناتيجەگە جەتسە باسقا ارمانىم جوق.

تالعات اعا اعىنان جارىلدى. ايتارى كوپ ەكەن ابىرويلى ازاماتتىڭ. ەشكىمگە وكپەم جوق دەدى سۇحبات سوڭىندا. تەك ءار ادام ءوز ىسىنە جاۋاپتى، ءار سوزىنە ءمان بەرسە دەپ ءتۇيىن جاسادى. شىنىمەن دە ارتىق كەتىپ جاتادى كەيبىر جانكۇيەرلەر. دۇرىس تالاپتى تالعات باپكەر دە دۇرىس تۇسىنەدى. قازىرگى قازاق فۋتبولىندا تالعات بايسۋفينوۆتان باسقا ءبولىپ جارا ايتاتىن جاتتىقتىرۋشىڭ دا جوق. سوندىقتان «قولدا بار التىننىڭ، قادىرىن بىلەيىك» جانكۇيەر اعايىن!

ەركەبۇلان الدابەرگەنوۆ

پاۆلودار

«اباي-اقپارات»