ەنەرگەتيكا ءمينيسترى ماعزۇم مىرزاعاليەۆ اتىراۋ مۇناي وڭدەۋ زاۋىتىندا ديزەل وتىنىمەن قامتاماسىز ەتۋ ماسەلەلەرى بويىنشا كەڭەس وتكىزدى. ۆەدومستۆو باسشىسىنا ىشكى نارىقتاعى جاعداي تۋرالى باياندالدى، دەپ حابارلايدى ەنەرگەتيكا مينيسترلىگىنىڭ ءباسپاسوز قىزمەتى.

قازمۇنايگاز كومپانياسىنىڭ دەرەكتەرى بويىنشا وتاندىق مۇناي وڭدەۋ زاۋىتتارى بارىنشا جۇكتەلگەن. مۇناي ونىمدەرىنىڭ نەگىزگى تۇرلەرى بەكىتىلگەن جوسپاردان اسىرا وندىرىلۋدە.

«تامىز-قىركۇيەك ايلارىندا قازاقستاندا ديزەل وتىنىنا سۇرانىس وتە جوعارى بولدى. مۇنىڭ سەبەبى – ديزەل وتىنىنىڭ باعاسى تومەن بولعاندىقتان، ترانزيتتىك جۇك كولىكتەرى جانارماي ءۇشىن بىزدە ايالدايدى. قازىرگى تاڭدا وسى جاعداي قولمەن باسقارۋ رەجيمىنە كوشتى. ەنەرگەتيكا مينيسترلىگى نارىقتى تەز ارادا تۇراقتاندىرۋ جانە ساپالى وتىنمەن قامتاماسىز ەتۋ مىندەتىن قويدى»، – دەدى ۇلتتىق كومپانيا باسقارماسى  توراعاسىنىڭ ورىنباسارى دانيار تيەسوۆ.

ايتۋىنشا، كۇن سايىن شىمكەنت زاۋىتىندا شامامەن 5,5 مىڭ توننا، اتىراۋ زاۋىتىندا 4,4 مىڭ تونناعا جۋىق ديزەل وتىنى وندىرىلەدى.

ون ءتورت كۇن ىشىندە ەكى زاۋىت 133 مىڭ توننا ديزەل وتىنىن ءوندىردى، بۇل جوسپارلى كورسەتكىشتەن 4 مىڭ تونناعا ارتىق. وسى جىلدىڭ 9 ايىندا ءۇش ءموز-دە بارلىعى 3,7 ميلليون توننا ديزەل وتىنى ءوندىرىلدى.

سونداي-اق تيەسوۆ قىركۇيەكتە ەگىن جيناۋ ناۋقانىنا وتىنىمدەر تولىعىمەن جابىلعانىن، شارۋالارعا ديزەل وتىنى جەڭىلدىكپەن ساتىلعانىن اتاپ ءوتتى.

ەنەرگەتيكا ءمينيسترى ماعزۇم مىرزاعاليەۆ مۇناي وڭدەۋشى كومپانيالار باسشىلارىنان كاسىپورىنداردىڭ ۇزدىكسىز جۇمىسىن قامتاماسىز ەتۋدى تالاپ ەتتى.

«ءموز باسشىلىعى مەن ۇجىمىنىڭ ءبىرىنشى كەزەكتەگى مىندەتى زاۋىتتىڭ سەنىمدى جانە تۇراقتى جۇمىس ىستەۋىن قامتاماسىز ەتۋ ەكەنىن ەرەكشە اتاپ وتكىم كەلەدى. زاۋىتتىڭ ىستەن شىعۋىنا ءارتۇرلى سەبەپتەردى كەلتىرۋگە بولادى.

الايدا ەلىمىزدە مۇنداي جاعداي ەندى قايتالانباۋعا ءتيىس»، – دەدى مىرزاعاليەۆ.

سونىمەن قاتار ول اۆتوجانارماي قۇيۋ ستانتسياسىندا ساتىلاتىن ديزەل وتىنىنىڭ ساپاسىنا دا توقتالدى.

«قازمۇنايگازدان» بارلىق جەتكىزۋ تىزبەگى بويىنشا – ءموز-دەن اجقس-قا دەيىن جانار-جاعارماي ماتەريالدارىنىڭ ساپاسىن باقىلاۋ جۇيەسى بويىنشا ۇسىنىستار ەنگىزۋدى سۇرايمىن»، – دەدى مينيستر.

كەڭەس قورىتىندىسى بويىنشا مىرزاعاليەۆ ۇلتتىق كومپانياعا بارلىق ءموز-ءدىڭ تۇراقتى جۇمىس ىستەۋىن، سونداي-اق اتىراۋ ءموز-ىنە ەلەكتر ەنەرگياسىن ۇزدىكسىز جەتكىزۋ بويىنشا شارالاردى تۇراقتى باقىلاۋدا ۇستاۋدى تاپسىردى.

دەرەككوز: Arasha.kz

Abai.kz